ශ්රියානි විජේසිංහ –
කොළඹ නාරාහේන්පිට ප්රදේශයේ පෞද්ගලික හෝටලයක පැවති පුහුණු වැඩමුළුවකට සහභාගී වූ රජයේ වෛද්යවරියන් පිරිසක් ඔවුන්ගේ නාන කාමරවල රැඳී සිටියදී තරුණයින් දෙදෙනෙකු විසින් වීඩියෝ ගත කිරීමේ සිද්ධියක් සම්බන්ධයෙන් රජයේ වෛද්ය නිලධාරීන්ගේ සංගමය (GMOA) සෞඛ්ය අමාත්යාංශයට ලිඛිතව දන්වා තිබේ.
එම සංගමයේ මාධ්ය ප්රකාශක වෛද්ය චමිල් විජේසිංහ පෙන්වා දෙන්නේ, සෞඛ්ය අමාත්යාංශය විසින් සංවිධානය කරන ලද වැඩමුළුවකට සහභාගී වූ වෛද්යවරුන්ගේ ආරක්ෂාව තහවුරු කිරීමට අමාත්යාංශය අපොහොසත් වීම බරපතල තත්ත්වයක් බවය.
ආරෝග්යා මධ්යස්ථාන වෙත අනුයුක්ත කිරීමට නියමිතව සිටි වෛද්යවරුන් සහ වෛද්යවරියන් 17 දෙනෙකු වෙනුවෙන් නාරාහේන්පිට පෞද්ගලික හෝටලයක පසුගිය අඟහරුවාදා මෙම නේවාසික පුහුණු වැඩමුළුව සංවිධානය කර තිබුණි.
එදින රාත්රියේ වෛද්යවරියන් නාන කාමරවල රැඳී සිටින අවස්ථාවේදී තරුණයින් දෙදෙනෙකු විසින් ඔවුන්ව රහසිගතව වීඩියෝ ගත කර ඇති අතර, පසුව කළ සොයා බැලීම් වලදී හෙළි වී ඇත්තේ අදාළ තරුණයින් දෙදෙනා එම හෝටලයේම නවාතැන් ගෙන සිටි වයස අවුරුදු 19න් පහළ ජාතික ක්රිකට් කණ්ඩායම නියෝජනය කරන ක්රීඩකයින් දෙදෙනෙකු බවය.
මෙම අපරාධමය සිද්ධිය සම්බන්ධයෙන් කටයුතු කිරීමේදී සෞඛ්ය අමාත්යාංශය අනුගමනය කරන උදාසීන සහ මන්දගාමී පිළිවෙත වෛද්ය චමිල් විජේසිංහගේ දැඩි දෝෂදර්ශනයට ලක් විය.
“වැඩමුළුවකට ආ වෛද්යවරුන්ගේ ආරක්ෂාව බලාගන්න බැරි සෞඛ්ය අමාත්යාංශය, මුළු රටේම රෝහල් පද්ධතියේ ආරක්ෂාව සහ ඖෂධ ගැටලු විසඳයි කියලා අපි විශ්වාස කරන්නේ කොහොමද?” යනුවෙන් ඔහු ප්රශ්න කර සිටියි.
අදාළ තරුණයින් සම්බන්ධයෙන් ඔවුන් අධ්යාපනය ලබන පාසල්, අධ්යාපන අමාත්යාංශය, ක්රීඩා අමාත්යාංශය සහ පාසල් ක්රීඩා සංගම් වහාම දැඩි ලෙස ක්රියාත්මක විය යුතු බව රජයේ වෛද්ය නිලධාරීන්ගේ සංගමය වැඩිදුරටත් අවධාරණය කරයි.
පද්ධතියේ පවතින මෙවැනි බරපතල ගැටලු මගහැර යාමට උත්සාහ නොකර වහාම වගකිවයුත්තන්ට එරෙහිව නීතිය ක්රියාත්මක කරන ලෙස සංගමය බලකර සිටියි.
කෙසේ වෙතත් මෙම සිද්ධිය ගැන පිමිණිල්ලක් ලද වහාම ඒ සම්බන්ධයෙන් ක්රියාත්මක වූ නාරාහේන්පිට පොලිසිය විසින් අදාළ සැකකාර තරුණයින් දෙදෙනා අත්අඩංගුවට ගෙන තිබේ. ඔවුන් දෙදෙනා සිය ජංගම දුරකථන ආධාරයෙන් රහසිගතව දර්ශන රූගත කිරීමට ඔවුන් උත්සාහ කර ඇති බව පොලිසිය විසින් හෝටලයේ සීසීටීවී. දර්ශන පරීක්ෂාවෙන් අනාවරණය කරගෙන තිබේ. මෙම තරුණයින් පිරිමි පුද්ගලයින්ගේ නිරුවත් දර්ශන ද මෙලෙස රූගත කර ඇති බවට සැකයක් පවතින බව වාර්තා වේ.
අත්අඩංගුවට ගත් සැකකරුවන් දෙදෙනා අලුත්කඩේ මහේස්ත්රාත් අධිකරණයට ඉදිරිපත් කිරීමෙන් අනතුරුව, රුපියල් ලක්ෂ 5 බැගින් වූ පුද්ගලික ඇප මත මුදා හැරීමට අධිකරණය නියෝග කර ඇත.
සැකකරුවන් විසින් රූගත කරන ලද වීඩියෝ දර්ශන කිසියම් ආකාරයකින් අන්තර්ජාලය වෙත මුදාහැර තිබේද නැතහොත් වෙනත් පාර්ශවයන් සමඟ හුවමාරු කරගෙන තිබේද යන්න සම්බන්ධයෙන් පොලිසිය දැනටමත් විශේෂ විද්යාත්මක පරීක්ෂණයක් ආරම්භ කර තිබේ.
