ඊයේ (17) හිටපු කැබිනට් මණ්ඩලය සහ ජනාධිපතිවරයා අතර පැවති සාකච්ඡාව මතවාද දෙකක් ඔස්සේ ගොඩනැගුණු දීර්ඝ සාකච්ඡාවකින් අනතුරුව අවසන් තීරණයකින් තොරව නිමා වී තිබේ.
වාර්තාවන පරිදි ජනාධිපතිවරයා හිටපු කැබිනට් මණ්ඩලය කැඳවා ඇත්තේ ඔවුන්ගෙන් වැඩි පිරිසකට කැබිනට් ඇමතිකම් අහිමිවන බවට වූ පණිවිඩය දෙන්නටය. ස්වේච්ඡාවෙන් ඇමතිකම් ප්රතික්ෂේප කරනු ලැබූ කිසිවෙක් නොවූ බවත් බොහෝ දෙනා මේ අවස්ථාවේදීත් ඇමතිකම් නොලැබීම ගැන කලකිරීමකින් සිටි බවත් අභ්යන්තර ආරංචි මාර්ග කියයි.
ඒ තත්වය තුළ ජනාධිපතිවරයා පවසා ඇත්තේ මෙම රැස්වීම කැඳවීමේ මූලික අරමුණ රටේ පවතින තත්වය තුළ රජය ගෙන යෑමට අවශ්ය යෝජනා ලබා ගැනීම බවත් අහිමිවන්නට නියමිත ඇමතිධූර ගැන කලකිරෙන්නේ නැතිව මේ අවස්ථාව ගත කරන ලෙසත් කියන්නටය.
සාකච්ඡාව ආරම්භයේදීම රජය ස්ථාවර තැනකට පැමිණි වහාම හිටපු කැබිනට් මණ්ඩලයේ සියලුදෙනා වෙනුවෙන් සාධාරණයක් ඉටුවනු ඇතිබවට වූ පොරොන්දුව ද ජනාධිපතිවරයා ලබා දී ඇත.
අලුත් මුහුණු ටිකක් රටට ඉදිරිපත් කර ආණ්ඩුව වෙනස් මගක යන බව රටට පෙන්විය යුතු බවත් ඊට සහයෝගය දෙමින් එක්වී ආණ්ඩුව ඉදිරියට ගෙන යමු යන යෝජනාව තමන් ඉදිරිපත් කරන බවත් ජනාධිපතිවරයා හිටපු කැබිනට් මණ්ඩලයට පවසා තිබේ.
මේ අවස්ථාවේ දී පිරිස මතවාදීමය වශයෙන් දෙපාර්ශවයකට බෙදී ඇත. ජොන්ස්ටන් ප්රනාන්දු ප්රමුඛ කණ්ඩායමක් ජනාධිපතිවරයාගේ ප්රවේශය අගය කරමින් පවසා ඇත්තේ ජනාධිපතිවරයා ගත යුතු නිවැරදිම ප්රවේශය ගෙන ඇති බවය. ආණ්ඩුව වැඩකරගෙන යන විට එලියේ ප්රශ්න සමනය වනු ඇති බවට ඔවුන් විශ්වාසය පල කර තිබේ. අවශ්ය වන්නේ තවත් ප්රමාද නොවී තීරණ ගැනීම බව ඔවුන් පවසා ඇත.
එහෙත් ඩලස් අලහප්පෙරුම ඇතුළු මධ්යස්ථ මතධාරී කණ්ඩායමක් මෙන්ම කැබිනට් ඇමතිකම් අහිමිවීමෙන් යම් වේදනාවට පත් වූ පිරිස සහිත වැඩි දෙනෙක් දරා ඇත්තේ වෙනස් මතයක් බව අභ්යන්තර ආරංචි මාර්ග කියයි.
“ඔළුවේ රදයට කොට්ට මාරු කරන්නා සේ“ කැබිනට් මණ්ඩල මාරු කර රටේ ප්රශ්නයට විසඳුමක් සෙවිය නොහැකි බවත් මිනිසුන්ගේ ප්රශ්නටය අපට අලුත් වැඩපිළිවෙළක් අවශ්ය බවත් අප ඉන්නේ මුළු රටම අප ප්රතික්ෂේප කර ඇති අසීරු අවස්ථාවක බවත් එම පිරිස ජනාධිපතිවරයාට පෙන්වා දී ඇත. ආණ්ඩුව නව කැබිනට් මණ්ඩලයත් සමග රටට දෙන අලුත් වැඩපිළිවෙළ කුමක් දැයි එතැනදි විමසීමකට ලක් වී තිබේ.
“කැබිනට් මණ්ඩලයට අලුත් මූණු දාලා විතරක් විසඳුමක් හොයන්න බෑ රටේ ප්රශ්න එතනම නම්. ගෑස් නැති, විදුලිය නැති ඉන්ධන නැති රටක ඒ මූලික ප්රශ්න කැබිනට් මණ්ඩලය අලුත් කළා කියලා විසඳෙන්නෙ නැතිනම් අපි තවදුරටත් අපටම බොරු කරගෙන තේරුමක් නෑ. “
හිටපු ඇමති මණ්ඩලයේ වැඩි දෙනෙක් සිටි මේ අදහස සහ ජනාධිපතිවරයාට විකල්ප මතවාදයක් වෙනුවෙන් සිත යොමු කිරීමේ අවකාශ අහුරන ඔහුගේ හිතෛශීන් කණ්ඩායම ඉදිරිපත් කළ අදහස අතර රට ඉදිරියට ගෙන යෑමේ නිශ්චිත තීරණයකින් තොරව ඊයේ සාකච්ඡාව නිමා වී ඇතැයි පැවසේ.
කෙසේ වෙතතත් අද කැබිනට් මණ්ඩලයේ 16 දෙනෙක් පමණ දිවුරුම් දෙනු ඇති බවත් කැබිනට් ඇමති තනතුරු 10ක් පුරප්පාඩු කර ගෙන 20 දෙනෙකුගෙන් යුතු කැබිනට් මණ්ඩලයකින් අද සිට රජය වැඩ ආරම්භ කරනු ඇති බවත් අභ්යන්තර ආරංචි මාර්ග කියයි.
ජාත්යාන්තර මූල්ය අරමුදල සමග කෙරෙන සාකච්ඡාවට පසුබිමක් ලබා ගැනීම සඳහා ප්රධාන වශයෙන්ම මෙම කැබිනට් මණ්ඩලය දිවුරුම් දෙනු ඇති බව ද ප්රකාශිතය.
මේ අතර රජයට එරෙහි විශ්වාසභංගය 19 වැනිදා පසුවී පාර්ලිමේන්තුවට ඉදිරිපත් කරන ලෙස ජාත්යාන්තර මූල්ය අරමුදල සමග සාකච්ඡා කරන විද්වත් කණ්ඩායම විපක්ෂයෙන් ඉල්ලා ඇත.
ඒ අනුව ලබන සතියේ දී විශ්වාසභංගය පාර්ලිමේන්තුවට ඉදිරිපත් නොවනු ඇතැයි ද පැවසේ.
