අසේල කුරුළුවංශ –
ගෙළ කපා යාචක කාන්තාවක් ඝාතනය කර පොලීසියට භාර වූ 30 හැවිරිදි තරුණයා අංකුඹුර ගල්කන්ද නිවසකදී කාන්තාවකගේ හිසට පිහියකින් පහරදී මරාදමා සිරුරට ගිනි තැබීමේ සිද්ධියටද සම්බන්ධ බව පොලිස් පරීක්ෂණ මගින් හෙළිව තිබේ.
අංකුඹුර පොලිස් වසමේ ගල්කන්ද ප්රදේශයේ නාය යෑමේ අවධානමකට ලක්ව තිබූ නිවසක අභිරහස් ලෙස ඝාතනය කර තිබූ අවුරුදු 18-30 අතර වයසේ පසුවන කාන්තාවගේ ඝාතනය සම්බන්ධයෙන් මහනුවර පොලීසියේ කොට්ඨාස අපරාධ විමර්ශන අංශය මගින් සැකපිට අත්අඩංගුවට ගත් 73 හැවිරිදි පුද්ගලයා හා මෙම තරුණයා ඉතා සමීප ඇසුරක් පවත්වමින් එකම නිවසේ ජීවත්ව සිට ඇති බව පොලීසිය පවසයි.
අංකුඹුර ඝාතනය සම්බන්ධයෙන් 73 හැවිරිදි හිටපු බන්ධනාගාර නියාමකවරයා අත්අඩංගුවට ගෙන දින දෙකකට පසු අදාළ තරුණයා අරුප්පොළ ප්රදේශයේ මහවැලි ගං ඉවුරේදී යාචක කාන්තාව ඝාතනය කර තිබිණි. සිද්ධියෙන් පසු මහනුවර පොලීසියට පැමිණ පාපොච්චාරණයක් කරමින් ඔහු කියා තිබුණේ ණයට ඉල්ලා ගත් රුපියල් ලක්ෂයක මුදලින් හිඟ මුදල ඉල්ලා නිතර කරදර කිරීම නිසා ඇයව ඝාතනය කළ බවයි.
යාචක කාන්තාවගේ ඝාතනය සම්බන්ධයෙන් පරීක්ෂණ පැවැත්වූ මහනුවර පොලීසියේ අපරාධ අංශය සැකකරුගේ ප්රකාශ තුළින් ඔහු අංකුඹුර ගල්කන්ද ප්රෙදේශයේ සිදුවූ ඝාතනයටද සම්බන්ධ බවට තොරතුරු අනාවරණය කරගෙන තිබේ.
එම ප්රකාශ අනුව ගල්කන්ද ප්රදේශයේ නිවසකදී ඝාතනයට ලක්ව ඇත්තේ ද යාචක කාන්තාවක් බවට පොලීසිය සැක කරයි.
කලක් ලොතරැයි අළෙවි කර තිබෙන 30 හැවිරිදි සැකකරු අංකුඹුර ගල්කන්ද ප්රදේශයේදී කාන්තාවක් ඝාතනය කළ බවට සැක කෙරෙන 73 හැවිරිදි පුද්ගලයාට තාත්තා යනුවෙන් ආමන්ත්රණය කරන බවද පොලීසිය පවසයි.
යාචක කාන්තාව ඝාතනයේ සැකකරු ඔහුගේ මව හා අංකුඹුර ඝාතනයේ සැකකරු ගොහාගොඩ තේක්කවත්ත ප්රදේශයේ නිවසක එකට වාසය කර තිබෙන බවද පොලිස් පරීක්ෂණ මගින් හෙළිව තිබේ.
අංකුඹුර ගල්කන්ද නිවසේ ඝාතනය සම්බන්ධයෙන් සැකපිට අත්අඩංගුවට ගත් හිටපු බන්ධනාගාර නියාමකයා සොරකම් 15 ක් සම්බන්ධයෙන් වරදකරු වී වසර 17 ක සිරදඬුවම් විඳ 2019 දී නිදහස්ව පැමිණ ඇත.
යාචක කාන්තාවක් රැගෙන තමන්ද පියා සමඟ අංකුඹුරට ගිය බව 30 හැවිරිදි සැකකරු පොලීසියට පවසා තිබේ. ඔහු තරමක මන්ද මානසික තත්ත්වයකින් පෙළෙන බැවින් අදාළ ප්රකාශ සම්බන්ධයෙන් තව දුරටත් විමර්ශන සිදු කරන බව පොලීසිය පවසයි.
අරුප්පොළ ගං ඉවුරේදී ඝාතනයට ලක්වූ යාචක කාන්තාවක පිළිබඳව මෙතෙක් කිසිදු තොරතුරක් අනාවරණයවී නොමැති අතර මහනුවර ඔරලෝසු කණුව අසළ ඇය සමඟ යාචක වෘත්තියේ නිරත වූ පිරිසකගෙන් පොලීසිය ප්රකාශ ද සටහන් කරගෙන තිබේ.
මහනුවර ජ්යෙෂ්ඨ පොලිස් අධිකාරි අනුරුද්ධ බණ්ඩාර හක්මන, පොලිස් අධිකාරි (01) දයාල් ඉලංගකෝන් යන මහත්වරුන්ගේ උපදෙස් මත කොට්ඨාස අපරාධ විමර්ශන අංශයේ ස්ථානාධිපති ප්රධාන පොලිස් පරීක්ෂක රංජිත් ජයසේන, පොලිස් පරීක්ෂක ආර්.පී වීරරත්න, මහනුවර මූලස්ථාන පොලිසියේ අපරාධ විමර්ශන අංශයේ ස්ථානාධිපති ප්රධාන පොලිස් පරීක්ෂක සම්පත් රාජපක්ෂ විසින් සිද්ධිය පිළිබඳ පරීක්ෂණ පවත්වයි.
මේ ලිපිත් කියවන්න…
යාචක කාන්තාවකගෙන් රුපියල් ලක්ෂයක ණයක් අරන් ණය මුදල් ආපසු ඉල්ලූ විට ගෙල කපා ඝාතනය කරලා…
