කොටලිගොඩ දොළුව කන්දේ විහාරස්ථානයේ බීමත්ව අශෝභන ලෙස හැසිරෙමින් සිටි චීවරධාරියෙකු පොත්තපිටිය පොලීසිය විසින් අත්අඩංගුවට ගෙන අධිකරණයට ඉදිරිපත් කිරීමෙන් පසු මහනුවර ප්රධාන මහේස්ත්රාත් ශ්රීනිත් විජේසේකර එම චීවරධාරියාට වසරක සිර දඬුවමක් අද (10) නියම කර තිබේ.
මෙසේ සිර දඬුවම් නියම වූයේ බදුල්ල අඹගස්දොව එගොඩවෙල ශ්රී ශෛලාරාම විහාරස්ථානයේ වාසය කළ කුලියාපිටියේ ධම්මදස්සී නමින් පෙනී සිටි චීවරධාරියෙකුට ය.
පනස්හත් හැවිරිදි චීවරධාරියා වරද පිළිගෙන තමන්ට අත්හිටවූ සිරිදඬුවමක් නියම කරන ලෙස අධිකරණයෙන් කළ ඉල්ලීම ප්රතික්ෂේප කළ මහේස්ත්රාත්වරයා භික්ෂූන් වහන්සේලා බෞද්ධ ජනතාවට අදර්ශයක් වන ලෙස ජීවිකාව ගෙනයාම වැදගත් බවත් මේ ආකාරයෙන් භික්ෂූන් වහන්සේලා හැසිරෙන විට එය සම්බුද්ධ ශාසනයේ ගෞරවයට හානියක් බවත් ප්රකාශ කර ඇත.
සිර දඬුවම් නියම වූ චීවරධාරියාට ලිංගික අතවර කිරීම, ග්රාම නිලධාරිනියකගේ රාජකාරියට බාධා කිරීම, බීමත්ව අශෝභන ලෙස හැසිරීම සම්බන්ධයෙන් ආණමඩුව හා බිබිල පොලිස් ස්ථාන මගින් අධිකරණය හමුවේ චෝදනා ගොනුකර තිබෙන බව පොත්තපිටිය පොලීසිය අධිකරණය හමුවේ කරුණු දක්වමින් ප්රකාශ කර තිබේ.
පෙර වැරදි ද සලකා බැලීමෙන් අනතුරුව මහේස්ත්රාත්වරයා අදාළ දඬුවම නියම කර තිබේ.
හිමිනමක විසින් පොත්තපිටිය පොලීසියට කරන ලද පැමිණිල්ලකින් පසු පොලිස් ස්ථානාධිපති ප්රධාන පොලිස් පරීක්ෂක ආර්.ඒ.පී රණසිංහගේ මෙහෙයවීම මත පරීක්ෂණ කළ පොලීසිය අදාළ චීවරධාරියා සැකපිට අත්අඩංගුවට ගෙන අධිකරණයට ඉදිරිපත් කර ඇත.
