මිද්දෙනියේ දී ඝාතනය වුන අරුණ විදානගමගේ හෙවත් මිද්දෙණියේ කජ්ජා ගේ ඝාතනය පසුපස ඉන්නේ කවුරුන්දැයි විමර්ශනයක් කළ යුතු බව නියෝජ්ය අධිකරණ ඇමති සුනිල් වටගල අද පාර්ලිමේන්තුවේ දී කීවේය.
ඊයේ රාත්රියේ සිය දරුවන් දෙදනා සමග යතුරුපැදියෙන් පැමිණෙද්දී තවත් යතුරු පැදියකින් පැමිණි ඝාතකයින් දෙදෙනෙක් විසින් ටී 56 ගිනි අවියකින් වෙඩි තබා මිද්දෙණියේ කජ්ජා ඝාතනය කර තිබිණි. එම වෙඩි තැබීමෙන් ඔහු සහ ඔහුගේ හය හැවිරිදි සිඟිති දියණිය මිය ගිය අතර නව හැවිරිදි පුතා ඇඹිලිපිටිය රෝහලේ දැඩි සත්කාර ඒකකයේ ප්රතිකාර ලබන්නේය.
මිද්දෙණියේ කජ්ජා හෙවත් අරුණ විදානගම ඝාතනයට පෙර ඔහු චමුදිත සමරවික්රමගේ ටෲත් විත් චමුදිත නාලිකාව සමග සම්මුඛ සාකච්ඡා දෙකකට පැමිණ රාජපක්ෂ පවුලේ අපරාධ සම්බන්ධව ආන්දෝලනාත්මක හෙළිදරව්වක් කළේය.
ඔහු කීවේ තමන් ඕනෑම මොහොතක ඝාතනය විය හැකි බවය. මහින්ද රාජපක්ෂගේ මාමාගේ පුතාවන කපිල දිසානායක නැමැති පුද්ගලයා තමාව මරා දැමීම සඳහා අඟුනකොලපැස්ස බන්ධනාගාරයට ගොස් පාතාල අපරාධකරුවෙකුට කොන්ත්රාත්තුවක් ද ලබා දුන් බව ඔහු එම නාලිකාව සමග කළ සම්මුඛ සාකච්ඡාවේ දී හෙළි කළේය.
එමෙන්ම ඔහු කීවේ මේ හෙළිදරව්ව කර තමන්ට එම ස්ථානයෙන් එළියට බැසීමට හෝ හම්බන්තොට ප්රදේශයේ කිසිම තැනක ජීවත්වීමට නොහැකිවන බවත් තමන් ජීවත් වෙමින් ඇත්තේ සැඟවී බවත් ඔහු හෙළි කළේය.
එමෙන්ම රාජපක්ෂලාගේ අනුදැනුම ඇතිව කළ ඝාතන සම්බන්ධව ද ඔහු කීවේය. මේ තත්ත්වය මතු කරමින් අද නියෝජ්ය අධිකරණ ඇමතිවරයා පාර්ලිමේන්තුවේ දී පැවසුවේ මෙවැන්නකි.
“මිද්දෙනිය ඝාතනය පසුපස ඉන්නේ කවුද කියලා අපි පරීක්ෂණයක් කරන්න ඕන. මේ පුද්ගලයා රාජපක්ෂවරුන්ගේ කොන්ත්රාත් කරලා කරලා ඊයේ පෙරේදා මම දැක්කා වෙබ් අඩවිවලට ඒ අය ඉන්ටවිව් දෙනවා. දැන් ඒ අයත් තරහා වෙලා රාජපක්ෂවරුත් එක්ක. මේ ඝාතනයට ලක් වුන පුද්ගලයා. ”
“ඒ පිළිබඳව අපි යළි පරීක්ෂණ කරන්න ඕන මේ ඝාතකයින් පසුපස ඉන්නේ කවුද කියලා. මොකද මෙයාලගේ සංස්කෘතියක් වෙලා තියනවා… සාක්කි මරණවා. අද නීතිපතිවරයාට නීතිපති දෙපාර්තමේන්තුවට ඇතිවෙලා තියන ලොකු ප්රශ්නයක් තමයි මේ සාක්කි මැරීම. ඇයි… මේවා දේශපාලන ඝාතන. ලසන්ත වික්රමතුංග ඝාතනයේ දි මොකක් වෙලා තියෙන්නේ. ආණ්ඩු කළේ ඒ ගොල්ල. අවුරුදු 17කට පස්සේ අපට නඩුවක් දීලා කියනවා දැන් මේ වැඩේ කරන්න කියලා.”
“එක්නැලිගොඩ අතුරුදහන් කළ නඩුවේ, ලසන්ත වික්රමතුංග ඝාතන නඩුවේ, සාක්ෂි අතුරුදහන් කරලා තියෙන්නෙ. තාජුඩීන් ඝාතනයේ සාක්ෂි අතුරුදහන් කරලා තියෙන්නේ. ඇඟල්ල දික්කරලා කියනවා මේ සාකට මහත්තයට.. අද මෙතන පුරසාරම් දොඩලා යනවා රාජපක්ෂ පවුලට උරුම නෑකම් කියන ඝාතන මේවා.”
“රිචඩ් ද සොයිසා ඝාතනය කරලා ඊයෙට සංවත්සරය තිබුණේ. මේවා දේශපාලන ඝාතන. ”
“සාක්ෂි මැරීමේ කටයුතුවල පිටිපස්සේ ඒ ගොල්ල ඉන්නේ. හැබැයි අපි මේ සම්බන්ධව පුලුල් පරීක්ෂණ කරනවා. “
