උපේක්ෂා උඩුවරැල්ල –
ජැමෙයිකාවේ කිංග්ස්ටන් නුවර පිහිටි සුප්රකට සබීනා පාර්ක් ක්රීඩාංගණයේදී ශ්රී ලංකා වේලාවෙන් අද (2026 ජූනි 15) පැවැති තීරණාත්මක තෙවැනි සහ අවසාන පන්දුවාර 20-20 (T20I) තරගයෙන් ශ්රී ලංකා කණ්ඩායම පරදා කඩුලු 5ක විශිෂ්ට ජයක් ලැබීමට බටහිර ඉන්දීය කොදෙව් කණ්ඩායම සමත් විය.
මෙම ජයග්රහණයත් සමඟ දෙරට අතර පැවැති තරග තුනකින් සමන්විත 20-20 තරගාවලිය 2-1ක් ලෙස ජය ගැනීමට සත්කාරක කොදෙව්වන් සමත් විය.
තරගයේ කාසියේ වාසිය දිනා පළමුවෙන් පන්දුවට පහරදීමට ශ්රී ලංකා නායකයා තීරණය කළේය. ඒ අනුව පිටියට පිවිසි ශ්රී ලංකා කණ්ඩායම නියමිත පන්දුවාර 20 අවසානයේ සියලුම දෙනා දැවී ලබා ගන්නේ 169කි. මේ පවතින විස්සයි 20 රටාව තුළ එය මහා ලකුණක් නොවේ.
ආරම්භක පිතිකරු පැතුම් නිස්සංක ලකුණු 26ක් සහ කමිල් මිෂාර ලකුණු 28ක් ලබා ගත්තේය. නැවත වරක් පවන් රත්නායක අසමත්ය. ඔහු මේ තරගාවලියේ එක්දින තරගයේදී මෙන්ම විස්සයි විස්ස තරග තුනේදීම මුලුමනින්ම අසමත් වූයේය. පවන් රත්නායක අද ක්රීඩාකළේ එක පන්දුවක් පමණි. මුහුන දුන්න පළමු පන්දුවෙන්ම ෂාමර් ජෝෂප් හමුවේ කඩුල්ල මුවා කළ වරදට හසුවිය.
විශේෂත්වය වන්නේ ශ්රී ලංකා ක්රීඩකයින් හැම එකාම ක්රීඩා කළේ බාග ඉනිම්ය. කමිඳු 20කි වනිඳු 21කි. . දසුන් 16කි. ඉනිමක් යැයි යන්තමින් පෙනුනේ දුනිත් වෙල්ලාලගේ ගේ ඉනිමය. දුනිත් පන්දු 28කදී වේගවත් ලකුණු 43ක් රැස් කළේය. ඔහුගේ ඉනිමට හතරේ පහර 6ක් සහ එක් හයේ පහරක් ඇතුළත් විය. ඔහුත් අර්ධ ශතකයක් නොලබා දැවී ගියේය. දැන් විස්සයි විස්ස තරග දෙස බලනවිට පෙනී යන ඇත්තම කතාව නම් බාග ඉනිම් ගසන පිතිකරුවන් සහිත කණ්ඩායමකට විස්සයි 20 තරගයක් ජයග්රහණය කළ නොහැකිය.
තරගයේ දී අප දුටුවේ බටහිර ඉන්දීය කොදෙව් පන්දු යවන්නන්ගේ දැඩි පාලනය හමුවේ ශ්රී ලංකා මැදපෙළ සහ පසුපෙළ පිතිකරුවන්ට ලකුණු වේගය රඳවා ගැනීමට නොහැකිවීමය.
කොදෙව් ඉනිමේ කැපී පෙනෙනම ක්රීඩකයා වූයේ වේග පන්දු යවන ෂමාර් ජෝසෆ්ය. ඔහු තමන්ගේ ජාත්යන්තර 20-20 ක්රිකට් දිවියේ ප්රථම වතාවට කඩුලු 5ක දක්ෂතාවක් (ලකුණු 33කට කඩුලු 5ක්) සනිටුහන් කරමින් ශ්රී ලංකා ඉනිම සුනුවිසුනු කර දැමීය
ඔහුගේ පන්දු යැවීම හමුවේ පැතුම් නිස්සංක, පවන් රත්නායක, දුනිත් වෙල්ලාලගේ, දුෂ්මන්ත චමීර සහ මහීෂ් තීක්ෂණ දැවී ගියහ. ජේසන් හෝල්ඩර් සහ රොස්ටන් චේස් එක් කඩුල්ල බැගින් බිඳ හෙලූ අතර අකීල් හොසේන් සහ මැතිව් ෆෝඩ් ද පන්දු යැවීමෙන් දායකත්වය දුන්හ.
ජයග්රහණය කරා මෙහෙයවුන බටහිර ඉන්දීය කොදෙව් ඉනිම…
ලකුණු 170ක ඉලක්කයක් හඹා යාම සඳහා පිටියට පිවිසි බටහිර ඉන්දීය කොදෙව් කණ්ඩායමේ ආරම්භය සාර්ථක වූයේ නැත. ඔවුන්ගේ නායක ෂායි හෝප් ලකුණු ලබා ගැනීමට පෙරම දැවී ගියේය. එහෙත් ඉන් අනතුරුව පිටියට පිවිසි ෂිම්රොන් හෙත්මයර් පන්දු 19කින් ලකුණු 32ක් සහ රොව්මන් පවෙල් පන්දු 27ක දී ලකුණු 33ක් රැස් කරමින් කොදෙව් කණ්ඩායම නැවත තරගයට අවතීර්ණ කළහ.
තරගයේ හැරවුම් ලක්ෂය වූයේ ෂර්ෆේන් රදර්ෆර්ඩ්ගේ විශිෂ්ට ඉනිමයි. ඔහු පන්දු 40කදී නොදැවී ලකුණු 54ක් රැස් කළේය. ඊට හතරේ පහර 3ක් සහ හයේ පහර 4ක් අතුළත් විය. කොදෙව් ඉනිම ජයග්රහණය කරා ස්ථාවරව රැගෙන ගියේ ඔහුය. 06 වැනි කඩුල්ල වෙනුවෙන් පිටියට පිවිසි අංක 07 පිතිකරු ජේසන් හෝල්ඩර් අතිවේගවත් ඉනිමක් ක්රීඩා කරමින් පන්දු 5ක් ඇතුළත හයේ පහර 3ක් සමඟින් නොදැවී ලකුණු 21ක් ලබාගෙන තරගය නිමා කිරීමට සමත් විය. ඒ අනුව කොදෙව් ක්රීඩකයෝ පන්දු 2ක් ඉතිරිව තිබියදී කඩුලු 5ක් පමණක් වැය කර ජයග්රාහී ඉලක්කය සපුරා ගත්හ.
පන්දු යැවීමේදී ශ්රී ලංකාව වෙනුවෙන් විශිෂ්ට පාලනයක නිරත වූ වනිඳු හසරංග පන්දුවාර 4කදී ලකුණු 17කට කඩුලු 2ක් දවාලීය.
දුනිත් වෙල්ලාලගේ සහ මහීෂ් තීක්ෂණ එක් කඩුල්ල බැගින් බිඳ හෙලූහ. ශ්රී ලංකා පන්දු රකින්නන් අතින් උඩපන්දු කිහිපයක් ගිලිහී ගියද, ඔවුන් තරගයේ අවසානය දක්වාම දැඩි සටනක නිරත විය.
මුළු තරගාවලිය පුරාම දැක්වූ සුපිරි දක්ෂතා හේතුවෙන් බටහිර ඉන්දීය කොදෙව් කණ්ඩායමේ ෂමාර් ජෝසෆ් තරගයේ වීරයා සහ තරගාවලියේ වීරයා යන සම්මාන ද්විත්වයම දිනා ගත්තේය. ඔහු මෙම තරගාවලිය තුළදී සමස්ත කඩුලු 11ක් බිඳ හෙලීමට සමත් විය.
බටහිර ඉන්දීය කොදෙව්වන් අපට වඩා විස්සයි 20 ක්රීඩාවේ ඉදිරියෙන් සිටින බව යළිත් සහතික කළහ. පවන්ගේ අසමත්වීම සහ දුනිත්ගේ මතුවීම මේ තරගාවලියේ අප දුටු වැදගත් කාරණාවය. පසුගිය තරගයේ පන්දු ඕවර 3යි පන්දුවක් යවමින් ලකුණු 09කට කඩුළු 03ක් දවා ගත් දුෂ්මන්ත චමීර ගිය තරගයටත් ප්රමාණවත් ලෙස මේ තරගයේ දී ගුටි කෑවේය. ඔහු පන්දු ඕවර 04ට ලකුණු 64ක් ලබා දුන්නේය. ගිය තරගයේ මුල් ඕවර ගණනටම ලබා දුන් ලකුණුවලට වඩා දෙගුණයකට ආසන්න සාමාන්යයක් මෙවර ඔහුගේ එක් ඕවරයකට තිබිණි. ඕවරයක සාමාන්ය ලකුණු 16කි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
එක් තරගයක අපව පුදුම කිරිමත් අනුයාත අනෙක් තරගයේ ලොන්තපෝල් වීමත් අතර ඇති මේ අන්තරය කුමක් දැයි අපට වැටහෙන්නේ නැත. දසුන් ශානක ගැන කියන්නට ඇත්තේත් එයය. වෘත්තිය ක්රිකට් ක්රීඩාවේ ස්වීප් ඇදෙනවා වැනි පුදුම කෙරෙන අහම්බයන් නැත. එහි ප්රකට විය යුත්තේ විශ්වාස කටයුතු සාමාන්යයකි. අපට නැත්තේත් ඒ වෘත්තීයමය විශ්වාසය ය.
