හිඳගල රජමහා විහාරයේ වැඩ වාසය කරන 17 හැවිරිදි හිමිනමකට නන්නාඳුනන පුද්ගලයෙක් විහාර පරිශ්රයේ දී බලහත්කාරයෙන් වස පෙවීම දැන් උභතෝකෝටිකයකි.
හිමි නමට වස පොවා පැසිටමෝල් පෙති දෙක්ක ද පෙවූ බව කියන මේ සිද්ධියට සම්බන්ධව පරීක්ෂණ පවත්වන පේරාදෙණිය පොලීසියට කිසිදු වැදගත් හෝඩුවාවක් සොයා ගැනීමට මේ වනතුරුත් නොහැකි වී ඇත.
මේ වනවිට මේ තරුණ හිමි නමට වස පෙව්වා ද, වස බිව්වා ද නැතිනම් මේ තරුණ හිමියන් කරන්නේ රංගනයක් ද යන්න ද පැහැදිලි නැත. මක්නිසාද යත් දැනගන්නට ඇති ආකාරයට වෛද්ය වාර්තා සාමාන්යය. වසක් විෂක් ශරීරගත වූ ආකාරයක් සම්බන්ධව පැහැදිලි සාක්ෂියක් නැත.
වස පෙවීමෙන් අසාධ්යය තත්ත්වයට පත්ව හදිසි ප්රතිකාර ඒකකයේ ප්රතිකාර ලබමින් සිටි බව කී අත්තරගම ධම්මරතන නම් මෙම හිමිනම ඊයේ (19) වනවිට සාමාන්ය වාට්ටුවකට මාරුකර ඇත.
ඊයේ තත්ත්වය –
ඊයේ සිද්ධිය වාර්තා වීමත් සමග ය විහාරාධිකාරී ඇඹිල්මීගම පඤ්ඤාකිත්ති හිමියන් හමුවීමට මාධ්යවේදීහු ගියහ. උන්වහන්සේ මාධ්යයට පවසා තිබුණේ විහාර භූමියට දින කිහිපයක් තිස්සේ පැමිණි නාදුනන පුද්ගලයෙකු හිමිනමට මෙම වස පෙවීම සිදුකර තිබෙන බවය.
හිමියන් කීවේ වස තිබූ බෝතලය රෝහලට බාර දීමට පියවර ගෙන ඇති බවය. බලහත්කාරයෙන් වස පෙවීමට ගිය අවස්ථාවේ හිමිනමගේ මුහුණ ප්රදේශයට තුවාල සිදුව ඇති බවත් රෝහල් ගත කරන අවස්ථාවේ හිමිනම සිහිසුන් තත්ත්වයේ පසු වූ බවත් උන්වහන්සේ කීහ.
“විහාර භූමියට දින තුනක පමණ කාලයක් තිස්සේ නාදුනන පුද්ගලයෙක් පැමිණ තිබෙනවා. ඔහු ඊයේ (18 ) පෙරවරුවේ විහාරස්ථානය පහළ නුග ගස අසළ සිටිනු දහම් පාසැලේ උගන්වමින් සිටි ධම්මරතන හිමියන් දැකලා ඒ බව මට දැනුම් දුන්නා. හාමුදුරුවො මගෙන් ඇහුවා ගිහින් කවුද කියලා බලන්න ද කියලා.“
“මම උපදෙස් දුන්නා ගියාට කමක් නැහැ මොනවා හරි ප්රශ්නයක් නම් සෝභිත පොඩි හාමුදුරුවෝ දැනුවත් කරන්න කියලා. . එහෙම කියලා මම දළදා මාලිගාවට ගියා. එතන දී සෝභිත හිමි දුරකථනයෙන් කතා කරලා කිව්වා පොඩි හාමුදුරුවන්ට වසා පොවලා හොඳටම අමාරුයි කියලා. “
“ නුග ගස අසළ සිටි පුද්ගලයාට ඉවත්ව යන ලෙස දැනුම් දුන් අවස්ථාවේ ඔහු හාමුදුරුවන් පස්සෙන් පන්නාගෙන ඇවිත් ගෙළට පිහියක් තියලා වස බෝතලය පොවා තිබෙන බව තමයි දැන ගන්න තිබෙන්නේ. අතේ තිබුණු පැරසිටමෝල් කාඩ් පතක් ගෙන එයින් පෙති දෙකක් ද ඔහු පොඩි හාමුදුරුවන්ට පොවා තිබෙනවා. පේරාදෙණිය ශික්ෂණ රෝහලේ හදිසි ප්රතිකාර ඒකකයේ උන්වහන්සේ මේ වනවිට ප්රතිකාර ලබමින් ඉන්නවා. “
උන්වහන්සේ කීවේ එසේය. පේරාදෙණිය පොලිසියේ මේ වග සටහන්ව ඇත්තේත් මේ ආකාරයෙනි. මාධ්ය වාර්තා කරනු ලැබුවේත් ඒ පොලිස් වාර්තා පදනම් කරගෙනය. කෙසේ වෙතත් මේ සියලුම ප්රකාශවලට මුල් වන්නේ වස පෙවූ බව පැවසෙන හිමි නම නායක හිමියන්ට ලබා දුන් තොරතුරුය .
හිමි නමගේ නැටුමක් ද?
දැන් තත්ත්වය වෙනස්ය. මේ තරුණ හිමි නම මේ කරමින් සිටින්නේ රංගනයක් ද යන්න සම්බන්ධ විමර්ශන අංශවලට සැක පහළ වී තිබේ.
හිමි නමගේ ප්රකාශවල අතාර්කික බව සම්බන්ධව මුලින්ම විමර්ශකයෝ නිරීක්ෂණය කර තිබුණහ.
ඒ හිමියන්ට අනුව බලහත්කාරයෙන් නන්නාඳුන පුද්ගලයෙක් වස පොවා පැරසිටමෝල් පෙති ද පොවා තිබිණි. එහෙත් එසේ වස පොවන්නට හිමිනම කියන ආකාරයේ බාහිර පුද්ගලයෙක් විහාර භූමියට පැමිණි බවට කිසිම සාක්ෂියකින් මෙතෙක් තහවුරු කරගැනීමට විමර්ශකයින්ට හැකි වී නැත. ඒ පුද්ගලයා දැක ඇත්තේ වස පෙවුණු බව කියන හිමියන් පමණි.
මුලින් කී ලෙසම ලැබෙන තොරතුරු අනුව වෛද්ය වාර්තා සාමාන්යය. කිසිම විසක් ශරීර් ගත වුන බවක් ඉන් තහවුරු වන්නේ නැත. පේරාදෙණිය ශික්ෂණ රෝහලේ හදිසි ප්රතිකාර ඒකකයට ඇතුළත් කළ හිමිනමගේ තත්ත්වය දැන් සාමාන්යය. එබැවින් හිමියන් සාමාන්ය වාට්ටුවකට යොමු කිරීමට වෛද්යවරු පියවර ගෙන ඇත.
හිමිනම කිසියම් දෙයක් වසන් කරන්නට උත්සාහ කරන්නේ ද යන සැකය පොලීසියට මතුව ඇත්තේ මේ කරුණු පදනම් කරගෙනය. කවරෙක් හෝ මේ තරුණ හිමියන්ට බලහත්කාරයෙන් වස පෙව්වා ද, නැතහොත් කිසිවෙකුගේ අවධානය යොමු කරගැනීම සඳහා මේ හිමියන්ම පිටපත රහිතවම රංගනය යෙදෙන්නේ ද යන්න පිළිබඳ දැන් පොලිස් විමර්ශන අංශවල අවධානය යොමුවී තිබේ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
සිද්ධිය සම්බන්ධයෙන් පේරාදෙණිය පොලිසිය පරීක්ෂණ පවත්වයි. තව දින කීපයකින් සිදුවූයේ කුමක් දැයි හෙළි වනු ඇත.
