මනම්පිටිය නිමල් ජයරත්න –
වාලච්චේන සිටි වැලිකන්ද සෙවනපිටිය නගරය අසල බදාදා පොලේ වෙළඳාමට පැමිණි වෙළෙන්දෙක් අද (24) අලුයම 4.00 ට පමණ වන අලි ප්රහාරයකින් මියගොස් ඇති බව මනම්පිටිය පොලිසිය කියයි.
මෙලෙස මියගොස් ඇත්තේ වාලච්චේන කුරින්දි නගර්, විනයාගිපුරම් ලිපිනයේ පදිංචිව සිටි හතලිස් අටවියති හයදරු පියකු වන මුරුගේසු මූනියන්දි යන අය බව පරීක්ෂණ පවත්වන මනම්පිටිය පොලිසිය සඳහන් කරයි.
ඔහු තම පවුල සමඟ සෙවනපිටිය පොළට ප්ලාස්ටික් භාණ්ඩ, තවත් බඩු තොගයක් විකිණීමට පැමිණ ඇති අතර එහිදී වන අලි ප්රහාරයට ලක්ව මනම්පිටිය රෝහලට ඇතුළත් කිරීමේදී මියගොස් තිබේ.
වැලිකන්ද ප්රදේශය භාර සහකාර පොලිස් අධිකාරි සුදත් අස්මඩලගේ උපදෙස් මත මනම්පිටිය පොලිස් ස්ථානාධිපති පොලිස් පරීක්ෂක අසේල සරත් කුමාර ඇතුළු පොලිස් නිලධාරී කණ්ඩායමක් මේ පිළිබඳ වැඩිදුර පරීක්ෂණ සිදුකරයි.
