මෙරට ජනතාවට අඛණ්ඩ පානීය ජල සැපයුමක් ලබාදීමේ අරමුණ ඇතිව නව ජල ගාස්තු සූත්රයක් සහ ප්රතිපත්තියක් නුදුරේදීම හඳුන්වා දෙන බව ජල සම්පාදන හා වතු යටිතල පහසුකම් සංවර්ධන අමාත්ය ජීවන් තොණ්ඩමන් පවසයි.
ආයෝජන පිරිවැය ඉහළ යෑම හේතුවෙන් පවතින ජල ගාස්තුවල යම් සංශෝධනයක් සිදු වන නමුත්, එහි බලපෑම සමෘද්ධි ඇතුළු සමාජ සුබසාධක ප්රතිලාභ ලබන හා වතු නිවාස පාරිභෝගිකයන්හට අත්විඳීමට ඉඩක් නොතබන බවද අමාත්යවරයා සඳහන් කළේය.
ජල සම්පාදන හා වතු යටිතල පහසුකම් සංවර්ධන අමාත්ය ජීවන් තොණ්ඩමන් මෙම අදහස් පළ කළේ ජනාධිපති මාධ්ය කේන්ද්රයේ ඊයේ(18) ‘ස්ථාවර රටකට සැවොම එක මඟකට’ ප්රවෘත්ති සාකච්ඡාවට එක්වෙමිනි.
මෙම වසර වන විට කඳුකර ජනතාව මෙරටට පැමිණ වසර 200ක් සම්පූර්ණ වන අතර, එය නිමිති කර ගනිමින් දිස්ත්රික් මට්ටමින් විශේෂ උත්සව සහ වැඩසටහන් රැසක් සංවිධානය කර ඇති බවත් අමාත්යවරයා සඳහන් කළේය.
