කීර්ති ප්රනාන්දු –
මේ වනවිට ඉන්ධන පිරවුම්හල් අසල දිගු පෝලිම් ඇති වී තිබෙන්නේ ඉන්ධන මිල ගණන්වල විශාල වෙනසක් ඇතිවේ යැයි බියෙන් පසුගිය 01 වැනිදා ඉන්ධන බෙදා හරින්නන් ඉන්ධන ඇනවුම් නොකිරීමට දඬුවම් කිරීම සඳහා දින තුනක් ඛණිජ තෙල් නීතිගත සංස්ථාව විසින් පිරවුම්හල් වෙත ඉන්ධන ඇනවුම් ලබා නොදීම නිසා බව ඛණිජ තෙල් බෙදුම්කරුවෝ පවසති.
මේ වනවිට යළි ඇනවුම් ලබා දීම නිසා තත්ත්වය සාමාන්ය අතට හැරෙමින් ඇති බවත් අද සවස වනවිට මේ පෝලිම් සියල්ල නැතිවී යනු ඇති බවත් ශ්රී ලංකා ඛණිජතෙල් බෙදුම්කරුවන්ගේ සංගමයේ සභාපති කපිල නාඔටුන්න ලංකාසරට කීවේය.
මේ පිළිබඳව අදහස් දක්වමින් බෙදුම්කරුවන් පවසන්නේ විශාල පාඩුවක් ලැබීමට කිසිම ව්යාපාරිකයෙක් කැමැත්තක් නොදැක්වීම 01 වැනිදා ඉන්ධන ඇනවුම් නොකිරීමට හේතුව බවය.
කෙසේ වෙතත් ඊට දඬුවම් ලබා දීම සඳහා දින තුනක් බෙදුම්කරුවන්ට ඇනවුම් ලබා නොදීමට ඛනිජතෙල් නීතිගත සංස්ථාව ගත් තීරණය නිසා දඬුවම් වින්දේ පාරිභෝගිකයන් මිස බෙදුම් කරුවන් නොවන බව ද ඔවුහු පෙන්වා දෙති.
“ අපිට නම් දවස් තුනකට පස්සේ හරි එන තෙල් ටික විකිණෙනවා… මිනිස්සු පවු…“ බෙදුම්කරුවෝ අප සමග පැවසූහ.
