මනම්පිටිය නිමල් ජයරත්න –
වැලිකන්ද කොට්ඨාසයේ ගම්මාන රැසකට පවතින අලි මිනිස් ගැටුමට විසඳුම් ඉල්ලා අද (13) රුහුණුකෙත සහ මොනරතැන්න ගොවි සංවිධාන නියෝජිතයින් සහ ගම්වාසීන් පොළොන්නරුව මඩකලපුව ප්රධාන මාර්ගය වැලිකන්ද මොණරතැන්න ප්රදේශයෙන් අවහිර කරමින් පැය දෙකකට ආසන්න කාලයක් විරෝධතාවයක නිරත වූහ.
මොනරතැන්න සහ රුහුණුකෙත ගොවි සංවිධාන නියෝජිතයින්, ගොවින්, ගම්වාසීන්, තරුණයන්, මෙන්ම දරුවන් ප්රධාන මාර්ගයේ බිම වාඩි වී පැය දෙකකට අසන්න කාලයක් සිදුකළ මෙම විරෝධතාවය හේතුවෙන් පොළොන්නරුව මඩකලපුව ප්රධාන මාර්ගයේ වාහන ගමනාගමනයට බාධා එල්ලූ අතර දැඩි වාහන තදබදයක් ද ඇති විය.
තමන් දුක් මහන්සියෙන් වගා කරන ලද ගොවිතැන් මෙන්ම පැළ ගොයම් වන රංචුපිටින් පැමිණ විනාශ කරන බවත්, සතියකට පෙර තම ගම්මානයේ ත්රීරෝද රථයකට සහ ගොවියකුට පහර දීමෙන් දැඩි විනාශයක් සිදුකළ බවත්, මාදුරුඔය සහ සෝමාවතීය ජාතික වනෝද්යානයෙන් ගම්වදින වන අලි ප්රදේශයේ පාළු ඉඩම්වල සැඟව සිට දිවා මෙන්ම රාත්රී කාලයේ තම භවභෝග විනාශ කරන බවත් විරෝධකරුවෝ මෙහිදී සඳහන් කළහ.
ගම්මානවලට එල්ල වී තිබෙන වන අලි තර්ජනයට අලි වැටක් සකසා ස්ථිර විසඳුමක් ලබාදීමට බලධාරීන් පැමිණ පොරොන්දුවක් ලබාදෙන තෙක් විරෝධතාවය අඛණ්ඩව සිදුකරන බවද සේනපුර කොට්ඨාස ගොවි සංවිධාන සභාපති කපිල සිරිල් පතිරණ මෙහිදී සඳහන් කළේය.
වැලිකන්ද පොලිස් ස්ථානාධිපති පොලිස් පරීක්ෂක සමන්ත රත්නායක ඇතුළු පොලිස් නිලධාරී කණ්ඩායමක් මෙම අවස්ථාවට පැමිණ ප්රධාන මාර්ගය අවහිර නොකර විරෝධතාවය සාමකාමීව සිදුකරන ලෙසටත්, තමන් වනජීවීන් නිලධාරි බලධාරියකු විරෝධතාවය අවස්ථාවට ගෙන්වා අලි මිනිස් ගැටුමට ස්ථිර විසඳුමක් ලබාදීමට මැදිහත් වන බවටත් දන්වා සිටියේය.
පසුව වැලිකන්ද පොලිස් ස්ථානාධිපති සමන්ත රත්නායක හරහා මේ පිළිබඳව වැලිකන්ද ප්රාදේශීය ලේකම්වරිය සහ ශ්රී ලංකා මහවැලි අධිකාරියේ මහවැලි බී කලාපීය නේවාසික ව්යාපාර කළමනාකාරවරයා සහ වනජීවී නිලධාරි කණ්ඩායමක් සමග සම්බන්ධ විය.
පසුව විරෝධතා ස්ථානයට වැලිකන්ද ප්රාදේශීය ලේකම් හයිරුන් නිශා, මහවැලි බී කලාපීය නේවාසික ව්යාපාර කළමණාකාර සුගත් වීරසිංහ, වැලිකන්ද ප්රදේශය භාර සහකාර පොලිස් අධිකාරි සුදත් අස්මඩල, මෙන්ම වනජීවී නිලධාරීන් පිරිසක් පැමිණයහ.
අනතුරුව අලි මිනිස් ගැටුමට පැය විසිහතරක් ඇතුළත සාකච්ඡාවක් සිදුකර විසඳුමක් ලබාදෙන බවට දුන් පොරොන්දුවක් සමග විරෝධතාකරුවෝ විසිර ගියහ.
