දිනසේන රතුගමගේ –
යාපනයේ අල ගොවීන්ට ලබා දීම පිණිස රැගෙන එන ලද බීජ අර්තාපල් මෙට්රික් ටොන් 21 ක ප්රමාණයකට දිලීර රෝගයක් වැළදීම නිසා එම බීජ අල තොගය වළදමා විනාශ කිරීමට තීරණය කොට තිබේ.
යාපනයේ කෘෂිකර්ම නිලධාරීන් හා ගොවි සංවිධාන නියෝජිතයින් විසින් පවත්වන ලද විශේෂ සාකච්ඡාවකදී ඊයේ (31) මෙම තීරණය ගෙන තිබේ. 
ලෝක බැංකු ආධාර ක්රමයක් යටතේ බීජ අර්තාපල් මෙට්රික් ටොන් 21 ක් ඔස්ට්රේලියානු සමාගමකින් ආනයනය කොට යාපනයේ අර්තාපල් වගා කරන ගොවීන් වෙත බෙදා හැරීමට පියවර ගෙන තිබුණි.
එම බීජ අර්තාපල් තොගය යාපනයේ කුප්පිලාන් ප්රදේශයේ කෘෂි සේවා මධ්යස්ථානයක ගබඩා කොට පසුව කළ පරීක්ෂා කිරීමකදී බීජ අර්තාපල් තොගයට දිලීර රෝගයක් වැළදී ඇති බව තහවුරු වුණි.
මෙම බීජ අර්තාපල් තොගයට Pectobacterium keratophorum නම් බැක්ටීරියාවේ බලපෑම නිසා නරක් වී ඇති බව කෘෂිකර්ම නිලධාරීන් විසින් තහවුරු කරගෙන තිබේ.
මේ නිසා එම බීජ අල තොගය ගොවීන් අතට පත් නොකොට විනාශ කොට දැමීමට තීරණය කොට ඇත.
අඩි තුනක වළක් හාරා එම බීජ අල වළ දමා අල මතුපිටට භූමිතෙල් වත්කොට ගිණි තබා පස් දමා වළ වැසීමට තීරණය වූ අතර විනාශ කිරීමට ස්ථානයක් හඳුනා ගැනීම මේ සතියේදී සිදු කිරීමටද නියමිතය.
