ශ්රී ලංකා කෙල්ලෝ ක්රිකට් ආසියානු කුසලාන ඉතිහාසය වෙනස් කරමින් සිටිති. මේ වනවිට ශ්රී ලංකා කාන්තා ක්රිකට් කණ්ඩායම ආසියානු කුසලාන විස්සයි 20 කාන්තා අවසන් මහා තරගය පිවිසීමේ වරම් හිමි කරගෙන ඇත.
තියුණු තරගයකින් අනතුරුව පාකිස්තානු කාන්තා කණ්ඩායම පරාජය කරමින් ඔවුහු දෙවන අවසන් පූර්ව තරගය ජයගත්හ.
කාන්තා ආසියානු කුසලාන ක්රිකට් තරගාවලියක අවසන් මහා තරගයට ශ්රී ලංකාව පිවිසෙන්නේ වසර 14කට පසුවය.
තරගයේ කාසිය වාසිය දිනුවේ ශ්රී ලංකා කණ්ඩායමය. ශ්රී ලංකා ක්රීඩිකාවේ පන්දු වාර 20 අවසන කඩුළු 06ක් දැවී ලකුණු 122ක් ලැබූහ.
ශ්රී ලංකා පිල වෙනුවෙන් ස්ථාවර ඉනිමක් ක්රීඩා කළේ හර්ෂිතා සමරවික්රමය. හර්ෂිතා පන්දු 41ක් තුළ ලකුණු 35ක් ලැබුවාය. ඊට එක් හතරේ පහරක් එක් විය. ශ්රී ලංකා පිල වෙනුවෙන් අනුෂ්කා සංජීවනී පන්දු 22ක් තුළ වේගවත් ලකුණු 26ක් එක් කළාය. ඊට එක් හතරේ පහරක් සහ එක් හයේ පහරක් ඇතුළත් විය.
පකිස්තානය වෙනුවෙන් නුෂ්රා සන්ධු පන්දු ඕවර 4 තුළ ලකුණු 17කට කඩුළු 03ක් ලැබුවාය.
පිළිතුරු ඉනිම ක්රීඩා කළ පකිස්ථානය තියුණු සටනකට අවතීර්ණ වී සිටියේය. පකිස්තානය වෙනුවෙන් අගනා ඉනිමක් ක්රීඩා කරමින් කණ්ඩායමේ බලාපොරොත්තු දැල්වූ පකිස්තානු නායිකා බිස්මා මහරූෆ් තරගයේ උද්වේගකර අවස්ථාව නිර්මාණය කළාය. ඇය පන්දු 41 තුළ හතරේ පහර 4ක් සමගින් ලකුණු 42ක් ලැබුවාය. පකිස්ථානයේ ජයග්රහණ බලාපොරොත්තුව ඇය වටා අවසන් මොහොත වනතුරු දැල්වෙමින් පැවතිනි. නිදා දාර් පාකිස්තානය වෙනුවෙන් ලකුණු 26ක් රැස් කරමින් ජයග්රහණයේ බලාපොරොත්තු ඉහළ නැන්වූවාය.
එහෙත් ශ්රී ලංකා කණ්ඩායමේ පිටියේ පන්දු රැකීම කැපී පෙනුනේය. පකිස්තානු කණ්ඩායමේ දුවද්දී දැවී යෑම් දෙක්ක වාර්තා කරගැනීමට ශ්රී ලංකා ක්රීඩිකාවෝ සමත් වූහ.
තරගයේ හැරවුම් ලක්ෂය වූයේ බිස්මා දැවී යෑමය. පන්දු ඕවර 17.2 දී ඇය දැවී යනවිට ලකුණු 107ක් කණ්ඩායම ලබාගෙන තිබිණි. අනතුරුව නීදා දාර් වගකීම සිය අතට ගෙන කණ්ඩායම ජයග්රහණය තෙක් මෙහෙයවීමේ වගකීම සිය උරට ගත්තාය. එහෙත් ඉන්මේ අවසාන පන්දුවේ දී ඇය දුවද්දී දවා ගැනීමටකට හසු කරගැනීමට ශ්රී ලංකා ක්රීඩිකාවෝ සමත් වූහ.
එම දැවී යෑමත් සමග එක් ලකුණක තියුණු ජයග්රහණයක් අත් කරගැනීමට ශ්රී ලංකා කණ්ඩායම සමත් විය.
පන්දු යැවීමේ දී ඉනෝකා රණවීර ලකුණු 17කට කඩුළු 02ක් ලැබුවාය. සුගන්ධිකා කුමාරි සහ කවීෂා දිල්හාරි එක කඩුල්ල බැගින් ලැබූහ.
ඉනෝකා රණවීර තරගයේ ක්රීඩිකාව බවට පත්වූවාය.
