මනම්පිටිය නිමල් ජයරත්න –
මෙවර යල කන්නයේ මාදුරුඔය සහ පිඹුරත්තෑව ජලාශය යටතේ වී වගවගා කළ මහවැලි බී කලාපයේ අක්කර 60,000 කට වැඩි ප්රමාණයක වී අස්වනු නෙලීමට ඩීසල් නොමැතිකම හේතුවෙන් ගොවීන් බලවත් අර්බුදයකට මුහුණ දී ඇතැයි වාර්තා වේ.
තම ගොවි සංවිධාන වෙත ඩීසල් ලබා ගැනීමට මුදල් ගෙවා ඇතත් මෙතෙක් ඩීසල් නොලැබිම හේතුවෙන් අස්වනු නෙලීමේ කාලය පසුවී ඇති බවද මහවැලි බී කලාපයේ බොහෝ ගොවීහු අපට පැවසූහ.
වී අස්වනු නෙලන යන්ත්ර සඳහා ඩීසල් නොමැති වීමෙන් තම වී අස්වනු කලට වෙලාව නෙළාගැනීමට නොහැකි වුවහොත් ඉදිරියේදී වර්ෂාවට හසුවී අස්වනු විනාශ වීමට ඇති අවදානම ඉහළ බව ද ගොවීහු පෙන්වා දෙති. මේ වනවිටත් බී කලාපයේ ඇතැම් කෙත් යායවල ගොයම් කීඩෑ උවදුර ට ගොදුරු වී ඇති බව ද ඔවුහු කියති.
පොළොන්නරුව දිස්ත්රික්කයට පවතින ඩීසල් හිඟය සම්බන්ධයෙන් අප බෙදුම්කරුවන් කිහිප දෙනෙකුගෙන් කළ විමසීමකදී ඔවුන් සඳහන් කළේ කුරුණෑගල, මුතුරාජවෙල, මෙන්ම අනිකුත් බෙදාහැරීම මධ්යස්ථානවලින් පොළොන්නරුවට ලැබෙන ඉන්ධන නිසි වෙලාවටවට නොලැබෙන බවය. ඉල්ලුම් කළ ඉන්ධන වලට වඩා අඩුවෙන් ලැබෙන අවස්ථා ගැනත් ඔවුහු කීහ.
කෙසේ වෙතත් පසුගිය දිනයක කෘෂිකර්ම අමාත්ය මහින්ද අමරවීර,,වාරිමාර්ග අමාත්ය රොෂාන් රණසිංහ, ඛනිජ තෙල් සම්පත් අමාත්ය, කාංචන වි ජේසේකර,ප්රවාහන අමාත්ය බන්දුල ගුණවර්ධන යන අමාත්යවරුන් කළ සාකච්ඡාවකදි සඳහන් කළේ පොලොන්නරුවේ වී අස්වනු නෙලන වකවානුව තුළ අඩුවකින් තොරව ඩීසල් ලබාදීමට පියවර ගන්නා බවයි.
