පාර්ලිමේන්තුවේ නියෝජ්ය මහ ලේකම් හා කාර්ය මණ්ඩල ප්රධානි ජ්යෙෂ්ඨ නීතීඥ ජී.කේ.ඒ. චමින්ද කුමාර කුලරත්න ඊයේ (23) සිට ක්රියාත්මකවන පරිදි වැඩතහනමකට ලක්ව තිබේ.
2023 සැප්තැම්බර් 15දා සිට ක්රියාත්මක වන පරිදි මෙම ධුරයේ රාජකාරි කරනු ලැබූ ජී.කේ.ඒ. චමින්ද කුමාර කුලරත්න වැඩ තහනමකට ලක් වී ඇත්තේ ඔහුගේ පත්වීම සම්බන්ධයෙන් මතුව ඇති ගැටලුකාරී තත්ත්වයක් මත බව පාර්ලිමේන්තු ආරංචි මාර්ග පවසයි.
පාර්ලිමේන්තුවේදී ඊයේ (23) පස්වරුවේ රැස්වූ පාර්ලිමේන්තු කාර්ය මණ්ඩල උපදේශක සභාව මෙම තීන්දුව ගෙන ඇත.
කතානායක, සභානායක, විපක්ෂනායක, මුදල් අමාත්ය හෝ ඔහුගේ නියෝජිත සහ පාර්ලිමේන්තු මහ ලේකම්වරයා මෙම උපදේශක සභාවේ නිල නියෝජිතයෝ වෙති
ඊයේ පැවති රැස්වීමට කතානායක (වෛද්ය) ජගත් වික්රමරත්න, සභානායක අමාත්ය බිමල් රත්නායක, විපක්ෂනායක වෙනුවෙන් විපක්ෂයේ ප්රධාන සංවිධායක ගයන්ත කරුණාතිලක, මුදල් අමාත්යවරයා නියෝජනය කරමින් නියෝජ්ය මුදල් අමාත්ය අනිල් ජයන්ත සහ පාර්ලිමේන්තුවේ මහ ලේකම් කුෂානි රෝහණදීර සහභාගි වී ඇත.
චෝදනාවට ලක්ව සිටින නියෝජ්ය මහලේකම් චමින්ද කුමාර කුලරත්න කැඳවා ඔහුගෙන් නිදහසට කරුණු විමසා නොමැති බැවින් ඒ සම්බන්ධයෙන් විශේෂ අවධානයක් යොමුකිරීමේ අවශ්යතාවය පිළිබඳව ඇතැම් නියෝජිතයන් කාරක සභාවේදී අදහස් දක්වා ඇතැයි වාර්තාවේ.
නියෝජ්ය මහලේකම් චමින්ද කුමාර කුලරත්න ඉලක්ක කර ගනිමින් ක්රියාත්මක වූ “මූලික පරීක්ෂණය” ව්යවස්ථාපිත නීතිය සහ ස්ථාපිත පරිපාලන රීතීන් බරපතළ ලෙස උල්ලංඝනය කිරීමක් බවට ද විවේචන මතුවෙමින් ඇත.
කෙසේ වෙතත් මෙම තීරණයට එරෙහිව අධිකරණ ක්රියාමාර්ග ගැනීමට චමින්ද කුලරත්න මහතා දැනටමත් තීරණය කර ඇතැයි දැනගන්නට ඇත.
ජ්යෙෂ්ඨ නීතීඥ චමින්ද කුලරත්න මහතා සිය 20 වසරකට වැඩි වෘත්තිය ගමන් මඟ තුළ පාර්ලිමේන්තුවේ ආණ්ඩු පක්ෂ ප්රධාන සංවිධායක ලේකම්, ජනාධිපති අතිරේක ලේකම්, අග්රාමාත්ය අතිරේක ලේකම්, විපක්ෂ නායක අතිරේක ලේකම්, එක්සත් රාජධානියේ ලන්ඩන්හි ශ්රී ලංකා මහ කොමසාරිස් කාර්යාලයේ අමාත්ය උපදේශක, ජනාධිපති ජ්යෙෂ්ඨ සහකාර ලේකම්, ජනාධිපති සහකාර ලේකම් ඇතුළු රජයේ විධායක මට්ටමේ පරිපාලන තනතුරු රැසක් හොබවා තිබේ.
