ආශ්චර්යමත් තරගයක්… ඉන්දියාව අවසන් පන්දුවේදී පකිස්ථානුවන් පරදවයි…

එය ක්‍රිකට් ආශ්චර්යය පිරී ඉතිරී ගිය තරගයකි. ජයග්‍රහණය අහලකවත් නොබුණ බව පෙනුන ඉන්දියාව තරගයේ අවසාන පන්දුවේ දී පකිස්ථානය පරදවා ජය ගත්තේය.

විස්සයි 20 ලෝක කුසලාන තරගාවලියේ උණුසුම්ම තරගය ලෙස සැලකෙන පකිස්ථාන ඉන්දියා තරගය  මෙල්බර්න්හි දි ක්‍රීඩාගාර පිරී ඉතිරී යන ක්‍රීඩා ලෝලී ප්‍රේක්ෂක පිරිසක් මැද මීට ස්වල්ප වෙලාවකට පෙර නිමා වූයේ එසේය.

ක්‍රිකට් ලෝකය රංජනය කරන විශිෂ්ට පිතිකරුවා විරාට් කෝලි අවශ්‍යම වෙලාවේ දී සිය අග්‍රේසර පිති හරඹය දියත් කළේය. ඒ පන්දු 53ක දී නොදැවී ලකුණු 82ක් ලබමිනි.

කාසියේ වාසිය දිනූ ඉන්දියානු කණ්ඩායම මුලින්ම පන්දු රැකීම තේරුවේය. මුලින්ම පන්දුවට පහර දුන්  පකිස්ථානයෙන් ඉන්දියාවට ලකුණු 160ක ඉලක්කයක් ලැබී තිබිණි. පකිස්ථානය කඩුළු 08කට ලකුණු 159ක් රැස් කළේය.

ඉන්දීය ඉනිම ආරම්භ වී ටික වෙලාවක් යද්දී ජයග්‍රහණය පකිස්ථානුවන්ට දෝලනය විය.  ඉන්දියාව සිටියේ ජයග්‍රහණයට බොහෝ දුරිනි.

පවර් ප්ලේ අවස්ථාවේ දී ලකුණු 26කට ඉන්දීය කඩුළු 03ක් බිඳ වැටී තිබිණි. කේ.එල් රාහුල් ලකුණු 04කට, නායක රෝහිත් ෂර්මා ලකුණු 04කට, සූරිය කුමාර් යාදේව් ලකුණු 15කට දැවී යන විට පන්දු ඕවර 5.3කි  .  මුලු ලකුණු සංඛ්‍යාව 26කි.

ඇක්සාර් පටෙල් ලකුණු 02ට දුවද්දී දැවී ගියේය. පන්දු ඕවර 6.1 වෙද්දී ලකුණු 31 කඩුළු 4කි.

මේ අවස්ථාවේ දී  සුපිරි ක්‍රීඩක විරාට් කොලි සහ හර්ඩික් පාන්ඩ්‍යා ලකුණු 111 සහිත  මනරම් ඉනිමක් පස්වන කඩුල්ල වෙනුවෙන් ගොඩනැගූහ.

මේ තරගය දුටු විශේෂත්වය වූයේ පන්දු ඕවර 17ක් වන විට ඉන්දියාව ලබා ගත්තේ කඩුළු 04කට ලකුණු සංඛ්‍යාව 112ක් පමණක් වීමය.

පන්දු 18ක් තුළ  ලකුණු 48ක් ලබා ගත යුතු විය. තරගය ඉන්දියාවට දෝලනය වන්නේ 18 වන පන්දු ඕවරයේ අවසන් පන්දු දෙකෙනි. තරගයේ ඉන්දියානු රිද්මය මුලුමනින්නම තමන් අතට ගෙන අධික වේගයෙන් නිවැරදි එල්ලයට  පන්දු යවමින් සිටි හරිස් රවුෆ්ගේ අවසන් පන්දු ඕවරයේ අවසන් පන්දු දෙක හයේ පහර දෙකකින් නිමා කිරීමට විරාට් කෝලි සමත් විය.

අවසන් පන්දු ඕවරය පැමිණියේය. පන්දු ඕවරයට ජයග්‍රහණය සඳහා ඉන්දියාවට  ලකුණු 16ක් අවශ්‍යය.  බබාර් අසාම් විශ්වාසය තැබුවේ වමතින් ඕතඩොක්   පන්දු යවන ක්‍රීඩක  මොහොමඩ් නවාස් කෙරෙහිය.

නවාස් ගේ මුල්ම පන්දුවෙන් හර්දික් පාණ්ඩ්‍යා දැවී ගියේය. ඒ වනවිට ලකුණු 144කි. පන්දු 05ක දී ලකුණු 16ක් අවශ්‍යය. අනතුරුව නවාස්ගේ රිද්මය බිඳී ගියේය. තරගයේ අවසන් ඕවරයේ සිව්වන පන්දුව  නිපන්දුවකි. ෆුල්ටොස් පන්දුවක් ලෙස පැමිණි එම නිපන්දුවට  කෝලි පිළිතුරු දුන්නේ දැවැන්ත හයේ පහරකිනි.  ඊලඟ පන්දුව වයිඩ් පන්දුවකි.     අනතුරුව එළඹි  ෆ්‍රී හිට් අවස්ථාවේ දී කෝලිගේ කඩුල්ලේ දැවටුන පන්දුව හතරේ සීමාව තෙක් ඇදී යද්දී පිතිකරුවො ලකුණු 03ක් සඳහා පැති මාරු කරගත්හ.

අනතුරුව පස්වන පන්දුවේ දී  දිනේෂ් කාර්තික් දැවී ගියේය. අවසාන ඉලක්කය එක් පන්දුවකට ජයග්‍රහණය සඳහා ලකුණු 02කි. මේ තීරණාත්මක අවස්ථාවේ දී  පන්දු යවන නවාස් තවත් වයිඩ් පන්දුවක් අතහැරියේය.

අවසානයේ දී තරගයේ  අවසන් පන්දුවට එක් ලකුණක් ලබා ගත යුතුව තිබිණි.

හයවන කඩුල්ල ලෙස පන්දුවට පහර දෙමින් සිටි අශ්වින් ඒ ලකුණ ලබා ගත්තේය. ඉන්දියාව කඩුළු 04ක ජයක් වාර්තා කළේය. තරගයේ වීරයා විරාට් කෝලිය.

පකිස්තානු ඉනිම

පකිස්තානු ආරම්භක පිතිකරුවන් වූ  ලකුණු අතර සිටින පකිස්ථානු ප්‍රහාරකයා මොහොමඩ් රිස්වාන් මෙන්ම නායක බබාර් අසාම් මුලු ලකුණු සංඛ්‍යාව 15ක් තුළ   තුළ පිටියෙන් ඉවත් විය.   රිස්වාන් ලබා ගත්තේ ලකුණු 04කටත්, නායක බබාර් අසාම් ලකුණු නොලබාත් පිටියෙන් ඉවත් කිරීමට අශ්දීප් සිං සමත් වූයේය.

එහෙත් පකිස්ථානයේ තුන්වෙනි කඩුල්ල වෙනුවෙන් ශාන් මසූඩ් සහ ඉෆ්ටිඛාර් අහමඩ් අතර ඇතිවූයේ විශිෂ්ට සම්බන්ධතාවයකි. එය ලකුණු 76ක් විය. අහමඩ් පන්දු 34කදී වේගවත් ලකුණු 51ක් ලබා ගන්නේ හයේ පහර 04ක් සහ හතරේ පහර 02ක් සමගිනි.

ශාන් මසූඩ්  නොදැවී 52ක් ලබමින් එක් අන්තයක් ආරක්ෂා කළත් ඉන් අනතුරුව පැමිණි කිසිම ක්‍රීඩකයෙකුට ලකුණු අතරට පැමිනීමට ඉන්දීය පන්දු යවන්නන් ඉඩ දුන්නේ නැත. 8වන කඩුල්ල ලෙස පිටියට පැමිණි ශහීන් ෂා  ඇෆ්රිඩි පන්දු 8ක් දී ලකුණු 16ක් ලැබුවේය. පකිස්තානු කණ්ඩාම ලකුණු 159ක් ලබා ගත්තේය. ඒ කඩුළු 08ක් දැවී යෑමෙනි.

ඉන්දියාව වෙනුවෙන් හර්දික් පාණ්ඩ්‍යා ලකුණු 03කට කඩුළු 03ක්, අශ්දීප් සිං ලකුණු 32කට කඩුළු 03ක් ලැබූහ.  බුවනේෂ් කුමාර් ලකුණු 22කට කඩුල්ලක්, මොහමඩ් සාමි ලකුණු 25කට කඩුල්ලක් ලැබූහ. මේ පන්දු යවන්නන් සිව් දෙනාම සිය පන්දු ඕවර 04 සම්පූර්ණ කළහ.

ක්‍රිකට් ක්‍රීඩාවේ ආශ්වාදය මෙයය. ඒ අසිරිය අද මෙල්බර්න්වලදී ක්‍රිකට් ලෝකය අත්වින්දේය.