ඉදිරි මාස කීපය තුළ ඇතිවීමට නියමිතව ඇති ආහාර අර්බුදයට පිළියම් සෙවීම සඳහා වු හදිසි වගා ව්යාපෘතියට මහා සංඝයාවහන්සේගේ ආශීර්වාදය ලබා ගැනීමටත්, උන්වහන්සේලාගේ නායකත්වය යටතේ ග්රාමීයට කෘෂි වගා ව්යාපෘති සංවිධානය කිරීමත් අවශ්ය මගපෙන්වීම ලබා ගැනීම සඳහා කෘෂි විද්වත් කණ්ඩායමක් අද මල්වතු මහා නායක අතිපූජ්ය තිබ්බටුවාවේ ශ්රී සිද්ධාර්ථ සුමංගල නා හිමියෝ හමුවූහ.
පේරාදෙණිය විශ්විද්යාලයේ කෘෂි විද්යා පීඨයේ මහාචාර්යවරුන්වන මහාචාර්ය බුද්ධි මාරඹේ, මහාචාර්ය නාලිකා රණසිංහ, මහාචාර්ය සමන් ධර්මකීර්ති ඇතුළු 08 දෙනෙකුගෙන් යුත් මේ විද්වත් කණ්ඩායම මල්වතු මහා නායක හිමියන් මුණ ගැසී පවසා ඇත්තේ තමන්ගේ විද්යාත්මක තක්සේරුව අනුව සැප්තැම්බර් මාසයෙන් පසු ආහාර හිඟයක් ඇතිවීම අනිවාර්ය බවත්, ඒ සඳහා කඩිනමින් සූදානම් වීම සඳහා ජනතාව පෙළගැස්වීමට සංඝරත්නයේ මැදිහත්වීම සහ ආශීර්වාදය අවශ්ය බවත්ය. ඒ සඳහා මල්වතු මහා නායක හිමියන්ගේ අනුශාසනා අපේක්ෂා කරන බව විද්වත්හු දන්වා ඇත.
මේ අවස්ථාවේ මහා නායක හිමියන් දන්වා ඇත්තේ සිදුවන්නට යන ව්යසනය පිළිබඳව උන්වහන්සේ නිසි තක්සේරුවකින් අවබෝධකරගෙන සිටින බවත්, මල්වත්ත මහා විහාර යටතේ ඇති විහාර ආශ්රිතව වගා කටයුතු ආරම්භ කිරීමට අවශ්ය මග පෙන්වීම් සඳහා මහා සංඝයා වහන්සේ දැනුම්වත් කරන බවත්ය.
එමෙන්ම ග්රාමීය ජනතාව අතරට මේ පණිවිඩය රැගෙන යමින් සිය දායක පිරිස් වගා කටයුතු කිරීමට පෙළ ගැස්වීම සඳහා නායකත්වය ලබා දිමට සංඝයා වහන්සේට දැනුම් දෙන බවත් මහා නායක හිමියන් විද්වත් පිරිසට දන්වා ඇත.
මේ අවස්ථාවට මල්වතු පාර්ශවයේ අනුනායක නියන්ගොඩ විජිත, මල්වතුවතු මහා විහාරයේ ලේඛකාධිකාරී පහමුනේ ශ්රී සුමංගල නා හිමිවරුද සම්බන්ධ වී ඇත.
මෙම විද්වත් පිරිස අද හවස අස්ගිරියෙ මහා නායක හිමියන්ද මුණ ගැසීමට සූදානමින් සිටිති.
