එළඹෙන මාර්තු මස 9 වැනි දින පැවැත්වීමට සැළසුම් කර තිබූ පළාත් පාලන මැතිවරණය කල් දමන ලෙස ඉල්ලා ගොනු කර ඇති පෙත්සම් විභාගය පෙබරවාරි මස 23 වැනිදා දක්වා කල් තැබීමට ශ්රේෂ්ඨාධිකරණය තීරණය කර කළේය.
මෙම පෙත්සම ගොනු කරනු ලැබුවේ යුද හමුදාවේ විශ්රාමික කර්නල් වරයෙක්වන ඩබ්ලිව්.එම්.ආර්. විජේසුන්දර විසිනි.
රටේ බරපතල ආර්ථික අර්බුදයක් පවතින අවස්ථාවක සහ ජාත්යන්තර මූල්ය අරමුදල බරපතල කොන්දේසි පනවා ඇති මෙම අවස්ථාවේ මැතිවරණයක් පැවැත්වීම සුදුසු නොවන බවට සමාජය තුළ මතයක් නිර්මාණය වී ඇති බැවින් ඡන්ද විමසීමේ කටයුතු අත්හිටුවීමේ රිට් ආඥාවක් මැතිවරණ කොමිසම වෙත නිකුත් කරන ලෙස ඉල්ලා ඔහු මෙම පෙත්සම ඉදිරිපත් කරනු ලැබුවේය.
මෙම පෙත්සම විභාගයට නොගෙන නිෂ්ප්රභ කරන ලෙසත් සැලසුම් කර ඇති අයුරින් මැතිවරණය පවත්වන ලෙසට අධිකරණ නියෝගයක් නිකුත් කරන ලෙසත් ඉල්ලා සමගි ජන බලවේගයේ ප්රධාන ලේකම් පාර්ලිමේන්තු මන්ත්රී රංජිත් මද්දුමබණ්ඩාර සහ පාර්ලිමේන්තු මන්ත්රී මහාචාර්ය ජී.එල් පීරිස් විසින් ගොනු කරනු ලැබූ පෙත්සම ද අද (10) විභාගයට ගැනුණි.
එහි දී අදාල පෙත්සම සලකා බලමින්, ශ්රේෂ්ඨාධිකරණ විනිසුරු එස්.තුරෙයිරාජා, ඒ.එච්.එම්.ඩී.නවාස් සහ ශිරාන් ගුණරත්න යන විනිසුරුවරු මඩුල්ල විසින් ප්රකාශ කළේ, ජනතාවගේ අයිතියක් වන, සර්ව ජන ඡන්ද බලය ආරක්ෂා කිරීමේ වගකීම ඇත්තේ, මැතිවරණ කොමිෂන් සභාවට වන බැවින් සහ මැතිවරණ කොමිෂන් සභාව නිසි ආකාරව පවත්වන බවට මැතිවරණ කොමිෂන් සභාව තම අධිකරණය හමුවේ ප්රතිඥාවක් දී ඇති බැවින් ඒ සම්බන්ධයෙන් අධිකරණයට නියෝග නිකුත් කිරීමේ අවශ්යතාවක් නොමැති බව ප්රකාශ කළේය.
ඒ අනුව එළඹෙන මාර්තු මස 9 වැනි දින පැවැත්වීමට සැළසුම් කර තිබූ පළාත් පාලන මැතිවරණය නියමිත පරිදි පැවැත්වීමට ශ්රී ලංකා මැතිවරණ කොමිෂමට ශ්රේෂ්ඨාධිකරණය විසින් අද (10) උපදෙස් දෙනු ලැබුවේය.
අදාල තීන්දුව ප්රකාශයට පත් කරමින් විනිසුරු මඩුල්ල වැඩිදුරටත් සඳහන් කළේ, පළාත් පාලන මැතිවරණය නීත්යනුකූලව පැවැත්වීමට ජාතික මැතිවරණ කොමිසම දැනටමත් භාරගෙන ඇති බැවින් ඒ සම්බන්ධයෙන් නියෝග අවශ්ය නොවන බවය.
මේ කතාවත් කියවන්න..
