දිගින් දිගටම පරාජයන් වැලකට මුහුණ දී සිටින ශ්රී ලංකා ක්රිකට් ක්රීඩකයන්ගේ වාර්ෂික කොන්ත්රාත් ගාස්තු මෙන්ම තරග මුදල් ද ඉදිරියේදී අඩු කිරීමට ශ්රී ලංකා ක්රිකට් තීරණය කර තිබේ.
ඒ අනුව ජයග්රහණයේ දී වැඩි මුදලකුත් දක්ෂතාවට වැඩි මුදලකුත් ලැබෙන ක්රමවේදක් සකස් කිරීමට ශ්රී ලංකා ක්රිකට් තීරණය කර ඇත.
පසුගියදා ක්රීඩා අමාත්ය නාමල් රාජපක්ෂ සහ ක්රිකට් ප්රධානීන් අතර පැවැති විශේෂ සාකච්ඡාවක දී තරග පරාජය වීම සම්බන්ධයෙන් සහ ක්රීඩකයන් විනය සම්බන්ධයෙන්ද දැඩි අවධානයක් යොමු කර තිබේ. එහි දී ක්රීඩා අමාත්යවරයා විසින් පරිපාලනය සම්බන්ධයෙන් ගත යුතු ක්රියාමාර්ගද සාකච්ඡාවට බඳුන් කර ඇත.
ක්රිකට් ක්රීඩකයන්ගේ කොන්ත්රාත්තු වෙනුවෙන් ශ්රී ලංකා ක්රිකට් ආයතනය විශාල පිරිවැයක් ගෙවනු ලබයි. ඒ අනූව ඇමරිකානු ඩොලර් කෝටියකට අධික මුදල් ඉකුත් වසරේ කොන්ත්රාත් ගත ක්රීඩකයන් වෙනුවෙන් ශ්රී ලංකා ක්රිකට් වැය කර තිබේ. අදාළ මුදල් ලබා දුන්නද ඔවුන්ගේ දක්ෂතා මොට වීම සම්බන්ධයෙන් දැඩි ලෙස සාකච්ඡාවට බඳුන්ව තිබේ.
“ඉදිරියේදී දැඩි තීන්දු රැසක් ගැනීමට නියමිතයි. ක්රිකට් ආයතනය විදිහට අපි ක්රීඩකයන් වෙනුවෙන් කළ යුතු සෑම දෙයක්ම සිදුකරනවා. ඔවුන්ට අවශ්ය පුහුණුවීම් මෙන්ම ශාරීරික යෝග්යතා පවත්වාගෙන යෑමටත් ගොඩක් පහසුකම් ලබා දීලා තියෙනවා. එහෙම කරලත් මේ අයට තරග දිනන්න බැරිනම් අපි ඒ ගැන විශේෂ අවධානයක් යොමු කරනවා.
කොරෝනා කාලයේදීත් ඔවුන් කිසිම පුහුණුවක් නැතිව හිටියත් අපි කොන්ත්රාත් ගාස්තු අඩු කරන්නෙ නැතිව ගෙවනවා. නමුත් ක්රීඩකයන් ඔවුන්ගේ යුතුකම ඉටු කරන්නේ නැහැ. ඔවුන් පරදින විට බැනුම් අහන්නේ පරිපාලනය. යැයි ශ්රී ලංකා ක්රිකට් ප්රධානියකු පවසා සිටියේය.
ශ්රී ලංකා ක්රිකට් සමග කොන්ත්රාත් ගත ක්රීඩකයන් සංඛ්යාව සියයකට ආසන්නව සිටියි. ප්රධාන වශයෙන්ම කොන්ත්රාත් ගත ක්රීඩකයන් සංඛ්යාව 30 කි. එම ක්රීඩකයන්ව ‘ඒ’, ‘බී’, ‘සී’ සහ‘ඩී’ යන කාණ්ඩවලට අයත් කර ඇත. ඒ අනුව ඒ කාණ්ඩයට ඇන්ජලෝ මැතිව්ස්, දිමුත් කරුණාරත්න සහ දිනේෂ් චන්දිමාල් යන ක්රීඩයන් ඇතුළත්ව තිබේ.
