ඊයේ (20) තෙලිජ්ජවිල මංසන්ධියේ පිහිටි ජංගම දුරකථන උපාංග අලෙවිසලක දී සිදුවූ ඝාතනය වැරදීමකින් සිදුවූවක් බවත්, එසේ වෙඩි තබා ඝාතනය කළ මින්දික අලුත්ගමගේ 22 හැවිරිදි අහිංසක තරුණයෙක් බවත් පොලිස් විමර්ශන ඔස්සේ හෙළි වී තිබේ.
වාර්තාවන පරිදි සිද්ධිය මෙසේය.
අවාසනාවන්ත ලෙස ඝාතනය වූ මින්දික ඇඟලුම් කර්මාන්ත ශාලාවක වැඩ පරීක්ෂකවරයෙක් ලෙස කටයුතු කරන නොබෝ දිනකින් කොරියාවේ රැකියාවක් සඳහා පිටත් වීමට සැලසුම් කර සිටි තරුණයෙකි.
ඔහු සිය සමීප මිතුරෙක් වූ ජංගම දුරකථන අලෙවිසලක් හිමි තරුණයෙකුගේ අලෙවිසලට පැමිණ සිටි අවස්ථාවේ දී අලෙවිසල හිමි තරුණයා හමුවීමට තවත් මිතුරන් දෙදෙනෙක් පැමිණ ඇත. ඒ අවස්ථාවේ දී අලෙවිසල හිමි තරුණයා එළියට ගොස් එම මිතුරන් සමග කතා කරමින් සිටිය දී මින්දික අලෙවිසලේ මුදල් අයකැමි පුටුවේ වාඩිවී හිඳ තිබේ.
ඒ අවස්ථාවේ දී ෆයිල් කවරයක් සහිතව පැමිණි පුද්ගලයෙක් ඡායා පිටපතක් ලබා ගත හැකි දැයි මුදල් අයකැමි පුටුවේ ඉඳගෙන සිටි මින්දිකගෙන් විමසා ඇත. ඔහු පවසා ඇත්තේ ඡායා පිටපත් ලබා ගැනීමේ පහසුකම් නොමැති බවත්, නුදුරෙහි එම පහසුකම් සහිත ස්ථානයක් ඇති බවත්ය.
එම අවස්ථාවේ දී අලෙවිසලෙන් පිටව ගිය මෙම පුද්ගලයා ඒ සමගම විත් මින්දික ඉලක්ක කරගෙන වෙඩි ගණනාවක් තබා තමන් සමග පැමිණි යතුරුපැදි කරු සමග පලා ගොස් ඇත.
කිසිම අපරාධ ඉතිහාසයක් නැති මෙම අහිංසක තරුණයා ඝාතනය කිරීම සම්බන්ධව විමර්ශන කරන අවස්ථාවේ දී හෙළි දරවු වී ඇත්තේ ඝාතනය ඉලක්කය ඔහු නොව මෙම දුරකථන අලෙවිසලේ හිමිකාර තරුණයා බවය.
දැනට හෙළි වී ඇති තොරතුරු අනුව ඉලක්කය වූ වෙළඳසල හිමි තරුණයා වෙළෙඳසලෙන් පිටත සිටි අවස්ථාවේ ඔහු යැයි වරදවා වටහාගෙන මින්දික ඝාතනය කර ඇත.
සැබෑ ඉලක්කය වූ දුරකථන අලෙවිසල හිමිකරු සම්බන්ධව ද වාර්තාවන අපරාධ ඉතිහාසයක් නැති බව ද පෙනී ගොස් ඇතත් ඒ සම්බන්ධව දැඩි අවධානයකින් යුතුව විමර්ශන කිරීමට විමර්ශන අංශ කටයුතු කර තිබේ.
යුක්තිය මෙහෙයුම යන අතර තුර පාතාලය සම්බන්ධව සිදුවන ඝාතන වැලක එක් සිදුවීමක් ලෙස මෙම තරුණයාගේ ඝාතනය සටහන් වී තිබේ.
යුක්තිය මෙහෙයුම ආරම්භක අවස්ථවේ සිට ගතවූ මාසයක කාලයය තුළ හංවැල්ලේ පුද්ගලයින් දෙදෙනෙක් පාතාලය ඝාතකයන් විසින් මරා දැම්මේය.
වැල්ලම්පිටියේ සේදවත්තේ දී ග්රැන්ඩ්පාස් පොලිසියට ඔත්තු දුන් බවට සැක කර තවත් පුද්ගලයෙක් පාතාල වෙඩික්කරුවන්ට ගොදුරු විය.
කුරුණෑගල පොලිසියට ගංජා සම්බන්ධ ඔත්තුවක් දුන් බවට සැ ක කර ජාවාරම්කරුවෙකුගේ පිහි පහරට ලක්ව පුද්ගලයෙක් මිය ගියත් එය පුද්ගලික ආරවුලක් ලෙස සටහන් වීම නිසා සිද්ධියේ ඇතුලාන්තය හෙළි වූයේ නැත.
කෙසෙල්වත්තේ පොඩි කවී ඝාතනය සඳහා ඔත්තු බැලූ බව කී පුද්ගලයෙක් කෙසෙල්වත්තේ දි කපා කොටා ඝාතනය කළත් එම ඝාතනය ද පුද්ගලික ආරවුල්වල ගිනුමට බැර වී තිබිණි. පසුගිය දා කංජිපානි ඉම්රාන්ගේ මෙහෙයවීම යට රන්දිය උයනේ දී බඩා රන්ජි නැමැත්තා ඝාතනය විය.
මෙම ඝාතන සිදුවන්නේ යුක්තිය මෙහෙයුම දියත්වන අතරේය.
