ඉඳුනිල් කහටපිටිය –
2013 වසරෙන් පසු බටහිර ඉන්දීය කොදෙව් දූපත්හිදී ශ්රී ලංකා කණ්ඩායම ලැබූ පළමු එක්දින තරග ජයග්රහණය මීට දෙදිනකට පෙර වාර්තා කළේය. නව ප්රධාන ගේරි කර්ස්ටන්ගේ ධුර කාලය ආරම්භ වන්නේ ඒ ජයග්රාහී ප්රවේශයත් සමගය. තරග තුනකින් සමන්විත මෙම එක්දින තරගාවලියේ දෙවැනි තරගය හෙට (ශ්රී ලංකා වේලාවෙන් අලුයම 1.00 ට) මුල් තරගය පැවැත්වු සබීනා පාර්ක් ක්රීඩාංගණයේදීම පැවැත්වීමට නියමිතය.
දැන් සත්කාරක කොදෙව්වන් තරගාවලිය රැකගැනීම සඳහා තරගයකය. ශ්රී ලංකා කණ්ඩායම පිටියට ප්රවේශ වන්නේ සිය ජයග්රාහී ගමන ඉදිරියටම රැගෙන යාම සඳහාය.
ශ්රී ලංකා පිලේ සැලසුම් සහ වෙනස්කම්
පළමු තරගයේදී ප්රධාන පුහුණුකරු කර්ස්ටන් ශ්රී ලංකා පිලේ ක්රීඩකයන්ගේ දක්ෂතා හඳුනාගනිමින් නව අත්හදා බැලීම් කිහිපයකට මුල පිරුවේය. එහිදී කමිඳු මෙන්ඩිස් ආරම්භක පිතිකරුවකු ලෙස පෙරමුණට එවීමට ගත් තීරණය පළමු තරගයේදී සාර්ථක වූයේ නැත. එහෙත් අංක 3 පිතිකරු ලෙස නායක කුසල් මෙන්ඩිස් පෙන්වූ ආක්රමණශීලී පිතිහරඹය නායකත්වය ඔහුගේ සුපුරුදු වේගවත් ක්රීඩා විලාසයට බාධාවක් නොවන බව පෙන්නුම් කළේය.
කෙසේ වෙතත්, ශ්රී ලංකා ඉනිමේ යම් පසුබෑමක් ද දක්නට ලැබිණි. 2026 විස්සයි20 ලෝක කුසලාන තරගාවලියේදී කැපී පෙනෙන දක්ෂතා දැක්වූ පවන් රත්නායක, අතිශය තීරණාත්මක අංක 4 ස්ථානයේ ක්රීඩා කරමින් පන්දු 38 කදී රැස් කළේ ලකුණු 24 ක් පමණි. කුසල් මෙන්ඩිස් ගොඩනැගූ වේගවත් ලකුණු වේගය අඩාල කිරීමට මෙම ඉනිම හේතු වූයේය. කෙසේ වෙතත් අවසාන පන්දුවලදී ජනිත් ලියනගේ දැක්වූ දක්ෂතාව සැලකිල්ලට ගෙන, මීළඟ තරගයේදී ඔහු අංක 4 ස්ථානය සඳහා අත්හදා බැලීමට පුහුණුකරුගේ අවධානය යොමුවිය හැකි බව ජාත්යාන්තර විශ්ලේෂකයෝ පුරෝකථනය කරති.
කොදෙව්වන්ගේ දුර්වලතා සහ අභියෝග
බටහිර ඉන්දීය කොදෙව් පිලට පළමු තරගයේදී ධනාත්මක කරුණුවලට වඩා ගැටලුවලට මුහුණ දීමට සිදු විය. ඔවුන්ගේ ආරම්භක පිතිකරුවන් සාර්ථක ආරම්භයක් ලබා දුන්නද, මැදපෙළ පිතිකරුවන්ට ශ්රී ලංකා දඟපන්දු යවන්නන් හමුවේ සාර්ථක වීමට නොහැකි විය. සාමාන්යයෙන් හයේ පහරවල් සඳහා ප්රසිද්ධ කොදෙව්වන්, මාස හයකට පසු සහභාගි වූ පළමු එක්දින තරගය මෙය වීම නිසාදෝ, මැදපෙළදී ඉනිම ගොඩනැගීමේදී යම් අපහසුතාවක් සහ මන්දගාමීත්වයක් පෙන්නුම් කළහ.
එසේ වුවද, ලකුණු නොලබා සිටිය දී තරගයේ මුල්ම පන්දුවේ දී ලබා දුන් උඩ පන්දුව කොදෙව්වන් අතින් ගිලිහී ගිය පසු පළමු තරගයේදී ලකුණු 79ක් ලබාගනිමින් ශ්රී ලංකා ඉනිමේ නැංගුරම වූ පැතුම් නිස්සංකව ඉදිරි තරගයේදී මෙල්ල කිරීම සඳහා කොදෙව්වන් විශේෂ සැලසුම් සකස් කරනු ඇත. හෙට පැවැත්වෙන තීරණාත්මක තරගයේදී වනිඳු හසරංග සහ මහීෂ් තීක්ෂණගේ දඟපන්දුවලට මුහුණ දීමේදී දඟ පන්දු යවන තුන් ඉරියව් ක්රීඩකයාවන චේස්ගේ භූමිකාව කොදෙව් පිලට අතිශය වැදගත් වනු ඇත.
වේගපන්දුවේ දරුණු ප්රහාරය
ශ්රී ලංකා වේගපන්දු යවන ක්රීඩක දුෂ්මන්ත චමීර, ඕනෑම තණතීරුවක තවමත් තමන් සතු දරුණු වේගය ප්රබල අවියක් බව ඔප්පු කරමින් ලකුණු 67 කට කඩුලු 4 ක් බිඳහෙළා ශ්රී ලංකා පිලට ජයග්රහණය උදා කර දුන්නේය. ඔහුගේ පන්දු යැවීමේ රටාව හෙට තරගයේදී ද කොදෙව් ආරම්භක පිතිකරුවන්ට දැඩි පීඩනයක් එල්ල කරනු නොඅනුමානය.
හෙට තරගය සඳහා බටහිර ඉන්දීය කොදෙව් පිල කිසිදු වෙනසක් නොමැතිව ක්රීඩා කිරීමට ඉඩ ඇත. ශ්රී ලංකා පිල ද බොහෝ දුරට පෙර කණ්ඩායමම පිටියට බස්සවනු ඇතැයි අපේක්ෂා කෙරේ. එහෙත්, පළමු තරගයේදී දක්නට ලැබුණු ‘රිවර්ස් ස්වින්ග්’ (Reverse Swing) පන්දු යැවීමේ දී පිතිකරුවන්ට එල්ලවන තර්ජනය සැලකිල්ලට ගෙන, අසිත ප්රනාන්දු වෙනුවට එෂාන් මාලිංග කණ්ඩායමට කැඳවීමේ හැකියාවක් ද පවතී.
තණතීරුව සහ කාගුණික තත්ත්වය
සබීනා පාර්ක් තණතීරුව සාම්ප්රදායික මන්දගාමී ස්වභාවයෙන් බැහැරව, මුල් පන්දුවාර කිහිපයට සාර්ථකව මුහුණ දෙන පිතිකරුවන්ට පහසුවෙන් ලකුණු රැස් කිරීමට අවස්ථාව සලසා දෙයි.
පළමු තරගයේදී දඟපන්දු යවන්නන්ට ද මෙහි සහායක් ලැබුණු බැවින් හෙටත් එවැනිම තත්ත්වයක් බලාපොරොත්තු විය හැකිය. මෙම තරගය දිවා-රාත්රී තරගයක් ලෙස පැවැත්වෙන බැවින් දෙවැනි ඉනිමේදී පිනිබෑමේ (Dew) බලපෑමක් ඇති විය හැකිය. සවස් කාලයේදී වැසි සහිත කාලගුණයක් වාර්තා වුවද, පසුව එය පහව යනු ඇතැයි පුරෝකථනය කර තිබේ.
සුවිශේෂී වාර්තා කිහිපයක්
- සබීනා පාර්ක් ක්රීඩාංගණයේදී බටහිර ඉන්දීය කොදෙව් පිලට එරෙහිව ශ්රී ලංකාව එක්දින තරගයකදී ලැබූ ප්රථම ජයග්රහණය මේ තරගාවලියේ මුල්ම තරගය ජයග්රහණය කිරීමය.
- වත්මන් එක්දින පිතිකරුවන් අතරින් ශ්රී ලංකාවට එරෙහිව වැඩිම ලකුණු ලාභීන් අතර ෂායි හෝප් ලකුණු 663 ක් ලබා 4 වැනි ස්ථානයේ පසුවේ. (පෙරමුණේ පසුවන්නේ ජෝ රූට් – 1425, ශකීබ් අල් හසන් – 716 සහ බාබර් අසාම් – 700 වේ).
- පළමු තරගයේදී මහීෂ් තීක්ෂණ පන්දුවාරයකට ලකුණු 2.60 ක ඉතා විශිෂ්ට පන්දු යැවීමේ වේගයක් (Economy Rate) පවත්වා ගැනීමට සමත් විය.
යළිත් සිහි කළ යුතු කතාවක් තිබේ. ජාත්යාන්තර කණ්ඩායමක් සිය රටේ දී පරාජය කිරීම මොන තත්ත්වයක වුවද අභියෝගයකි. එහෙත් ලෝක ශ්රේණිගත කිරීම්වල අප ඉන්නේ 06 වැනි තැන වුවද බටහිර ඉන්දීය කොදෙව්වන් ඉන්නේ බංගලියන්ටත් පහළ 10 වැනි තැනය.
