ආරක්ෂක මාණ්ඩලික ප්රධානී ජෙනරාල් බිපින් රාවට්, ඔහුගේ බිරිඳ සහ තවත් හමුදා සාමාජිකයින් 11 දෙනෙකුට මරු කැඳවමින් දෙසැම්බර් 8 වනදා කුනූර් ආසන්නයේ සිදුවූ හෙලිකොප්ටර් අනතුරෙන් දිවි ගලවා ගත් එකම පුද්ගලයා වූ ගෲප් කපිතාන් වරුන් සිං අද (15) දින දිවියෙන් සමුගත්තේය.
සිං බැංගලෝරයේ ගුවන් හමුදා අණදෙන රෝහලේ ජීවිතය වෙනුවෙන් සටන් කරමින් සිටියේය. සිංගේ අභාවප්රාප්ත වීමත් සමග හෙලිකොප්ටරයේ සිටි මගීන් 14 දෙනාම මියගොස් ඇත
. ඉන්දීය ගුවන් හමුදාව ට්විටර් පණිවුඩයක් නිකුත් කරමින් කියා සිටියේ “දෙසැම්බර් 08 වන දින හෙලිකොප්ටර් අනතුරෙන් තුවාල ලබා අද අලුයම ජීවිතක්ෂයට පත් වූ නිර්භීත හදවතක් සහිත ගෲප් කපිතාන් වරුන් සිංගේ අභාවප්රාප්ත වීම පිළිබඳව දැඩි කණගාටුව පළ කරන” බවයි. ගුවන් හමුදාව පැවසුවේ “අවංක ශෝකය ප්රකාශ කරන අතර වියෝ වූ පවුලේ අය සමඟ එක් වී සිටින” බවයි.
39 හැවිරිදි සිං, වෙලින්ටන්හි ආරක්ෂක සේවා මාණ්ඩලික විද්යාලයේ අධ්යක්ෂක කාර්ය මණඩලයේ සේවය කරමින් සිටියේයය.
වරුන් සිං විශිෂ්ට ගුවන් නිලධාරියෙකි. පසුගිය වසරේ ඔක්තෝබර් 12 වන දින ඔහු පදවමින් සිටි තේජාස් සැහැල්ලු සටන් ගුවන් යානය කාර්මික දෝෂයකට ලක්වීමෙන් පසු විචක්ෂණ ලෙස තත්වය කළමනාකරණය කරගනිමින් ගුවන් අනතුරක් වළක්වා ගැනීම වෙනුවෙන් මෙම වසරේ නිදහස් දිනයේදී ශෞර්ය චක්ර සම්මානයෙන් පදුම් ලැබූ විශිෂ්ටයෙකි.
ප්රවෘත්තියට ප්රතිචාර දක්වමින් ත්රිවිධ හමුදාවේ උත්තරීතර අණ දෙන නිලධාරියා වන ජනාධිපති රාම් නාත් කෝවින්ද් , අග්රාමාත්ය නරේන්ද්ර මෝදි, ආරක්ෂක අමාත්ය රාජ්නාත් සිං ට්විටර් පණිවිඩ එවමින් සිය ශෝකය ප්රකාශ කර තිබුණහ.
අසිං හමුදා පවුලක සාමාජිකයෙකි. ඔහුගේ පියා කේ පී සිං ඉන්දීය හමුදාවේ කර්නල් වරයෙක් ලෙස විශ්රාම ගියේය. ඔහුගේ බාල සොහොයුරා වන ලුතිනන් කමාන්ඩර් තනුජ් සිං ඉන්දීය නාවික හමුදාවේ සේවය කරන නිලධාරියෙකි.
