දිනසේන රතුගමගේ –
යාපනයේ ඉනුවිල් ප්රදේශයේ නිවසකින් හමු වූ අයිස් මත්ද්රව්ය වලට සමාන රසායන ද්රව්ය සම්බන්ධයෙන් ස්ථිර නිගමනයකට එළඹීමට නොහැකි නිසා කොළඹින් රසායන විශේෂඥයෙකු යාපනයට කැදවීමට ආරක්ෂක අංශ තීරණය කොට තිබේ.
‘’යුක්තිය ‘’ මෙහෙයුමේ නිරත පොලිස් කණ්ඩායමකට යාපනයේ ඉනුවිල් ප්රදේශයේ නිවසක කාමරයක පවත්වා ගෙන ගිය කුඩා රසායනාගාරයක් හමු වී අති අතර එම ස්ථානයේ අයිස් මත්ද්රව්ය නිෂ්පාදනය කොට ඇති බවට සාධක හමු වී තිබුණි.
මෙම නිවසේ පවත්වා ගෙන ගිය අයිස් මත්ද්රව්ය වලට සමාන රසායන ද්රව්ය විශේෂය මේ පුද්ගලයා විසින් අයිස් මත්ද්රව්ය ලෙස හඳුන්වා බොහෝ ප්රදේශවල ගැණුම්කරුවන්ට අලෙවි කරන්නට ඇතැයිද පොලීසිය විශ්වාස කරයි.
මෙම රසායනාගාරය පවත්වා ගෙන ගිය මහ මොළකරු හා ඔහුගේ බිරිය පලා ගොස් සිටි අතර එහි සේවය කළ සේවකයින් දෙදෙනෙකු හා රසායනාගාර උපකරණ රැසක් අත් අඩංගුවට ගැනීමට පොලීසියට හැකි වුණි.
මෙම රසායනාගාරය පවත්වා ගෙන ගිය පුද්ගලයාගේ බිරිය යාපනයේ ප්රධාන පෙලේ පෞද්ගලික රෝහලක හෙදියක් වශයෙන් සේවය කොට ඇති අතර අයිස් මත්ද්රව්ය සැකසීමට අවශ්ය රසායන ද්රව්ය ඇය විසින් සිය ස්වාමියාට සපයා දෙන්නට ඇතැයි පොලීසිය විශ්වාස කරයි.
රසායනාගාරය පවත්වා ගෙන ගිය නිවස කුලී පදනමකට එම යුවල විසින් ලබා ගෙන තිබූ අතර එහි කම්කරුවන් දෙදෙනෙකු සේවය කොට තිබේ.
අයිස් මත්ද්රව්ය නිෂ්පාදනය කළ ප්රධාන මොළකරු කාලයක් තිස්සේ යාපනයේ ක්රියාත්මක වූ ” ආවා කල්ලියේ” ප්රබලයෙකු වන අතර ඔහුට එරෙහිව යාපනය අධිකරණයෙ විභාග වූ නඩු හතරෙන් තුනකින් ඔහු නිදහස් වී තිබේ.
පසුව ඔහු සියලු දාමරිකකම් අතහැර මෙම නිවස කුලියට ගෙන ජීවත් වී ඇති අතර එම නිවසේ සකසන ලද කුඩා රසායනාගාරයකදී අයිස් මත්ද්රව්ය නිපදවීම කාලයක් තිස්සේම කරගෙන ගොස් ඇති බව පොලීසිය ප්රකාශ කරයි.
අත් අඩංගුවට ගත් දෙදෙනාගෙන් ප්රශ්න කරගෙන යන පොලීසිය නිවසේ අයිතිකරුවද අත් අඩංගුවට ගෙන තිබේ.
ඔහු පොලීසියට පවසා ඇත්තේ තමන් එම නිවස කුලියට ලබා දී වසරකට වඩා වැඩි කලයක් ගතවන අතර එම නිවස තුළ සිදු වූයේ කුමක්ද යන්න තමන් නොදන්නා බවය.
දැනට පලා ගොස් සිටින මහ මොලකරු හා ඔහුගේ බිරිද අත් අඩංගුවට ගැනීමට ඉනුවිල් පොලීසිය විශේෂ මෙහෙයුමක් දියත් කොට තිබේ.
