මාතර දෙවුන්දර ධීවර වරායෙන් සහ කළුතර බේරුවල ධීවර වරායෙන් මුහුදු ගිය ධීවර බෝට්ටු දෙකක් සමග ධීවරයින් හය දෙනෙකු අතුරුදහන් වී ඇතැයි ධීවර දෙපාර්තමේන්තුව නිවේදනය කරයි.
දෙවුන්දර ධීවර වරායෙන් ඊයේ (27) සවස පිටත්ව ගිය යාත්රාවේ ධීවර කාර්මිකයින් 5 දෙනෙකු සිට ඇති බවට විශ්වාස කරනු ලබන අතර එම යාත්රාව ගොඩබිමින් සැතපුම් 7කට පමණ ඈත දී වාණිජ නෞකාවක ගැටී මෙම අනතුර සිදුව ඇති බවටත් සැක පළ කරනු ලබයි.
කෙසේ නමුත් අනතුරින් එක් ධීවරයෙකු මුදවාගෙන ගොඩබිමට රැගෙන විත් ඇති බවත් අනෙකුත් ධීවරයින් සිව්දෙනා අතුරුදන්ව ඇති බවත් අද දෙරණ වාර්තා කර ඇත.
පොලිසිය උපුටා දක්වමින් පළ කර ඇති අද දෙරණ වාර්තාවට අනුව අතුරුදන්ව ඇත්තේ එම ධීවර යාත්රාවේ ස්කීපර්වරයා ලෙස කටයුතු කළ 48 හැවිරිදි ඒ.ඩබ්ලිව්.පී. චමින්ද, ධීවරයින් ලෙස A.W.P.S සමන්ත, 41 හැවිරිදි L.H.T.නිරෝෂන් , 58 හැවිරිදි A.D.S.W. ශාන්ත හා 44 හැවිරිදි P.B.T. සුජිත් කුමාර යන ධීවර කාර්මිකයින්ය.
මේ වනවිට අතුරු දහන් වූ ධීවරයින් සිවු දෙනා සෙවීම සඳහා නාවික හමුදා යාත්රාවක් ද නාවික හමුදාවේ මග පෙන්වීම යටතේ වෙනත් ධීවර යාත්රා කීපයක් ද අනතුර සිදුවූයේ යැයි විශ්වාස කරන කලාපය තුළ සෝදිසි මෙහෙයුමක් ආරම්භ කර තිබේ.
කළුතරින් මුහුදු ගිය ධීවර යාත්රාව අනතුරට ලක් වී ඇත්තේ මුහුද මැද පෙරළීමෙනි. එහි ගමන් ගත් ධීවරයින් දෙදෙනා මේ වනවිට අතුරුදහන්ව ඇත.
පෙරළී ඇත්තේ කුඩා ධීවර බෝට්ටුවකි. බෝට්ටුවේ ගමන් ගත් ධීවරයින් දෙදෙනා සොහොයුරන්ය. පදිංචිය අලුත්ගමය. මේ වනවිට ප්රදේශවාසීහු බෝට්ටු යොදාගෙන අනතුරට පත් ධීවරයින් දෙදෙනා සොයමින් සිටිති.
