ඊයේ දිනයේ (12) ආගමන හා විගමන දෙපාර්තමේන්තුවේ දත්ත පද්ධතිය තුළ ඇති වූ තාක්ෂණික දෝෂය අද ( 13 ) දින වන විට නිවැරදි කර ඇති බව එම දෙපාර්තමේන්තුව පවසයි.
ඇති වූ තත්ත්වය මත ඊයේ දිනයේ දී විදේශ ගමන් බලපත්ර සහ වීසා නිකුත් කිරීම අත්හිටුවීමට සිදුවූ අතර එම තත්ත්වය සඳුදා (16) දක්වා පවතිනු ඇතැයි දෙපාර්තමේන්තුව මුලින් අපේක්ෂා කළේය.
ඒ අනුව අද දිනයේ සේවා ලබා ගැනීමට නොපැමිණෙන ලෙස ද ආගමන විගමන දෙපාර්තමේන්තුව ජනතාවට දැනුම් දුන්නේය.
එහෙත් පද්ධති අක්රියතාව අපේක්ෂා කළ කාලයට වඩා ඉක්මනින් නිවැරදි කර ඇති බව නිලධාරීහු තහවුරු කළහ. එක්දින සහ සාමාන්ය සැකසුම් සේවා දෙකෙහිම සාමාන්ය මෙහෙයුම් දැන් සුහුරුපාය ප්රධාන කාර්යාලයේ සහ ප්රාදේශීය ශාඛාවල නැවත ආරම්භ කර ඇත.
විදේශ ගමන් බලපත්ර සහ වීසා සඳහා සාමාන්ය සේවාවන් යථා තත්ත්වයට පත් කර ඇති නමුත් පෙබරවාරි 12 වන දින හමුවීම් ලබා ගත් හෝ පැමිණි නමුත් අයදුම්පත් සම්පූර්ණ කිරීමට නොහැකි වූ අයදුම්කරුවන්ට ප්රමුඛතාවය දෙන බව ආගමන විගමන දෙපාර්තමේන්තුව පවසයි.
වත්මන් පෝලිම් තත්ත්වය තහවුරු කර ගැනීමට සහ අපහසුතාවයන් වළක්වා ගැනීමට පුද්ගලිකව පැමිණීමට පෙර 1962 ක්ෂණික ඇමතුම් අංකයට කතා කරන ලෙස හෝ දෙපාර්තමේන්තු නිල වෙබ් අඩවිය පරීක්ෂා කරන ලෙස මහජනතාවට දැනුම් දී තිබේ.
නිශ්චිත විමසීම් සඳහා 011 210 1540 හෝ 011 210 1545 යන දුරකථන අංකවලින් දෙපාර්තමේන්තුව හා සම්බන්ධ විය හැකි බව ආගමන විගමන දෙපාර්තමේන්තුව පවසයි.
