දෑස නොපෙනුනත් මගේ -වැඩිය පාඩු නෑ…
ඇගිලි තුඩින් අතගගා – ඉගෙනගන්නෙ මා…..
ඒ ගීතයේ එ හරියටම වැටහුනේ අදය… ඒ හිමාෂා කාවින්දයා හේරත් ගේ කතාව ඇසූ පසුය.
ඇය සැබෑ දක්ෂ දැරියකි. උපතින් දෙනෙත් අන්ධ බව ඇයට ජීවිතය ජයගන්නට කිසිදු බාධාවක් වී නැත. මේ පුංචි කෙල්ල ඒ සමාර්ථ නමයක් සමග මෙවර අපොස සාමාන්ය පෙළ සමත් වූවාය.
ඈ උපන්නේ අනුරාධපුරයේ ය. දෑස් නොපෙනෙන සිඟිත්තිය ඉපදී කලක් ගත වන විට සැනින් යමක් අවබෝධ කර ගනිමින් දක්ෂ ලෙස අභියෝග ජය ගන්නා බව දත් මවත් පියත් ඇය කැටුව කුරුණෑගලට ආහ.
” හොඳින් උගන්න ගන්න නම් ඇයට අවශ්ය පහසුකම් අපි ලබා දිය යුතුව තිබුණා.“ ඇයගේ මව වන ගීතානි කියන්නීය. අපට තේරුණා දු හුඟක් දක්ෂයි කියලා. එයා හුඟක් අපෙන් අහ අහ ඉගෙන ගත්තා. ඒ වගේම පුංචි කාලේ ඉඳලම හරි ලස්සනට සින්දු කිව්වා.“
“කාවින්දිගේ මුල්ම පාසල වුණේ කුරුණෑගල සඳකඩ විශේෂ පාසල. 2016 වසරේ දී ශිෂ්යත්ව ය සමත් වුණේ ලකුණු 173ක් ලබා ගෙන.“
ඉන් අනතුරුව අපි දුවව කුරුණෑගල මහින්ද විද්යාලයට ඇතුළත් කළා. සාමාන්ය පෙළ ඉගෙන ගැනීම ට දුව ලොකු උනන්දුවක් දැක්වුවා. ඒ විතරක් නෙවෙයි දුව මහින්දෙ ඉඳගෙන සංගීතයත් හැදෑරුවා. එයා ගායනයට ගොඩක් දක්ෂයි. සහතික පත් විශාල ප්රමාණයක් දිනාගන්න එයට පුළුවන් වුණා. එතැන් සිට දක්ෂ ලෙස විභාගයට මුහුණ දුන් කාවින්ද්යා මේ වසරේ ඒ නවයක් සහිතව සමත් වුණා“. ඒ අම්මා අපට කීවාය.
ඇගේ පියා අනුර හේරත්ය. අයියා ප්රවීන් හේරත්ය.
සංගීතයට දක්ෂ කාවින්ද්යා 2017 වසරේ සමස්ත ලංකා ප්රථම ස්ථානය ලබන්නීය. සාමාන්ය දරුවන් අතර ඇය අසාමාන්ය වූයේ එසේය.
“නමුත් දුව කවදාවත් ඒ ගැන උදම් අනා සතුටු වුණේ නැහැ. එයා හැම වෙලාවෙම බලන්නෙ කාට හරි උදව් කරන්න. කවුරු හරි දුකෙන් ඉන්නවා කිව්වොත් එයා හුඟක් දුක් වෙන ළමයෙක්. අද අපි ගොඩක් සතුටු වෙනවා එයාගේ දක්ෂතාවයන් දැකලා.“
කාවින්ද්යා ගේ අම්මා ගීතානි අවසන් වශයෙන් කීවාය.
