ධම්මික බණ්ඩාර තුමාට ගමේ ඇත්තන් කියන්නේ මෑණියන් කියා බවත් එතුමා බෙහෙත් හේත් කරන්නේ වරමකින් බවත් අපට කීවේ කොවිඩ් පැණිය ගන්නට එතුමා හමුවෙන්නට ගිය ගමනේ දී ඒ ගමේ ගැමියන්ය.
අපි ඒ බව ලියා තැබුවත් ධම්මික බණ්ඩාර තුමා ගේ වරම ගැන එතුමාගෙන්ම අහගන්නට ලැබුණේ චමුදිත සමරවික්රම නිසාය. චමුදිත සමග කළ සම්මුඛ සාකච්ඡාවේදී එතුමා මේ විස්මය දනවන රහස රට අභිමුව හෙළි දරවු කළේය. එතුමාට ලැබී තිබුණේ කාලි දේව වරමකි.
එතුමා කාලි දේව වරමින් ලැබුණු පැණිය දේශීය වෛද්ය ඇමති තුමා හරහා මුලින්ම පෙව්වේ සෞඛ්ය ඇමතිනියටය. ඊට පස්සේ පාර්ලිමේන්තුවටය. කට්ටිය පැණි ගසා ඡායාරූපත් පල කර තිබුණහ. අනතුරුව එතුමා මිනිස්සුන්ට පැණි දන්සලක් දුන්නේය. ධම්මිකතුමා දුන්න පැණි දන්සල වැනි දන්සලක් රටට කවදාවත් අමතක වෙන්නේ නැත. කොවිඩ් ලොවේත් තිබුණේ නැත. මිනිස්සු හිටයේ මිලි මීටරේ පරතරයෙනි. පැණි ගන්න රාජ රාජ අමාත්යවරුත් ප්රභූ ගේට්ටුවෙන් ආහ. ඒ ගැන අපි එතැනට ගොස් ඇසින් දැක ලියා තැබුවෙමු.
ඉන් අනතුරුව කාලි පැණියෙන් ධම්මික තුමා දළදාවහන්සේ පිදූහ. අස්ගිරි මල්වතු උභය පාර්ශවයේ නායක හාමුදුරුවරුන්ට පැණි පූජා කළහ. මහා නායක හිමිවරු ධම්මික බණඩාර තුමා ගේ මේ හෙළ වෙදකමේ හාස්කම ගැන අප්රමාණ සේ පැහැදී සිටියහ.
-
අටමස්ථානාධිපති නා හිමිගේ ගේ මෑණියන්
ඊයේ (16) එතුමෝ ජය ශ්රී මහා හාමුදුරුවන්ට කාලි දේව වරමින් ලද පැණි පූජා කරන්නට මහා සංඝරත්නයත් පෙරටු කොටගෙන වැඩියහ. සමාජය මුලින්ම එතුමා කාලි දේව වරමින් කරන හාස්කම ගැන දැනගත්තේ අතිපූජ්ය අටමස්ථානයේ නායක ස්වාමීන්වහන්සේගේත් මෑණියන් සිහි කැඳවූවාට පසුවය. කාලි පැණිය පූජා කිරීමට ජය සිරි මහා බෝධිය පා මුලට යන්නට බැරි වීම ගැන ප්රකෝප වුණු එතුමා අටමස්ථාන නායක හාමුදරුවන්ට කෑ ගසා කීවේ තමන් කාලි බවය. තමන් නායක හාමුදුරුවන්වහන්සේගෙත් මෑණියන් බවය.
තත්වය එසේය.
දැන් කාලි පැණිය කොවිඩ් උදෙසා උපන් හැටි ගැන කතාව කියන්නේ අප නොවේ. ධම්මික බණ්ඩාර තුමාය. චමුදිත සමරවික්රම සමග විශේෂ සම්මුඛ සාකච්ඡාවක් කරන එතුමා තමන් මෑණියන් වූ හැටි, එතුමාට මේ මහා බල සම්පන්න වරමක් ලැබුණු හැටි, ඒ වරමින් බෙහෙත් කරන හැටි, එතුමා ඉදියේ ජීවමානව කාලි මෑණියන් වැඩ ඉන්න හැටි ගැන කියන්නේය. මේ ඒ හාස්කම් පිරුණු කතාවය. එය ධම්මික බණ්ඩාර තුමාගේ වචනයෙන්ම ලියා තබන විට යහපත්ය. මේ කතාව නොදන්නා අයට දැන ගැනීම සඳහාය.
-
භද්රකාලි මෑණියන්ගෙ වරම
මම පාරම්පරික වෛද්යවරයක් නෙමෙයි. ආයුර්වේද වෛද්යවරයෙකුත් නෙමෙයි. හැබැයි මම කරන්නෙ හෙළ වෙදකම. ඒ වෙදකම කරන්න මට බලය ආවෙ ශ්රී වීර භද්රකාලි මෑණියන්ගෙන් ලැබුණු වරමකින්. තුන්මෝදර, ඇනිවත්ත, හෙට්ටිමුල්ල, කෑගල්ල ලිපිනයෙ ශ්රී වීර භද්රකාලි මෑණියන්ගෙ දේවාලය පවත්වා ගනිමින්, වෙද හෙදකම් කරනවා. ගමේ මම දන්න කියන හැමෝම මට කතා කරන්නෙ මෑණියො කියලා.
-
වරම ලැබුණු කාලය හා ලැබුණු ආකාරය
මට මේ වරම ලැබුණේ 1999 දි. ඒ මෙහෙමයි. ඒ වකවානුවෙදි මම බොහෝම රෝගාතුර වුණා. වෛද්යවරු මට කිව්වෙ මාව ජීවත් කරන්න බැරි වේවි කියලා. මට උනේ හදවතේ ලේ ගමන අඩුවීමක්. ඒ කාලෙ මට නැගිටින්න බෑ. කලන්තෙ දාලා වැටෙනවා. ඒ කාලෙ මට ගොඩක් දෙනෙක් ගොඩක් බෙහෙත් කලා. ඒත් හොඳ කරගන්න බැරිව ගියා.
ඒ දවස්වල මගෙ අම්මා හිටියා. අම්මා මේ ගැන අහන්න දෛවඥයෙක් ලඟට ගියා. එතුමා තමයි හොයාගත්තෙ මට වරමක් තියනවා කියලා. එතුමා අම්මට කිව්වා ලොකු ශාස්ත්රයක්. ඒ ශාස්ත්ර දේශනයේදී ඒ දෛවඥ තුමා කියලා එවලා තිබුණා මේ තියෙන්නෙ ලෙඩක් නෙමෙයි. මේක දේව වරමක්. මේ දේව වරම භාර ගන්න කියලා. වරම දීලා තිබුණෙ ශ්රී මහා කාලි මෑණියො.
එදා ඉඳන් මම මේ වරම ගත්තා. අරන් වරම අනුව බේත් හේත් කරන්න ගත්තා.
-
වරමින් බේත් කරන හැටි
මෙහෙමයි… බේත් කියනකොට ජීවමාන දේව මෑනියන් වැඩ ඉන්නවා. බේත් කියන්නෙ උන්වහන්සෙ. ඒ වෙලාවෙ කරන කියන කිසිම දෙයක් මට මතක නෑ. දන්නෙ නෑ.
අනෙක් වෙලාවට යමක් කරන්න ඕන නම් දේව මෑණියෝ එක මගෙ මතකයට යොමු කරනවා මේ දේවල් කරන්න කියලා.
ධම්මික බණ්ඩාරතුමා රටට බේත් කිව්වේ එසේය. මේ ලියන අපට එතුමා විශ්වාසය. අපනම් මින් මතු කටක් හොල්ලන්නේ නැත. මේ ගනුදෙණුව දෙවියන් සමගය. ඒ නිසා මේ කාලි පැණිය ගැන අහන්නත් එපාය. ඇහුවත් කිසිම දෙයක් කියන්නේත් නැත.
අප දැන් කතා කරන්නේ අර පැණි කෙළියේ සිටි ඇත්තන්ටය. දැන් මේ පැණියට සායනික පරීක්ෂණ කළ , මේ පැණි බ්ව්ව ලොකු ළමයි කෝ… ඉතින් පෝලිමේ එන්න…