2008 වසරේ කොළඹ තදාසන්න ප්රදේශවල තරුණයින් ඇතුළු පුද්ගලයින් 11 දෙනෙකු පැහැරගෙන ගොස් අතුරුදන් කිරීමේ සිද්ධියට සම්බන්ධ සැකකරුවෙකුට සැඟව සිටීමට ආධාර අනුබල දුන්නේ යැයි කියන සිද්ධියේ සැකකරුවෙකු වශයෙන් අධිකරණයට ඉදිරිපත් වූ හිටපු නාවික හමුදාපති රවීන්ද්ර විජේගුණරත්න ඇප මත මුදා හැරීමට කොළඹ කොටුව මහේස්ත්රාත් අධිකරණය අද (22) නියම කළේය.
මීට පෙර නිකුත් කළ නොතීසියකට අනුව සැකකාර හිටපු නාවික හමුදාපතිවරයා අධිකරණය හමුවේ පෙනී සිටි අතර, ඉන් අනතුරුව සැකකරුට අදාළ චෝදනා පත්රය විවෘත අධිකරණය හමුවේ කියවනු ලැබීය.
එල්ල වී ඇති චෝදනා
2008 සහ 2009 වසරවල කොළඹ සහ තදාසන්න ප්රදේශවලින් තරුණයින් 11 දෙනෙකු පැහැරගෙන ගොස් අතුරුදන් කිරීමේ සිද්ධියේ සැකකරුවෙකු වන චන්දන හෙට්ටිආරච්චි නැමැත්තාට සැඟව සිටීමට ආධාර අනුබල දීම ඇතුළු චෝදනා කිහිපයක් මෙම චෝදනා පත්රය මගින් ඉදිරිපත් කර තිබිණි.
නීතිඥ තර්ක සහ විරෝධතා
සැකකාර හිටපු නාවික හමුදාපතිවරයා වෙනුවෙන් පෙනී සිටි ජනාධිපති නීතිඥ අනූජ ප්රේමරත්න අධිකරණය හමුවේ කරුණු දක්වමින් කියා සිටියේ, මෙම සැකකරු මීට පෙර මෙම නඩුකරයේ සැකකරුවෙකු ලෙස නම්කර පසුව නීතිපති උපදෙස් මත නිදහස් කළ අයෙකු බවයි. එමෙන්ම දැනට ඉදිරිපත් කර තිබෙන චෝදනා නීතියට පටහැනි බවටද ඔහු තර්ක කළේය.
මෙහිදී අගතියට පත් පාර්ශ්වය වෙනුවෙන් පෙනී සිටි නීතිඥ අචලා සෙනෙවිරත්න ප්රකාශ කළේ, අපරාධ පරීක්ෂණ දෙපාර්තමේන්තුව විධිමත් විමර්ශනයක් සිදු කිරීමෙන් අනතුරුව මෙම චෝදනා ඉදිරිපත් කර ඇති බවයි. කෙසේ වෙතත්, එම චෝදනාවලට තමන් නිවැරදිකරු බව රවීන්ද්ර විජේගුණරත්න සිය නීතිඥවරයා මාර්ගයෙන් අධිකරණයට දැනුම් දුන්නේය.
අධිකරණ නියෝගය
කරුණු සලකා බැලූ කොළඹ කොටුව මහේස්ත්රාත් පසන් අමරසේන, සැකකරු රුපියල් ලක්ෂ 10 බැගින් වූ ශරීර ඇප දෙකක් මත මුදා හැරීමට නියෝග කළේය.
මේ අතර අපරාධ පරීක්ෂණ දෙපාර්තමේන්තුව අධිකරණයට දන්වා සිටියේ මෙම සිද්ධියට සම්බන්ධ ප්රධාන සාක්ෂිකරු දේශපාලන රැකවරණ පතා ස්විට්සර්ලන්තයේ සිටින බැවින්, ස්වීට්සර්ලන්ත තානාපති කාර්යාලය සහ විදේශ කටයුතු අමාත්යාංශය හරහා ඔහු වෙත සිතාසි නිකුත් කිරීමට නියෝගයක් ලබා දෙන ලෙසයි.
ඒ අනුව අදාළ සිතාසි ඉංග්රීසි භාෂාවෙන් නිකුත් කිරීමට අවශ්ය පියවර ගන්නා ලෙස නියෝග කළ මහේස්ත්රාත්වරයා, නඩු විභාගය එළඹෙන දෙසැම්බර් මස 09 වන දා දක්වා කල් තැබීය.
