ශ්රි ලංකාවේ දේශපාලන නායකයන් සහ ඔවුන්ගේ පවුලවලට සමබන්ධ පුද්ගලයන් විසින් සොරකම් කරන ලද හෝ අයථා ලෙස පරිහරණය කරන ලද ශ්රි ලංකාවේ සංචිතවල තිබූ විදේශ මුදල් සූක්ෂම ලෙස හඳුනා ගැනීමේ වැඩපිළවෙළක් ඇමෙරිකානු නිතිඥයන් පිරිසකගේ මූලිකත්වයෙන් ආරම්භ වී ඇති බව එම කටයුත්තට සම්බන්ධ ඉතා විශ්වාසකටයුතු ආරංචි මාර්ගයක් ලංකාසරට අනාවරණය කළේය.
මේ වැඩපිළිවෙළට ඇමෙරිකාවේ වෙසෙන විශේෂඥ දැනුමැති ශ්රි ලාංකිකයන් කිහිප දෙනකු ගේ ද දායකත්වය ලැබෙන බවත් එම ආරංචි මාර්ග තවදුරටත් හෙළිදරව් කළේය.
ශ්රී ලංකාව විසින් ලබා ගන්නා ලද ඩොලර් මිලියන 250ක ස්වෛරී බැඳුම්කර ණය මුදල සහ පොලිය සම්පූර්ණයෙන් ගෙවන ලෙසට ඇමෙරිකාවේ හැමිල්ටන් රිසව් බැංකුව විසින් අමෙරිකානු අධිකරණයක දමන ලද නඩුවේද එහි පැමිණිලිකාර පාර්ශ්වය නියෝජනය කරන නීතීඥයන් ශ්රි ලංකාවේ දේශපාලකයන් විසින් සිදු කරන දූෂිත ගනුදෙනු පිළිබඳව සංක්ෂිප්තව ඉදිරිපත් කර ඇති අතර එයද මෙම සූක්ෂම වැඩපිළිවෙළක එක් අදියරක් බව මෙම ආරංචි මාර්ගය අනාවරණය කළේය.
එම නඩුව ගොනු කිරීමේදී ඉස්මතු කර ඇති එක කරුණක් වන්නේ ශ්රි ලංකාව ලබා ගත් ණය රජයේ හිතවත් පාර්ශ්ව වෙත ගෙවීමට කටයුතු කර ඇති බවය. මේ වසර මුලදී ශ්රී ලංකාව විසින් බොහෝ දෙනකුගේ විරෝධය මැද ආපසු ගෙවන ලද ඩොලර් මිලියන 500ක ජාත්යන්තර ස්වෛරී බැඳුම්කරන ණය ආපසු ලබා ගෙන අධික ලාභයක් ලැබු පුද්ගලයන් අතර රජයට හිතවත් පාර්ශ්ව සිටින බව අනාවරණය කර ගැනීමට ඔවුන් කටයුතු කරමින් සිටින බව ද වාර්තා වේ.
එමෙනන්ම විශේෂයෙන් චෝදනා එල්ල වී ඇති බැසිල් රාජපක්ෂ නාමල් රාජපක්ෂ මෙන්ම මහින්ද රාජපක්ෂ සම්බන්ධයෙන්ද විවිධ රටවල සිදුව ඇති ගනුදෙනු පිළිබඳව තොරතුරු එරට අධිකරණ පද්ධතිය අනාවරණය කර ගැනීමට අදාල පියවර පිළිබඳව ඔවුන් සලකා බලමින් ඇති බව ද වර්තා වේ.
ඔවුන් එහිදී අධිකරණය හමුවේ පෙන්වා දීමට උත්සාහ ගන්නේ මෙම විදේශ ගෙවීම් පැහැර හැරීම ශ්රි ලංකාවට පමණක් නොව මේ වනවිට ණය ගෙවීම් පැහැර හැරීමට ලක්ව ඇති ශ්රි ලංකාවට ණය ලබා දුන් මූල්ය ආයතනවල ආයෝජනය කළ ඇමෙරිකානුවන් ඇතුළු ලෝකයේ වෙනත් ආයෝජකන්ගේ තැන්පතු ධනය ද අවදානමකට ලක් කර ඇති බවය. .
මේ වනවිට හැමිල්ටන් රිසව් බැංකුව විසින් ගොනු කරන ලද නඩුව සම්බන්ධයෙන් කරුණු විමසීමට ශ්රී ලංකාවේ එක්සත් ජාතීන්ගේ තානාපති මොහාන් පීරිස් ද එරට අධිකරණය හමුවට කැඳවීමට නියමිත බව වාර්තා සඳහන් කරයි.
