ශ්රී ලංකාව ඉහළ මැදි ආදායම් කාණ්ඩයේ සිට අඩු ආදායම් කාණ්ඩය දක්වා පහත හෙළීම වෙනුවට ණය සඳහා සුදුසුකම් ලබන කාණ්ඩ වර්ගීකරණයේ ආපසු හැරවීමකට (Reverse Graduation) ලක් කිරීම සඳහා මේ වනවිට සූදානම් වෙමින් පවතින බව ශ්රී ලංකා මහ බැංකු අධිපති ආචාර්ය නන්දලාල් වීරසිංහ පවසයි.
මේ වන විට බරපතල විදේශ විනිමය ගැටලුවකට මුහුණ දී සිටින ශ්රී ලංකාවට ජාත්යන්තර ණය ලබා ගැනීමට පවතින බාධා අවම කිරීමේ අරමුණින් මෙලෙස ණය වර්ගීකරණ වෙනස් කිරීමට සූදානම් වේ.
ලංකාව මේ වන විට බංකොලොත් රාජ්යයක් ලෙසට ප්රකාශයට පත් කර ඇති පසුබිමකදී, ණය ලබා ගැනීම සඳහා ජාත්යන්තර ණය දෙන ආයතනවලින් ප්රතික්ෂේප වෙන තත්ත්වය තුළ මෙලෙස ණය ලබා ගැනීමේ මාර්ග පාදා ගැනීමට මහ බැංකුව යොදන සැලසුම් අතර ණය ලබා ගැනීමේ වර්ගීකරණයේ වෙනසක් සිදු කර ඇත.
මේ සම්බන්ධයෙන් මුලදී ලෝක බැංකුව විසින් සකස් කරන ලද ශ්රී ලංකාව අයත් රටවල් කාණ්ඩයේ වෙනසක් සිදු කිරීම පිළිබඳව අවධානය යොමු කෙරුණ ද, එම වෙනස සිදු කිරීමේදී සළකා බැලෙන්නේ රටේ දළ දේශීය නිෂ්පාදනයට සාපේක්ෂව ඒක පුද්ගල ආදායම මත නිර්ණය කෙරෙන සාධකයක් බැවින් එය වෙනස් කිරීම අසීරු බව ලෝක බැංකුව විසින් ශ්රී ලංකාවට දන්වනු ලැබ ඇත.
එබැවින් ණය ලබා ගැනීමේ දී, ලෝක බැංකුවේ ඇති ණය වර්ගීකරණයේ ශ්රී ලංකාවේ මට්ටම ආපසු හැරවීමේ ක්රියාවලියකට ඉඩ පවතින බැවින්, මෙලෙස එම ණය වර්ගීකරණය ආපසු හැරවීම සඳහා මේ වන විට කටයුතු යෙදෙමින් පවතී.
ජාත්යන්තර මූල්ය අරමුදලේ ණය පහසුකම ලැබෙන තෙක් සහන පදනම මත ලෝක බැංකුව වැනි ජාත්යන්තර ආයතනවලින් ණය ලබා ගැනීමේ හැකියාව මෙමඟින් ලැබෙනු ඇතැයි මහ බැංකු අධිපතිවරයා විශ්වාසය පළ කරයි.
