ශ්රියානි විජේසිංහ –
ඖෂධ වර්ග 350ක් සඳහා පාලන මිලක් නියම කර ඇති බවත් එම පාලන මිලට වඩා වැඩියෙන් ඖෂධ අලෙවි කරන වෙළදසැල් සම්බන්ධයෙන් වහාම ජාතික ඖෂධ නියාමන අධිකාරිය දැනුවත් කරන ලෙසත් එම අධිකාරියේ සභාපති විශේෂඥ වෛද්ය ආනන්ද විජේවික්රම ඉල්ලිමක් කරයි.
ඖෂධ වර්ග 350ක මිල පාලනය සම්බන්ධයෙන් ඖෂධ සැපයුම්කරුවන්, ආනයනකරුවන්ව සහ නිෂ්පාදකයින්ව දැනුවත් කිරීමට මීට මාස දෙකක පමණ පෙර සිදුකළ නමුත් ඇතැම් සැපයුම්කරුවන් වැඩි මිලට ඖෂධ අලෙවි කරන බවට තොරතුරු ලැබී ඇතැයිද විශේෂඥවරයා පවසා සිටියි.
කෙසේ නමුත් ඇතැම් සැපයුම්කරුවන් පාලන මිලට ඖෂධ අලෙවි කිරීම දැනටමත් ආරම්භ කරමින් ජනතාවට එම වාසිය ලබා දීමට කටයුතු කර ඇති බවද හෙතෙම පැවසුවේය.
ඖෂධවල මිල පාලනයත් සමඟ ඇතැම් පිළිකා එන්නත්, අංශභාග රෝගීන්ට ලබාදෙන ඖෂධ, අපස්මාර රෝගීන්ට ලබාදෙන ඖෂධ හා පණු බෙහෙත් වර්ග ඇතුලු බොහෝ ඖෂධවල මිල සැලකිය යුතු මට්ටමකින් අඩුවී ඇති බවද විශේෂඥවරයා සඳහන් කළේය.
මිල නියාමනය කළ ඖෂධ පිලිබඳව නිරන්තරයෙන්ම විමසා බැලීමට කටයුතු කරන බවද ජනතාව ඒ පිලිබඳව අවධානයෙන් සිටිය යුතු බවද හෙතෙම පෙන්වාදේ.
රටතුළ භාවිත කරන ඖෂධවල මිල නියාමනය කිරීමේ වගකීම ජාතික ඖෂධ නියාමන අධිකාරියට හිමිවන බවත් ඒ අනුව 2016 – 2017 වසරවල ඖෂධ කාණ්ඩ 60ක උපරිම සීමා මිලක් නියම කළ බවත් සභාපතිවරයා පැවසුවේ.
පසුගිය 21 වෙනිදා සෞඛ්ය අමාත්යවරයා විසින් ඖෂධ මිල නියාමනය කිරීමේ ගැසට් ප්රකාශයට පත්කර එය පාර්ලිමේන්තුවට ඉදිරිපත් කර සම්මත කර ගත් බවද අද (17) ප්රවෘත්ති දෙපාර්තමේන්තුවේ පැවති මාධ්ය හමුවේදී සභාපති වෛද්ය විජේවික්රම පැවසුවේය.
