කීර්ති ප්රනාන්දු –
ආනයනික් බිත්තර අඩු මිලට ලබා ගැනීමේ අභිලාෂයෙන් දේශීය බිත්තර කර්මාන්තයට දිගින් දිගටම අපහසුතාවයට ලක් කළ රටේ මහා පරිමාණ බේකරි හිමියන් මේ වනවිට සෑම ඉන්දියන් බිත්තරයකින්ම පාඩු ලබමින් සිටින බව දේශීය බිත්තර කර්මාන්තකරුවෝ පවසති.
බේකරි හිමියන් දේශීය වෙළෙඳපලෙන් බිත්තර ලබා ගත්තේ බිත්තරයක් ග්රෑම් 63ක් බවට සහතික වීමෙන් පසුව බවත් එම බර නොමැති සෑම අවස්ථාවකම බිත්තර තොග ප්රතික්ෂේප කළ බවත් බිත්තර නිශ්පාදනය කර්මාන්ත කරුවෝ පෙන්වා දෙති.
එහෙත් මේ වනවිට ආනයනය කර ඇති ඉන්දීය බිත්තරය රුපියල් 35ක මිලකට ලබා දුන්නද එහි බර ග්රෑම් 35 -40ත් වීම නිසා දේශීය බිත්තරයක් බර වෙනුවෙන් වැය කළ මිලට සාපේක්ෂව බිත්තර ග්රෑම් 63ක බරක් වෙනුවෙන් අවම වශයෙන් රුපියල් 3.78ක මිලක් වැඩිපුර ගෙවන්නට බේකරි හිමියන්ට සිදුවී ඇති බව දේශීය බිත්තර කර්මානතකරුවෝ ගණනය කර පෙන්වා දෙති.
ඔවුන් කියන්නේ සෑම බිත්තර ග්රෑම් එකක් සඳහා ශත හයක වැඩිපුර මුදලක් ගෙවීමට ආනයනික බිත්තර මිලදී ගනු ලබන පුද්ගලයින්ට සිදුවන බවය. බිත්තරයක් රුපියල් 50 බැගින් දේශීය නිශ්පාදකයන්ගෙන් අද මිලදී ගත්තත් බිත්තර ග්රෑම් එකක් වෙනුවෙන් වැටෙන්නේ ශත 80ක මිලක් නමුත් සෑම ආනයනික බිත්තර ග්රෑම් එකක් වෙනුවෙන්ම ශත 86ක් ගෙවීමට සිදුවන බව ඔවුහු පෙන්වා දෙති. දේශීය නිශ්පාදකයින් පවසන්නේ අද වනවිට ගොවිපලවලින් බිත්තර නිකුත් කරන තොග මිල රුපියල් 46ක් බවය.
මේ සම්බන්ධව අදහස් දක්වමින් සමස්ථ ලංකා බිත්තර නිශ්පාදකයින්ගේ සංගමයේ සභාපති ආර්.එම් සරත් රත්නායක පැවසුවේ මේ ලෙසය.
අවුරුදු ගානක ඉඳන් බේකරිවලට ගත්ත බිත්තර ග්රෑම් 63න් උඩ තියෙන්න ඕන. ඔවුන් අපෙන් බිත්තර ගත්තේ බර කිරලා. බිත්තර තොගයෙ එක බිත්තරයක බර ග්රෑම් 63ට අඩු මධ්යයන අගයක් නම් තියෙන්නේ බිත්තර රිජෙක්ට් කරනවා. ඒ නිසා අපි ඒ බිත්තර තොග ගැන විශේෂයෙන් සැලකිලිමත් වුනා. අවුරුද්දේන් එහා පැනපු කිකිළියන්ගේ බිත්තර බේකරිවලට දුන්නේ.
ඒත් ඉන්දියන් බිත්තරය ග්රෑම් 35 -40 අතර තියෙන්නේ. බිත්තරයක බර ග්රෑම් 63යි කියලා හිතුවොත් ඉන්දියන් බිත්තර මිල දී ගනිද්දි ග්රෑම් 63ක බිත්තර සාරු සඳහා එයාලට ග්රෑම් කට ශත 86ක් වැය වෙනවා. හැබැයි අපේ බිත්තරය අදටත් බේකරිවලට ගන්නකොට ග්රෑම් එකක් වෙන්නේ ශත 80යි. අපි ඒක තේරුම් කළා.”
මේ වනවිට බේකරි හිමියන් දිගින් දිගටම දේශීය බිත්තර ඉල්ලමින් ඇවිටිලි කරන බව බිත්තර නිශ්පාදකයෝ කියති.
