මීටියාගොඩ, කිරලගහවෙල හන්දියේ පිහිටි අවන්හලක් අසල වෙඩිතැබීමකින් කාන්තාවක් මිය ගොස් තිබේ.
පාතාලයේ දාම ඝාතනවලින් තවත් බිල්ලක් ලෙස මෙම ඝාතනය සිදුව ඇතැයි පොලිසිය සැක කරයි.
පසුගිය මැයි 3 වැනිදා රාත්රී කාලයේදී මීටියාගොඩ එරනවිල පිහිටි අවහන්හලක් තුළදී මත්පැන් පානය කරමින් සිටි පිරිසක් ඉලක්ක කරගෙන වෙඩි තැබීමක් සිදුවිය. එය කරන්දෙණිය සුද්දාගේ මෙහෙයවීමෙන් මෙම ඝාතනය සිදුවූ බවට විමර්ශන අංශ වෙත තොරතුරු ලැබි තිබිණි. එම වෙඩි ප්රහාරයෙන් මහදුර නලීන් නැමැත්තෙක් මිය ගියේය.
අද වෙඩි තබා ඝාතනය කර ඇත්තේ මහදුර නලීන්ගේ නැගනිය ය.
කරන්දෙණිය සුද්දාගේ මස්සිනා වූ වරුෂවිතාන මිරන්ත පසුගිය 04 වැනිදා අම්බලන්ගොඩ නගර සභාව අසලදී වෙඩි තබා ඝාතනය කරන්නේ මරා දැමූ මහදුර නලීන්ගේ පාර්ශවයෙන් බවට සැකයක් ඇත. මහදුර නලීන්ගේ පුතා වන මහදුර ඉසුරු නැමැත්තා මෙම ඝාතනය සිදුවූ දා සිට සැඟව සිටින බව විමර්ශන අංශ පවසයි.
දැන් විමර්ශන අංශ සැක කරන්නේ කරන්දෙණියේ සුද්දාගේ මස්සිනා වූ වරුෂවිතාන මිරන්ත ඝාතනයේ පළිය මහදුර නලීන්ගේ නැගනිය ඝාතනය කර පිරිමහන්නට ඇති බවය.
කරන්දෙණිය පොලිසිය වැඩි දුර විමර්ශන පවත්වයි.
