සමගි ජනබලවේගයේ මන්ත්රී ෆීල්ඩ් මාර්ෂල් සරත් ෆොන්සේකා තම මනස පරීක්ෂා කරගත යුතු බව සමගි ජන බලවේගයේ මෙහෙයුම් ප්රධානී පාර්ලිමේන්තු මන්ත්රී හරීන් ප්රනාන්දු පවසයි.
ඔහු මේ බව පවසන්නේ තමන් පක්ෂයේ දෙවැනියා බවත්, තමන්ට හිමි තැන මැයිදිනය රැළියේ කථික ලයිස්තුවේ දී ලබා නොදී ප්රතිරූප ගොඩනගා ගන්නට උත්සාහ කරන හරීන් ප්රනාන්දු මේ සම්බන්ධව විමසීමේ දී තමන්ට අසභ්ය වචනයෙන් බැණ වැදීම පිළිබඳව ඔහුට එරෙහිව විනය පරීක්ෂණයක් පැවැත්විය යුතු බවට පක්ෂ නායකයාට රාජකාරි වශයෙන් දන්වා සිටින බවත් සරත් ෆොන්සේකා විසින් ප්රසිද්ධ මාධ්යයට ප්රකාශ කිරීමෙන් අනතුරුවය.
“ මෙවැනි හැසිරීම් පුරුද්දට තියාගන්න එපා“ යැයි සමගි ජනබලවේගයේ මන්ත්රී සරත් ෆොන්සේකා තම පක්ෂයේම හරීන් ප්රනාන්දුට ප්රසිද්ධ මාධ්ය ඔස්සේ අනතුරු ඇඟවීමක් ද කළේය. ඔහු කීවේ තමන්ව නොසලකා කථික ලයිස්තුවේ කළ වෙනස්කම් සම්බන්ධව පක්ෂ නායක සජිත් ප්රේමදාස ද දැන සිටි බව ඔහුට හැඟී ගිය බවය.
මේ සරත් ෆොන්සේකා මාධ්යයට කී කතාවය.
හරීන් ප්රනාන්දු සරත් ෆොන්සේකාගෙ මනස පරීක්ෂා කරගැනීමට යෝජනා කරන්නේ සරත් ෆොන්සේකා මාධ්යයට කළ එම ප්රකාශයෙන් අනතුරුවය. සරත් ෆොන්සේකා පක්ෂයේ දෙවෙනියා නොවන බවත් ඔහු ඒ බවවත් නොදන්නා බවත් හරීන් ප්රනාන්දු මාධ්යයට කීවේය.
ඔහු කී කතාව මෙසේය.
සමගි ජන බලවේගයේ මැයි දින රැලියේ කථික ලැයිස්තුව සකස් කළේ පක්ෂයේ නායක සජිත් ප්රේමදාස මහත්මයාගෙ අනුදැනුම ඇතිව මහලේකම් රංජිත් මද්දුමබණ්ඩාර මහත්මයා. ඉතින් මට ඒ ගැන චෝදනා නැගීමෙන් පලක් නෑ.
මහනුවර සිට පැවැති දින හයක පා ගමන සහ මැයි දින රැලිය සංවිධානය කරලා, ඒ වෙනුවෙන් ශ්රමය, ධනය වැය කරලා කරන්න පුළුවන් සියලුම කැපකිරීම් පක්ෂය වෙනුවෙන් කළාට පස්සේ මට එරෙහිව පරීක්ෂණ තැබීමට යෝජනා කරන සරත් ෆොන්සේකා මහත්මයගෙ මනස පරීක්ෂා කළ යුතුයි.“
“සමගි ජන බලවේගයේ දෙවැනියා පක්ෂ මහලේකම් රංජිත් මද්දුමබණ්ඩාර මහත්මයා. ඒ බව නොදැන තමන් පක්ෂයේ දෙවැනියා යැයි සිතාගෙන සරත් ෆොන්සේකා කටයුතු කිරීම පිළිබඳ මගෙ කනගාටු ප්රකාශ කරනවා.“
හරින් ප්රනාන්දු මන්ත්රීවරයා කියා තිබුණේ විපක්ෂ නායක සජිත් ප්රේමදාසගේ ප්රධානත්වයෙන් අද (2) පැවැති පක්ෂ කණ්ඩායම් රැස්වීමේදී ද සරත් ෆොන්සේකාට පක්ෂ සාමාජිකයන්ගේ දැඩි විරෝධය එල්ල වූ බවය. බව ඔහු
එමෙන්ම, මෙම සිදුවීම සම්බන්ධයෙන් සජිත් ප්රේමදාස තමාගෙන් පෞද්ගලිකවම සමාව ඉල්ලා සිටි බවත්, සරත් ෆොන්සේකා සිදු කළ දේ අනුමත නොකළ බවත් ඔහු පැවසුවේය. කෙසේ වෙතත් සමගි ජන බලවේගයේ මන්ත්රී කණ්ඩායම් රැස්වීමට සරත් ෆොන්සේකා පැමිණ සිටියේ නැත.
බදුල්ල දිස්ත්රික්කයෙන් ගම්පහ දිස්ත්රික්කයට හරින් ප්රනාන්දු මන්ත්රීවරයා පැමිණි අවස්ථාවේ සිට සරත් ෆොන්සේකා සහ හරීන් ප්රනාන්දු අතර විරසයක් ඇති වුන බවත් ඊට ප්රධානම හේතුව මනාප පොරය බවත් අභ්යන්තර දේශපාලන ආරංචි මාර්ග පවසයි.
