දේවාලයේ කපු රාජකාරි පංගුව සම්බන්ධයෙන් ඇති වූ අර්බුදයක් හේතුවෙන් සීල් තබා තිබුණු අලවතුගොඩ සමන් දේවාලයේ අගුළු කඩා දේවාලය යළි පූජා කටයුතු සඳහා විවෘත කර තිබේ.
ප්රධාන දොරටුවේ අගුළු කඩා විවෘත කළ අවස්ථාවේ දේවාලය තුළ එළවළු හා පලතුරු කුණු වී දැඩි දුර්ගන්ධයක් හමමින් තිබී ඇති බව වාර්තා වේ.
දේවාලයේ ප්රධාන කපුවා හදිසියේ මරණයට පත්වීමෙන් පසු ඔහු ගේ සහෝදරයින් දේවාලයේ ප්රධාන යතුර කපු රාජකාරි භාර අනෙක් පාර්ශවයට ලබා නොදීම හේතුවෙන් ඇති වූ අර්බුදයක් නිසා මහනුවර නියෝජ්ය බෞද්ධ කටයුතු කොමසාරිස්වරයා වූ අනුරුද්ධ හේම බණ්ඩාර විසින් පසුගිය 23 දින දේවාලයට සීල් තබනු ලැබීය.
ඒ වනවිටත් සති දෙකක පමණ කාලයක් තිස්සේ දේවාලය විවෘත කිරීමට නොහැකිව තිබීම නිසා පූජා පැවැත්වීමට හා වන්දනාමාන කිරීමට පැමිණෙන බැතිමත්හූ දැඩි අසීරුතාවට පත්ව සිටියහ.
මේ තත්ත්වය තුළ මහනුවර නියෝජ්ය බෞද්ධ කටයුතු කොමසාරිස්වරයා පුරාවිද්යා දෙපාර්තමේන්තුව ද දැනුවත් කර දේවාලයේ බස්නායක නිළමේ භාෂණ උදීප බණ්ඩාර අකුරණ ප්රාදේශීය ලේකම් ඉන්දිකා අබේසිංහ හා ප්රදේශයේ ග්රාම නිලධාරිවරයා ඉදිරිපිට දේවලයේ ප්රධාන දොරටුවේ අගුළු විවෘත කිරීමට තීරණය කර තිබේ.
මේ සඳහා ආරක්ෂාව ලබාදෙන ලෙස ඉල්ලීමට මහනුවර නියෝජ්ය බෞද්ධ කටයුතු කොමසාරිස්වරයා අලවතුගොඩ පොලීසියට ගිය අවස්ථාවේ දොරටුව කඩා දේවලය විවෘත කළහොත් ගෙවල් බිදීම යටතේ නියෝජ්ය කොමසාරිස්වරයා ව අත්අඩංගුවට ගැනීමට සිදුවන බව පොලීසිය දැනුම් දී ඇත.
කෙසේ වෙතත් ඔහු පුරාවිද්යා දෙපාර්තමේන්තුව ද දැනුවත් කර දේවාලයේ බස්නායක නිළමේ භාෂණ උදීප බණ්ඩාර , අකුරණ ප්රාදේශීය ලේකම් ඉන්දිකා අබේසිංහ හා ප්රදේශයේ ග්රාම නිලධාරිවරයා ඉදිරිපිට දේවලයේ ප්රධාන දොරටුවේ අගුළු කඩා විවෘත කර ඇත.
කපු රාජකාරියේ තාවකාලිකව වැඩ බැලීම සඳහා කපු රාජකාරිය හිමි අනෙක් පාර්ශවයේ ජ්යෙෂ්ඨ පුද්ගලයෙකුට දේවාලයේ යතුරු බාරදුන් බව අලවතුගොඩ සමන් දේවාලයේ බස්නායක නිළමේ අනුරුද්ධ හේම බණ්ඩාර පැවසීය.
දේවාලය විවෘත කළ අවස්ථාවේ අලවතුගොඩ පොලීසිය අවශ්යය සහය ලබා නොදීම සම්බන්ධයෙන් පොලිස්පතිවරයාට හා මධ්යම පළාත් ජ්යෙෂ්ඨ නියෝජ්ය පොලිස්පතිවරයාට පැමිණිලි කිරීමට මහනුවර නියෝජ්ය බෞද්ධ කටයුතු කොමසාරිස්වරයා හා අලවතුගොඩ සමන් දේවාලයේ බස්නායක නිළමේවරයා තීරණය කර ඇත.
