ගුවන් විදුලි නිවේදකයෙක් මෙන්ම මාධ්යවේදියෙකුද වන ජනක සුනෙත් ගේ මව වූ විනීතා ජයසුන්දාර මාතාව කහවත්ත, වැල්ලදුර ප්රදේශයේ නිවස තුළ තියුණු ආයුධයකින් පහර ඝාතනය කිරීමේ සිද්ධියට අදාලව ඔහුගේ සොයුරිය අත් අඩංගුවට ගෙන ඇත.
පසුගිය 13 වැනිදා උදේ මෙම ඝාතනය සිදුවී තිබිණි. තියුණු ආයුධකින් ගෙල කපා ඝාතනය කර තිබූ 71 හැවිරිදි විනීතා ජයසුන්දර මවගේ සිරුර නිවස තුළ තිබී සොයා ගන්නා එදින සවස් යාමයේය.
මෙම මාතාව සිය අවිවාහක බාල දියණිය සමග කහවත්ත නිවසේ පදිංචිව සිටි ඇති අතර දියණිය කහවත්ත ප්රාදේශීය ලේකම් කාර්යාලයේ සංවර්ධන නිලධාරිණියක ලෙස සේවය කරමින් සිටි තරුණියකි.
13 දා සවස දියණිය රැකියාව නිම කර සවස 3.50ට පමණ නිවසට පැමිණි අවස්ථාවේ දී ඇයගේ මව මුළුතැන්ගෙය තුළ රුධිරය ගලන තුවාල සහිතව මියාගොස් සිටිනු දැක අසල්වාසීන්ට දැනුම්දීමෙන් අනතුරුව පොලිසිය දැනුම්වත් වී තිබිණි.
කහවත්ත පොලිසියේ නිලධාරීන් මෙන්ම අපරාධ පරික්ෂණාගාර නිලධාරීන් ද අදාල ඝාතනය ගැන විමර්ශන ආරම්භ කළේය.
නිවසේ සාලයේ තිබුනු රුධිර පැල්ලම් සොදා හැර තිබීම, මෙම මාතාව ගේ රන් ආභරණ කිසිවක් ගලවාගෙන ගොස් නොතිබීම, සාලයේ දී ගෙල කපා ඝානය කළ මෙම මාතාව, කුස්සිය දෙසට ඇදගෙන ගොස් තිබීම, විමර්ශකයන්ගේ අධීක්ෂණයට ලක් වී ඇතැයි වාර්තා වේ.
වෙනදා උදෑසන රැකියාවට පිටත් වී දියණිය එදින රැකියාව සඳහා ගොස් ඇත්තේ උදෑසන 10.30 ට පමණ වීමත්, මේ මව සහ දියණිය අතර නිරන්තර ආරවුල් ඇති වන බවට අසල්වාසීන් විසින් සාක්ෂි දී තිබීමත් හේතුවෙන් මුල සිටම මෙම ඝාතනය සම්බන්ධව දියණිය පිළිබඳ සැකයක් පොලිසියට ඇති වී තිබුණ බව කියැවුනේය.
සිදුකෙරුණ විමර්ශන මාලාවකින් අනතුරුව ඝාතනය සම්බන්ධව සැක පිට මෙම 38 හැවිරිදි දියණිය අද (16) අළුයම පොලිසිය විසින් අත් අඩංගුවට ගෙන තිබේ.
ඝාතනයට හේතුව මෙතෙක් අනාවරණය වී නොමැති අතර, සිද්ධිය සම්බන්ධයෙන් කහවත්ත පොලීසිය වැඩිදුර විමර්ශන සිදු කරයි.