උතුරු පළාත් විශේෂ – රසුල දිල්හාර ගමගේ
වවුනියාව පාලමෝට්ටෙයි කුංජිකුලම් ප්රදේශයේ මාර්ගයක වෙඩි වැඩීමෙන් මියගිය තරුණයෙකුගේ මළ සිරුරක් වවුනියාව පොලිසියේ නිලධාරීන් විසින් 29 දා සොයා ගෙන තිබේ.
මියගිය පුද්ගලයාව කුංජිකුලම් ප්රදේශයේ වගා කටයුතුවල නිරතව සිටි ඕමන්ත වෙප්පන්කුලමේ පදිංචි සර්කුණරාසා දිසාන්ත් නැමති 21 හැවිරිදි අය බවට හඳුනා ගෙන තිබේ.
යතුරු පැදියකින් ගමන් කරමින් සිටි මෙම පුද්ගලයා මාර්ගයක් අසල තුවක්කුවද සමග වැටී සිටි අතර ඔහුගේ ගෙළෙහි වෙඩි වැදුනු බවට සැක කළ හැකි විශාල තුවාලයක් ඇති බව ඕමන්ත පොලිසිය ප්රකාශ කළේය.
මෙම මරණය සියදිවි හානි කරගැනීමක්ද ඝාතනයක්ද යන්න මෙතෙක් හෙළි වී නොමැති අතර පරීක්ෂණ කටයුතු සඳහා මළ සිරුර වවුනියාව මහ රෝහල වෙත භාර දී තිබේ.
ඕමන්ත පොලිසිය සිද්ධිය සම්බන්ධයෙන් පරීක්ෂණ පවත්වා ගෙන යයි.
