අමායා උඩුවැරැල්ල –
ඌරෙකු ගෙන් ලබාගෙන, ජාන වෙනස් කළ වකුගඩුවක් ප්රථම වතාවට සාර්ථකව මිනිසෙකුට බද්ධ කළ පුවතක් ඇමරිකා එක්සත් ජනපදයෙන් වාර්තා වනවා. මීට සති දෙකකට පෙර එම ශල්යකර්මය සිදුකර තිබෙන්නේ එක්සත් ජනපදයේ බොස්ටන් හි මැසචුසෙට්ස් මහ රෝහලේ දී.
එම රෝහල හාවඩ් වෛද්ය විද්යාලයට අනුබද්ධ වන අතර එක්සත් ජනපදයේ තුන්වන පැරණිතම මහ රෝහලයි. විදෙස් මාධ්ය වාර්තා කරන පරිදි එම ශල්යකර්මයට මුහුණ දුන් හැට දෙහැවිරිදි රික් ස්ලේමන් පෙරේදා දින එනම් බදාදා රෝහලෙන් පිටව ගොස් තිබෙනවා.
ඌරන්ගේ අවයව මිනිසුන්ට බද්ධ කිරීම අතීතයේ දී ද උත්සාහ කර තිබෙන නමුත් ඒ සෑම අවස්ථාවකදී ම අසාර්ථක ව තිබෙනවා. එවන් පසුබිමක මෙම ශල්යකර්මයේ සාර්ථකත්වය විද්යාඥයින් විසින් ප්රශංසාවට ලක්කර ඇත්තේ එය අවයව බද්ධ කිරීමේ ක්ෂේත්රයේ ඓතිහාසික සන්ධිස්ථානයක් ලෙස සඳහන් කරමින්.මැසචුසෙට්ස් මහ රෝහල X හි සටහනක් තබමින් කියා සිටියේ රික් හොඳින් සුවය ලබන අතර ඔහුගේ පවුලේ අය සමඟ නිවසේ සිට දිගටම සුවය ලබනු ඇති බවයි.
මැසචුසෙට්ස් ප්රවාහන දෙපාර්තමේන්තුවේ කලමණාකරුවෙකු වන රික් ස්ලේමන් ශල්යකර්මයට පෙර අදහස් දක්වමින් පවසා තිබුනේ පසුගිය වසරේ තමන්, වකුගඩු රෝගයට ගොදුරුව එහි අවසන් අදියරේ ඇති බව හඳුනා ගත් විට වෛද්යවරුන් ඌරු වකුගඩුවක් අත්හදා බලන ලෙස යෝජනා කළ බවයි.
රික් ස්ලේමන්ගේ ශල්යකර්මය ඌරු අවයවයක් ජීවමාන මිනිසෙකුට බද්ධ කළ තුන්වන සැත්කමයි. පළමු බද්ධ කිරීම් දෙකෙහි දී එම රෝගීන් දෙදෙනාම අවයව බද්ධ කිරීමෙන් පසුව මිය ගොස් තිබෙනවා. මෙලෙස සත්ව අවයව බද්ධ කිරීම සිදු කරන්නේ විශේෂයෙන් භයානක අවස්ථාවන්හිදී රෝගීන් සඳහා පර්යේෂණාත්මක ප්රතිකාර ක්රම සානුකම්පිතව භාවිතා කිරීමට අවසර දෙන විශේෂ නීති යටතේ බව සඳහන් වනවා.
එරට අවයව වල අවශ්යතාවයෙන් සිටින රෝගීන් සංඛ්යාව ඉතා ඉහළ බව ඇමරිකානු මාධ්ය සඳහන් කර තිබෙනවා. එක්සත් ජනපදයේ දිනකට පුද්ගලයින් 17 දෙනෙකු අවයව බද්ධ කිරීමට හැකියාවක් නොමැතිව මිය යන බවද ඔවුන් දක්වා තිබෙනවා. 2023 වසරේ දී දළ වශයෙන් වකුගඩු 27,000 ක් එක්සත් ජනපදය තුල බද්ධ කර ඇති නමුත්, එම අවයව සඳහා පොරොත්තු ලේඛනයේ 89,000 කට ආසන්න පිරිසක් සිටි බව දැක්වෙනවා. ශල්යකර්මයට සාර්ථකව මුහුණ දී සුවය ලබමින් සිටින රික් අදහස් දක්වමින් ඔහු ඉතාමත් සතුටට පත්ව සිටින බවත්, ඔහුට පමණක් නොව අවයව බද්ධ කිරීම් බලාපොරොත්තුවෙන් සිටින සියලුම දෙනාට මෙය නව ආරම්භයක් සනිටුහන් කරන බවත් පවසා තිබෙනවා.
