මෙතෙක් ඉදිරිපත් කර තිබූ සිය යෝජනාවලිය සංස්කරණය කරගනිමින් ශ්රී ලංකාවේ සියලුම ශ්රේණිවල විනිසුරුවරුන්ගේ විශ්රාම යාමේ කාලසීමාව තවත් වසර දෙකකින් දීර්ඝ කිරීමට රජය නව යෝජනාවක් ඉදිරිපත් කර ඇතැයි සන්ඩේ ටයිම්ස් වාර්තා කරයි.
රජය මීට පෙර තීරණය කර තිබුණේ අභියාචනාධිකරණ සහ ශ්රේෂ්ඨාධිකරණ විනිසුරුවරුන් සඳහා පමණක් මෙම විශ්රාම වයස් සීමාව දීර්ඝ කිරීමට වුවද, මේ වන විට එම ස්ථාවරය සංශෝධනය කරමින් සියලුම විනිසුරුවරුන් වෙත මෙම අවස්ථාව ලබා දීමට පියවර ගෙන ඇත.
විනිසුරුවරුන්ගේ විරෝධතාවය
රජයේ මෙම පියවර ක්රියාත්මක වන්නේ, උත්තරීතර අධිකරණවල විනිසුරුවරුන් ඇතුළු සමස්ත විනිසුරුවරුන්ගේ විශ්රාම වයස දීර්ඝ කිරීමේ රජයේ යෝජනාවට එකඟ නොවීමට විනිසුරුවරුන්ගේ සංගමය (JSA) ඊයේ (11) ඒකමතිකව තීරණය කිරීමෙන් පසුවය.
කඩුවෙල මහේස්ත්රාත් අධිකරණ පරිශ්රයේදී පැවැත්වුණු විනිසුරුවරුන්ගේ සංගමයේ විශේෂ මහා සභා රැස්වීමේදී, රජයේ මෙම යෝජනාව පිළිබඳව සාමාජිකයන්ගේ අදහස් විමසීම සඳහා රහස් ඡන්දයක් පවත්වා ඇත. එහිදී රැස්වීමට සහභාගි වී සිටි සාමාජිකයන් 65 දෙනාම මෙම යෝජනාවට සිය අකමැත්ත පළ කර තිබේ. මෙම රැස්වීම සඳහා සාමාජිකයන් 225 කට වැඩි පිරිසකගේ නම් කැඳවා තිබුණද, සහභාගි වී සිටියේ සාමාජිකයන් 65 දෙනෙකු පමණි.
මෙම තීරණාත්මක රැස්වීම පැවැත්වීමට දිනකට පෙර, විනිසුරුවරුන්ගේ සංගමයේ සභාපති ලෙස කටයුතු කළ කොටුව මහේස්ත්රාත් පසන් අමරසේන සිය ධුරයෙන් ඉල්ලා අස් වී ඇත. සභාපතිවරයාගේ ඉල්ලා අස්වීමෙන් අනතුරුව, සංගමයේ උප සභාපතිවරයාගේ ප්රධානත්වයෙන් මෙම රැස්වීම පවත්වා ඇති බව විනිසුරුවරුන්ගේ සංගමය නිකුත් කළ නිවේදනයක දැක්වේ.
මීට පෙර, ශ්රී ලංකා නීතිඥ සංගමය ද (BASL) අභියාචනාධිකරණ සහ ශ්රේෂ්ඨාධිකරණ විනිසුරුවරුන්ගේ විශ්රාම වයස දීර්ඝ කිරීමට රජය ගෙන තිබූ තීරණය සම්බන්ධයෙන් සිය දැඩි කනස්සල්ල පළ කර තිබුණි.
රජය කියන්නේ කුමක් ද?
රජයේ ආරංචි මාර්ග සඳහන් කරන ආකාරයට, දැනට අධිකරණ පද්ධතිය තුළ පවතින විනිසුරුවරුන්ගේ හිඟය සහ නඩු කටයුතු අවසන් කිරීමේදී සිදුවන ප්රමාදයන් සැලකිල්ලට ගනිමින් මෙම තීරණය ගෙන තිබේ. ඒ අනුව, මීට පෙර යෝජනා කර තිබූ මහාධිකරණ විනිසුරුවරුන්ට අමතරව මහේස්ත්රාත් සහ දිස්ත්රික් විනිසුරුවරුන්ගේ ද විශ්රාම යාමේ වයස් සීමාව දීර්ඝ කිරීමට රජය දැන් යෝජනා කර ඇත.
කෙසේ වෙතත්, අභියාචනාධිකරණ සහ ශ්රේෂ්ඨාධිකරණ විනිසුරුවරුන්ගේ විශ්රාම වයස දීර්ඝ කිරීම සඳහා ව්යවස්ථා සංශෝධනයක් අත්යවශ්ය වන අතර, සෙසු අධිකරණවල විනිසුරුවරුන්ගේ විශ්රාම වයස දීර්ඝ කිරීම අදාළ පනත් සංශෝධනය කිරීම මඟින් සිදු කිරීමට හැකියාව පවතී.
