ලලිත් චාමින්ද –
රාජ්ය ඖෂධ නීතිගත සංස්ථාව විසින් පාර්ලිමේන්තු සංකිරණය සඳහා ලබාදුන් ඖෂධ වෙනුවෙන් රුපියල් එක්කෝටි හතලිස් හය ලක්ෂය විසි දහසක (රුපියල් මිලියන 14.62 ක) මුදලක් වසර පහකටත් වඩා වැඩිකාලයක සිට සංස්ථාවට අයවීමට ඇති බැව් ජාතික විගණන කාර්යාලය මගින් නිකුත්කොට ඇති වාර්තාවක සඳහන් වේ.
මෙම මුදල අයකරගැනීම සඳහා කථානායකතුමා, සෞඛ්ය ලේකම්තුමා සහ අදාල පාර්ශවයන් සමග කිහිප වතාවක් සාකච්ඡා කරණු ලැබුවද සතුටුදායක පිළිතුරක් නොලැබුණු බව රාජ්ය ඖෂධ නිතිගත සංස්ථාවේ කළමණාකාරිත්වය විසින් විගණනයට සදහන් කොට ඇත.
මේ නිසා මෙම මුළු අගයට සමාන බොල් සහ අඩමාන ණය වෙන්කිරිමක් සිදුකළ බව කළමණාකාරිත්වය විසින් විගණනයට සඳහන්කොට ඇත.
පැරණි ණය ශේෂ අයකරගැනිමට හෝ විධිමත් පරිදි කපා හැරීමට කටයුතු කළයුතු බවට විගණනය මගින් නිර්දේශකොට ඇත.
රාජ්ය ඖෂධ නිතිගත සංස්ථාව සම්බන්ධයෙන් 2021 වර්ෂයට අදාලව මෙකි විගණන වාර්තාව නිකුත්කොට තිබුණි.
