දිනසේන රතුගමගේ –
අධික වර්ෂාව හා තද සුළඟ හේතුවෙන් යාපනයේ ධීවර වරායන් වලින් මුහුදු ගිය බෝට්ටු 14 ක් සමග ධීවරයින් 48 දෙනෙකු පිළිබඳව මෙතෙක් කිසිදු තොරතුරක් නොමැති බව යාපනය වඩමරච්චි එක්සත් ධීවර සංගමයේ උප සභාපති එසෙ.වර්ණකුලසිංහම් අද ( 9 ) පැවසීය.
ධීවරයින්ගේ මෙම අතුරුදහන්වීම සම්බන්ධයෙන් ඔවුන්ගේ ඥාතීන් පේදුරුතුඩුව පොලීසිය ඇතුලු තවත් පොලිස් ස්ථාන කීපයකට හා ධීවර පරීක්ෂක නිලධාරීන්ට දැනුම් දී තිබේ.
මේ ධිවරයින් මුහුදු ගොස් ඇත්තේ අයහපත් කාලගුණික තත්ත්වය ඉතා දරුණු වීමට පෙරය.
යාපනය ප්රදේශය හරහා හමා ගිය දැඩි සුළං සහිත තත්ත්වය හේතුවෙන් හා අධික වර්ෂාව හේතුවෙන් යාපනයේ කරෙයිනගර් වඩමරච්චි ගුරුනගර් ධීවර වරායන්වල නවතා තිබූ බෝට්ටු විශාල ප්රමාණයක් දියඹට ගසා ගෙන ගොස් තිබේ.
ධීවරයින් විසින් විවේක ගැනීමට හා මසුන් රැස් කිරීමට තනා තිබූ ධීවර වාඩිද සුළඟට ගසා ගෙන ගොස් ඇත.
මේ වන විට යාපනය ඇතුලු උතුරු මුහුද දැඩි රළු ස්වභාවයකින් යුත් අතර නාවික හමුදාව කිසිදු ධීවරයෙකුට මුහුදට යාම තහනම් කොට තිබේ.
