ප්රමිතියෙන් තොර ඖෂධ ගෙනැවිත් රජයේ රෝහල්වලට බෙදා හැරීම සම්බන්ධයෙන් ගොනු කර ඇති නඩුව සඳහා එවකට කැබිනට් මණ්ඩලයේ සිටි අමාත්යවරු 18 දෙනාගෙන් ප්රකාශ සටහන් කර ගන්නා ලෙස මාලිගාකන්ද මහෙස්ත්රාත් ලෝචනී අබේවික්රම ඊයේ (11) නියෝග කළාය.
එවකට සෞඛ්ය අමාත්ය කෙහෙළිය රඹුක්වැල්ලට අදාළ බෙහෙත් ගෙන්විම සඳහා කැබිනට් අනුමැතිය ලබා දුන් එම කැබිනට් මණ්ඩලයේ හිටපු ජනාධිපති රනිල් වික්රමසිංහ, හිටපු අගමැති දිනේෂ් ගුණවර්ධන සහ හිටපු අමාත්යවරුවන ටිරාන් අලස්, මහින්ද අමරවීර, විජයදාස රාජපක්ෂ, හරින් ප්රනාන්දු, රොෂාන් රණසිංහ, නිමල් සිරිපාල, මනුෂ නානායක්කාර, බන්දුල ගුණවර්ධන ඇතුළු කැබිනට් මණ්ඩලයේ 18කගෙන් ප්රකාශ ලබාගැනීමට අවශ්ය බවත් ඒ සම්බන්ධයෙන් නියෝගයක් නිකුත් කරන ලෙසත් නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජනරාල් ලක්මිණී ගිරිහාගම මාලිගාකන්ද අධිකරණයෙන් ඉල්ලා සිටියාය. ඊට අවසර දෙමින් මහෙස්ත්රාත්වරිය එම නියෝගය නිකුත් කළාය.
ව්යාජ ලේඛන සකස් කර ප්රමිතියෙන් තොර එන්නත් ආනයනය කර රජයේ රෝහල්වලට බෙදා හැරීම සම්බන්ධයෙන් අපරාධ පරික්ෂණ දෙපාර්තමේන්තුව විසින් පවරා ඇති නඩුවේ දැනට රිමාන්ඩ් භාරයේ පසුවන පළමු වැනි සැකකරු වන බාල ඖෂධ සැපයුම් සමාගමේ හිමිකරු සුදත් ජානක ප්රනාන්දු නැමැත්තාගේ මානසික තත්ත්වය සම්බන්ධයෙන් වෛද්ය වාර්තාව නිකුත් කළ මනෝ වෛද්ය සී.ටී.කේ. ප්රනාන්දු අධිකරණයට ඉදිරිපත් කළ වාර්තාව වෛද්යවරයාගේ සීමාව ඉක්මවා ඉදිරිපත් කළ වාර්තාවක් බවත් ඒ සම්බන්ධයෙන්ද විමර්ශනයක් ඉදිරියේදී කරනවාද නැත්ද යන්න ඊළඟ දිනයේදී තීරණය කරන බවත් මහෙස්ත්රාත්වරිය සඳහන් කළාය. ( දිවයින – ඒ.ජේ.ඒ. අබේනායක)
