- ඝාතනය සැලසුම් කළ සළිඳු පොලිස් ලොක්කන්ටත් කතා කරලා
- හමු වූ යතුරුපැදිය සහ ගිනි අවිය ඝාතනයට සම්බන්ධයක් නෑ
- ඝාතකයන්ට නවාතැන් දුන් තරුණයාගෙන් වැදගත් තොරතුරු රැසක්…
පසුගියදා පානදුර පල්ලියමුල්ල ප්රදේශයේ දී ත්රි රෝද රථයකින් ගමන් කරමින් සිටි ධීවර තරුණයකුව වෙඩි තබා ඝාතනය කිරීම සම්බන්ධ සිද්ධියේ වෙඩික්කරුවන්ට නවාතැන් දීමේ චෝදනාව යටතේ දැනට අත්අඩංගුවට ගෙන සිටින සැකකරුවකු තමන් විසින් කොළඹ නගරයේ චයිනා වීදියේ දී රුපියල් ලක්ෂ පනහක මුදලක් යම් අයෙකුට ලබා දුන් බව පොලිසියට හෙළි කිරීමත් සමග මෙම මුදල ලබා ගත් පුද්ගලයා පිළිබඳව පොලිස් විමර්ශකයන්ගේ අවධානය යොමුව තිබේ.
මෙම ඝාතනය පසුගිය 28 වැනිදා දහවල් සිදුවූ අතර ඝාතකයන් පලා ගිය මාර්ගය පිළිබඳව සිදු කරන ලද විමර්ශනයේදී මෙම වෙඩික්කරුවන්ට නවාතැන් දී ඇති තරුණයකු සම්බන්ධ තොරතුරු අනාවරණය වී ඔහු අත්අඩංගුවට ගෙන තිබිණි. මෙම තරුණයා පානදුර ප්රදේශයේ නිවසක පදිංචි විශ්රාමික බන්ධනාගාර ජේලර්වරයකුගේ පුත්රයෙකි. ඔහුගෙන් සිදු කළ ප්රශ්න කිරීමේදී මෙම ඝාතනය කරවූ බව කියැවෙන සලිඳු නැමැති කුඩු ජාවාරම්කරුවා විසින් මෙම තරුණයාට මත් කුඩු උපයා ලද ආදායමෙන් රුපියල් ලක්ෂ 50ක මුදලක් කොළඹ චයිනා වීදියේ එක්තරා ආයතනයක් ඉදිරිපිටට පැමිණෙන පුද්ගලයකුට ලබා දිය යුතු බවට පවසා ඇත. ඒ අනුව මෙම මුදල් ඔහු අදාල පුද්ගලයාට ලබා දී ඇති බව අනාවරණය වෙයි.
එදිනට පසු දින ගල්කිස්ස පොලිසියට ඉහළ පොලිස් නිලධාරියකුගෙන් ලද තොරතුරකට අනුව පානදුර සුසාන භූමියක තිබී ගිනි අවියක් අත්අඩංගුවට ගෙන තිබේ. මෙම තොරතුරු මත ඊට පසු බොල්ගොඩ ගඟේ ගිල්වා තිබූ යතුරු පැදියක්ද ගොඩ ගැනිණි. එසේ වුද මෙම ගිනි අවිය සහ යතුරුපැදිය මෙම ඝාතනයට යොදා ගත් ඒවා නොවන බව මේ වනවිට විමර්ශනවලින් අනාවරණය වී ඇත.
කුඩු සළඳු නැමැති පුද්ගලයා දුරකථන ඇප් එකක් මාර්ගයෙන් විදේශීය දුරකථන අංකයකින් මෙරට සිට අමතන බවට හෙළිව ඇති අතර ඔහු ඉහළ පොලිස් නිලධාරීන් කිහිප දෙනකු සමඟ ද දුරකථන සංවාද සිදු කොට ඇති බව අනාවරණය වී ඇත. සළිඳු නැමැත්තාගේ අවශ්යතාව මත මතුගම සිටින පාතාල අපරාධකරුවකුවන ෂාන් නැමැත්තාගේ සහය ද ඇතිව දැනට බන්ධනාගාරගතව සිටින සුද්දා නැමති මත්ද්රව්ය ජාවාරම්කරුවා විසින් සම්බන්ධ කර දී ඇති පුද්ගලයන් දෙදෙනකු විසින් මෙම වෙඩිතැබීම සිදු කොට ඇතැයි වාර්තා වේ. අදාළ සැකකරුවන් පොලසියට භාර විමට නියමිත බවට පොලිස් ආරංචි මාර්ගවලින් සඳහන් වුවද මෙතෙක් ඔවුන් භාර වී නොමැති බව අනාවරණය වෙයි.
