අසේල කුරුළුවංශ –
උදය ගම්මන්පිල විසින් රචිත ‘පාස්කු ප්රහාරයේ මහ මොළකරු’ ග්රන්ථය එළිදැක්වීමේ අවස්ථාවට විපක්ෂ නායක සජිත් ප්රේමදාස පෞද්ගලිකවම සහභාගී වූ බව ද කිසිවෙක් පොතක් එළිදැක්වීමකට ආරාධනා කළ පසු එම අවස්ථාවට සහභාගී වීමෙන් පොතේ අන්තර්ගතය පිළිගන්නවා යැයි විශ්වාස කිරීම වැරැද්දක් බව ද ශ්රී ලංකා නිදහස් පක්ෂ මහ ලේකම් දුමින්ද දිසානායක පවසයි.
අද (05) මහනුවරදී පැවැති රැස්වීමකදී අදහස් දක්වමින් මහ ලේකම්වරයා සඳහන් කළේ, එම උත්සවයේදී විපක්ෂ නායකවරයා අසුන්ගෙන සිටියේ තමන්ට ඉදිරියෙන් බවයි. මද වේලාවක් ප්රමාද වී පැමිණි විපක්ෂ නායකවරයා උත්සවය අවසන් වීමට පෙර එතැනින් පිටව ගිය බවද ඔහු කීය.
මෙම ග්රන්ථය එළිදැක්වීමේ උත්සවය සඳහා සියලු දේශපාලන පක්ෂවලට ආරාධනා කර තිබූ බැවින් ශ්රී ලංකා නිදහස් පක්ෂ සාමාජිකයින් ද ඊට සහභාගී වූ බවත්, උදය ගම්මන්පිල එහිදී ප්රකාශ කළ මතය උත්සවයට පැමිණි සියලු දෙනා පිළිගන්නා බවට නිගමනය කිරීම වැරදි බවත් දිසානායක අවධාරණය කළේය.
“කවුරුන් හෝ පොතක් එළිදක්වන බව පවසා ආරාධනා කළහොත් අපි ඊට සහභාගී වෙනවා. නමුත් ඒ පොතේ අන්තර්ගතය සමඟ අපි එකඟ වන බවක් එයින් අදහස් වන්නේ නැහැ,” යැයි ඔහු පැවසීය.
පාස්කු ප්රහාරය සම්බන්ධයෙන් අදහස් දක්වමින් මහ ලේකම්වරයා වැඩිදුරටත් කියා සිටියේ පාස්කු ප්රහාරය කළේ කවුද සහ ඊබ්රාහිම් නානාගේ පුතාලා දෙදෙනෙක් බෝම්බ පුපුරුවාගෙන සියදිවි නසාගත් බව රටම දන්නා කරුණක් බව කීවේය. මෙම ප්රහාරය පිළිබඳ තොරතුරු කලින් ලැබී තිබියදීත් ඇයි මෙය නවත්වා ගැනීමට නොහැකි වූයේ කියන කාරණය අප සියලු දෙනා හමුවේ තිබෙන ගැටලුව ඔහු පැවසුවේය.
රටට වැදගත් සේම මියගිය පවුල්වල අයට සාධාරණයක් කරනවා නම් අපි හෙළිකර ගත යුතුව තිබෙන්නේ එම කාරණය බවද ලේකම්වරයා අවධාරණය කළේය.
ඔහු කීවේ ප්රහාරය පිළිබඳ තොරතුරු කලින් ලැබී තිබියදීත් එය වළක්වා ගැනීමට නොහැකි වූයේ මන්ද යන්න රට හමුවේ ඇති ප්රධාන ගැටලුව බවය. එක් බෝම්බකරුවෙකු සිය නිවසේදී බෝම්බය පුපුරුවා ගැනීමට පෙර ආරක්ෂක අංශ එතැනට ගොස් තිබීමෙන් පැහැදිලි වන්නේ ඒ පිළිබඳ යම් දැනුවත්භාවයක් තිබූ බව යැයි ද, මේ සම්බන්ධයෙන් ගැඹුරින් විමර්ශනය කර රටට සත්ය හෙළි කිරීම ආරක්ෂක අංශ සතු වගකීමක් බව ද ඔහු සඳහන් කළේය.
මෙම රැස්වීම ජාතික සාම මණ්ඩලයේ මෙහෙයවීමෙන් සහ සුහඳ කාන්තා කාර්ය සංවිධානයේ සංවිධානත්වයෙන් මහනුවර ඩෙවෝන් හෝටලයේදී පැවැත්විණි.
මේ ලිපියත් කියවන්න.
