සේවය නිමවා නිවෙස බලා ගාල්ලේ සිට මගී බස් රථයකින් ගමන් කරමින් සිටි බන්ධනාගාර නියාමකවරයකුට වැලිගම නගරයේදී පහරදී වෙඩි තබා ඝාතනය කිරීමට උත්සාහ දැරූ තවත් අපරාධකරුවන් තිදෙනක් අපරාධ පරීක්ෂණ දෙපාර්තමේන්තුවේ මනුෂ්ය ඝාතන හා සංවිධානාත්මක අපරාධ විමර්ශන කොට්ඨාසයේ නිලධාරීන් විසින් පෙරේදා (13) අත්අඩංගුවට ගෙන ඇත.
අත්අඩංගුවට ගත් සැකකරුවන් තිදෙනා වැලිගම හා දික්කුඹුර යන ප්රදේශවල පදිංචිකරුවන්ය. ඔවුන් අවුරුදු 30, 23 හා 19 යන වයස්වල අය බව විමර්ශන අංශ සඳහන් කළේය. ඒ අතර ඇඟලුම් ආයතනයක සේවයේ නිරත අයෙක් ද සිටියි.
පසුගිය 05 වැනිදා සවස් කාලයේ ගාල්ලේ සිටි කිරින්ද පුහුල්වැල්ල දක්වා යන බසයක දී බන්ධනාගාර නියාමක ආර්.එච්.එම්.එස්. ප්රබෝධ නමැති නිලධාරියාට පහර දීම සම්බන්ධයෙන් විශේෂ විමර්ශනයක් පොලිස්පති නියමයෙන් අපරාධ පරීක්ෂණ දෙපාර්තමේන්තුව විසින් දියත් කර තිබිණි.
පෙරේදා අත් අඩංගුවට ගත් පුද්ගලයින් 03 සමග මේ වනවිට අපරාධයට සම්බන්ධ පුද්ගලයින් 06 දෙනෙක් පොලිස් අත් අඩංගුවට පත් වී තිබේ. මින් පෙර අත් අඩංගුවට පත් වී ඇති සැකකරුවන් තිදෙනා වැලිගම මිදිගම පදිංචිකරුවන්ය.
විමර්ශනවලින් අනාවරණය වී ඇත්තේ හරක් කටාගේ ගෝලයෙක් මෙම ප්රහාරය මෙහෙයවා ඇති බවයි.
එම පුද්ගලයා මාතර බන්ධනාගාරගතව සිට ඇප ලබා නිදහස ලැබුවෙක් බව පොලිසිය කියයි. එම පුද්ගලයාව ඡායාරූපවලින් හඳුනාගත් බව ද උසස් පොලිස් නිලධාරියෙක් පැවසීය.
පහරකෑමට ලක්වූ බන්ධනාගාර නිලධාරියාත් මාතර බන්ධනාගාරයේ වැඩි කාලයක් සේවයේ නිරතව සිටියෙකි. පහරදීම සිදුවන විට ඔහු ගාල්ල බන්ධනාගාරයට ස්ථාන මාරුවීමක් ලැබ දින දෙකක් පමණ වනු ඇති බව ද උසස් පොලිස් නිලධාරියා කීය.
නීතිය තදින්ම පිළිපදිමින් ක්රියාත්මක කරන නිලධාරියෙක් බව කියන ඔහු බන්ධනාගාර රැඳවියන්ට ජංගම දුරකතන ඇතුළු තහනම් භාණ්ඩ තබා ගැනීමට ඉඩ නොදෙන බව විමර්ශනවලින් අනාවරණය වී තිබේ.
ඔහු ජංගම දුරකතන 50කට වැඩි ප්රමාණයක් මෑත කාලයේ රැඳවියන් සතුව තිබී සොයා ගෙන ඇති බව ද සඳහන්ය.
පහරකෑමට ලක්වූ බන්ධනාගාර නිලධාරියා කිරින්ද පුහුල්වැල්ල ප්රදේශයේ පදිංචිව සිටින අයෙකි. සිය සේවා මුරය අවසන් කර ගාල්ලේ සිට පුහුල්වැල්ලේ පිහිටි නිවෙසට මගී බස් රථයක නැඟී සිවිල් ඇඳුමින් ගමන් කරමින් සිටියදී මෙම ප්රහාරය එල්ලවී තිබුණි.
වැලිගම නගරයේදී බස් රථයට ගොඩවුණු පුද්ගලයින් 06 දෙනෙක් පමණ මුලින්ම මෙම නිලධාරියාට පහරදී ඇති බව පොලිසිය කියයි.
ඒ පැමිණි එක් අයෙක් ටී 56 අවියක් සඟවාගෙන සිටි බව බන්ධනාගාර නියාමකවරයා පොලිසියට පවසා ඇත. විමර්ශකයින් කියන්නේ මෙම නිලධාරියාට පහරදෙන විට බස් රථයේ සිටි මගීන් ඊට විරෝධය දක්වමින් ඔහුව ආරක්ෂා කිරීමට මුල්වූ බැවින් ජීවිතයට හානියක් කිරීමට ඉඩ නොලැබී ඇති බව ය..
එසේ නොවන්නට බස් රථය තුළ ඔහුට වෙඩි තබා ඝාතනය කිරීමට ඉඩ තිබුණු බව විමර්ශනවලින්ද අනාවරණය වී ඇත.
බන්ධනාගාර රැඳවියන් නීති විරෝධි ලෙස භාවිත කළ ජංගම දුරකතන අත් අඩංගුවට ගැනීම හේතුවෙන් පාතාල අපරාධකරුවන් සහ මත්කුඩු ජාවාරම්කරුවන් මෙම නිලධාරියා සමඟ අමනාපයෙන් සිටින බවත් එහි ප්රතිඵලයක් ලෙස ඔහුව මරා දැමීමට සූදානම් වී ඇති බවත් පෙනෙන්නට ඇතැයි අපරාධ පරීක්ෂණ දෙපාර්තමේන්තු විමර්ශකයින්ට පෙනී ගොස් ඇත.
මෙම පහරදීමට පැමිණි පිරිස ඒ සඳහා පැමිණි යතුරුපැදියක්ද ත්රිරෝද රථයක්ද පොලිසිය සිය භාරයට ගෙන තිබේ.
වැඩි දුර විමර්ශන ක්රියාත්මකය.
