දරු බිල්ලෙන් පසුවවත් අබලන් රිදීතැන්න – ඕමනියාමඩුව පාර හදන්නැයි ප්‍රදේශවාසීන් විරෝධතාවක!

මනම්පිටිය නිමල් ජයරත්න –

වසර තිස්පහකට වැඩි කාලයක් අබලන්ව පවතින වාලච්චේන රිදීතැන්න සිට ඕමනියාමඩු දක්වා දිවෙන අබලන්, දූවිලි, මාර්ගය සකසා දෙන ලෙසට බලකරමින් ප්‍රදේශයේ සිංහල, දෙමළ, මුස්ලිම්, ගම්වාසීන් පිරිසක් 02 වෙනිදා දහවල් එම මාර්ගය, ඕමනියාමඩු ප්‍රදේශයෙන් අවහිර කරමින් විරෝධතාවක නිරත වූහ.

කිලෝමීටර් 5 ක් පමණ දුරට දිවෙන මාර්ගය ඉදිකර දෙන ලෙස අදාළ බලධාරීන්ට ලිඛිතව හා වාචිකව දැනුම් දුන්නද මෙතෙක් එම මාර්ගය ඉදි නොකිරිමෙන් පවතින දූවිලි නිසා මාර්ගයේ ගමන් ගන්නා පාසල් දරුවන් ඇතුළු අනෙකුත් මගි ජනතාව මෙන්ම නිවාසවල ජීවත්වන ගම්වාසීන් විවිධ ලෙඩ රෝගවලට මුහුණදී ඇති බවද විරෝධතාකරුවන් සඳහන් කරති.

අධික වියළි කාළගුණික තත්ත්ව කාලයේදී මෙම මාර්ගයේ වැලි ටිපර් සහ සෙසු බරවාහන ගමන් කිරීමේදී හටගන්නා දූවිලි තත්ත්වය නිසා ගම්මානය සිංහල,දෙමල, මුස්ලිම්, පවුල් දාහක සාමාජිකයන් 5000ට වැඩි පිරිසක් වැඩි පිරිසක් පීඩාවට පත්ව සිටින බවද විරෝධතාකරුවන් පෙන්වා දුන්හ.

එම මාර්ගයේ පවතින දූවිලි පාලනය කිරීමට ඉකුත් 29 දා බවුසර්යක් මගින් වතුර ඉසිමින් සිටි‍යදී ගම්මානයේ අවුරුදු 5 ක කුඩා පිරිමි දරුවකු, එම බවුසරයට යට වීමෙන් ඉතා අවාසනාවන්ත ලෙස මියගිය බවද විරෝධතාකරුවෝ සඳහන් කළහ.

වසර තිස්පහක කාලයක් බලයට පත් වූ විවිධ රජයන් සහ පළාත් පාලන නියෝජිතයින් මෙම මාර්ගය සකසා දෙන බවට තමන්ට ඡන්ද පොරොන්දු ලබා දුන්නද මෙතෙක් එම මාර්ගය ඉදි නොවුණු බවත් මෙම තත්ත්වය නිසා වර්ෂා කාලවලදී පාසල් යන දරුවන්ගේ ඇඳුම් පවා කිළිටු වන බවද ගම්මානයේ සිංහල දමිළ මුස්ලිම් ජනතාව සඳහන් කළහ.

ගම්මානයේ කෙළවරේ ප්‍රතිසංස්කරණය කරන වැවෙන් ගොඩදමන වැලි, ටිපර් රථ මඟින් විවිධ ප්‍රදේශවලට රැගෙන යෑම හේතුවෙන් මාර්ගය තව තවදුරටත් දැඩි ලෙස අබලන් පවතින අතර ටිපර් රථ ගමන් කිරීමේදී ඇති වන්නාවූ දූවිලි නිසා ගම්වාසීන් විශාල පිරිසක් මේ වනවිට සෞඛ්‍ය ගැටලුවලට මුහුණ දී සිටින බවද විරෝධතාකරුවන් පවසති.

විරෝධතාකරුවන් ඕමනියාමඩු සිට රිදීතැන්න ප්‍රධාන මාර්ගය දක්වා පාගමනින් පැමිණ පැය දෙකක පමණ විරෝධතාවයක නිරත වුවද කිසිදු විසඳුමකින් තොරව විරෝධතාවය අවසන් කළහ.

අප මෙම මාර්ගය අබලන් තත්ත්වය පිළිබඳ ප්‍රදේශයේ මුස්ලිම් කොංග්‍රසයේ ප්‍රාදේශිය මන්ත්‍රී එස්. තාහිර්ගෙන් දුරකථනයෙන් කළ විමසීමකදී ඔහු පැවසුවේ එම මාර්ගය ඉදිකිරීමට මුදල් වෙන් වී ඇති බවත්, පැවැති කොරෝනා වසංගතය හේතුවෙන් එම මාර්ගයේ ඉදිකිරීම් කටයුතු ප්‍රමාද වු බවත්, ඉදිරියේදී මාර්ගය අලුත්වැඩියා කිරීමට අවශ්‍ය කටයුතු කිරීමට ප්‍රාදේශිය සභාව සතුව මුදල් පවතින බවත්ය.

අනතුරුව අප වාකරේ ප්‍රාදේශීය සභාවේ ලේකම් එස්. වීරසුදාකරන්ගෙන් මේ පිළිබඳ දුරකථනයෙන් කළ විමසීමකදී ඒ සඳහා මුදල් ප්‍රතිපාදන ප්‍රාදේශිය සභාව සතුව නොමැති බවත්, එම් මාර්ගය සම්බන්ධ සොයා දූවිලි පාලනය කිරීමට බවුසර් යොදා ජලය ඉසීමට අවශ්‍ය කටයුතු කරන බවත් තීවේය.