අමායා උඩුවැරැල්ල –
එක්සත් ජනපදයේ මේරිලන්ඩ්, බැල්ටිමෝර් හි ෆ්රැන්සිස් ස්කොට් කී පාලමේ, ඩාලි නම් නෞකාව ගැටී වූ අනතුර සිදුව අද වනවිට සතියකට ආසන්න කාලයක් ගතවී තිබෙනවා. නමුත් මේ වනවිටත් ඩාලි නෞකාවේ සේවය කල නාවිකයන් අනතුරට ලක් වූ නෞකාවේ සිරවී සිටින බව විදෙස් මාධ්ය වාර්තා කරනවා.
ඩාලි නෞකාවේ කාර්ය මණ්ඩලයෙන් වැඩි පිරිසක් ඉන්දියාවෙන් පැමිණි පුද්ගලයන් වන අතර ඒ අතර එක් ශ්රී ලාංකික නාවිකයෙකු ද සිටින බව වාර්තා වල සඳහන් වනවා. විදෙස් මාධ්ය පවසන්නේ ඩාලි නෞකාවේ කාර්ය මණ්ඩලයට නෞකාවෙන් පිටවීමට හැකි වන්නේ කවදාද යන්න පිළිබඳව තවමත් නිශ්චිත ප්රකාශයක් බලධාරීන් නිකුත්කර නැති බවයි.
ඩාලි නෞකාවේ කාර්ය මණ්ඩලය
ඩාලි නෞකාව ශ්රී ලංකාව වෙත පැමිණෙමින් තිබූ අතරතුර, පාලමේ ගැටී අනතුර සිදුවන අවස්ථාවේ එහි කාර්ය මණ්ඩල සාමාජිකයින් 21 දෙනෙකු සිට තිබෙනවා. ඉන් 20 දෙනෙකුම ඉන්දීය පුරවැසියන් බව ඉන්දියාව තහවුරු කර තිබෙන අතර එක්සත් ජනපද වෙරළාරක්ෂක බලකාය, අනෙක් කාර්ය මණ්ඩල සාමාජිකයා ශ්රී ලාංකිකයෙකු බව සඳහන් කර තිබෙනවා. පසුගිය සතියේ ඉන්දියානු නිලධාරියෙක් මේ සම්බන්ධව ප්රකාශයක් නිකුත් කරමින් මැහුම් සහිත වූ සුළු තුවාල වලින් යුත් එක් සාමාජිකයා ඇතුළු කාර්ය මණ්ඩලයේ සියලු දෙනාම යහපත් සෞඛ්ය තත්ත්වයෙන් පසුවන බව පවසා තිබෙනවා.
ඔවුන්ගේ වත්මන් තත්වය
ඩාලි නෞකාවේ සිටින නාවිකයන් සමග නිලධාරීන් කිහිප දෙනකුම සම්බන්ධ වී සිටින බව වාර්තා වනවා. නාවිකයින්ගේ අයිතිවාසිකම් ආරක්ෂා කිරීම සඳහා ක්රියා කරන ලාභ නොලබන සංවිධානයක් වන බැල්ටිමෝර් ජාත්යන්තර නාවිකයින්ගේ මධ්යස්ථානයේ විධායක අධ්යක්ෂ ජෝෂුවා මෙසික් ඉන් එක් අයෙක්. ඔහු විදෙස් මාධ්ය වෙත ප්රකාශ කර තිබෙන්නේ වයිෆයි හොට්ස්පොට් ඇතුළත් සත්කාර පැකේජයක් බෙදා හැරීමට කටයුතු කිරීමෙන් පසු කාර්ය මණ්ඩලය සමඟ වට්සැප් පණිවිඩ හුවමාරු කර ගත් බවයි. ඔහු නෞකාවේ කාර්ය මණ්ඩලය පිලිබඳව විස්තර කරමින් ඔවුන්ගේ තත්වය ගැන විමසන විට බොහෝ දුරට ඔවුන් නිහඬව සිටින බවත් ඔවුන් සමඟ සම්බන්ධ වූ කිසිම අයෙකුට ඔවුන් වැඩි විස්තර නොපවසන බවත් පවසා තිබෙනවා.
බැල්ටිමෝර් හරහා එන නෞකා වලට සේවය කරන වැඩසටහනක් වන Apostleship of Sea පවත්වාගෙන යන ඇන්ඩෲ මිඩ්ල්ටන් පවසා ඇත්තේ අනතුරින් පසු ඔහු දිනකට කිහිප වතාවක් කාර්ය මණ්ඩලය සමඟ සම්බන්ධ වී ඇති බවයි. එම අවස්ථාවල පිලිතුරු වශයෙන් ඔවුන් සියල්ලන්ම හොඳින් සිටින බව පැවසූ බවත් ඔහු දක්වා තිබෙනවා.
කාර්ය මණ්ඩලයට නෞකාවෙන් පිටවිය හැක්කේ කවදාද?
බලධාරීන් පවසන පරිදි තවමත් නෞකාවේ නඩත්තු කටයුතු සිදු වෙමින් තිබෙන අතර කාර්ය මණ්ඩලයට නෞකාවෙන් පිටවීමට හැකියාවක් නැත. බැල්ටිමෝර් පාලම අසලින් නෞකාව රැගෙන යන තුරුම ඔවුන් එයින් පිටව නොයනු ඇති බවත් හේතුව එලෙස නෞකාවෙන් පිටවීමට අවසර ලබාගැනීම සංකීර්ණ හා දිගු ක්රියාවලියක් බවත් ඔවුන් සඳහන් කර තිබෙනවා.
සාමාන්ය තත්වයන් යටතේ පවා එක්සත් ජනපද වරායන් හි නෞකා වලින් විදේශීය ජාතික කාර්ය මණ්ඩල ගොඩබෑමට සැලකිය යුතු ලේඛන අවශ්ය වනවා. එනම් වීසා බලපත්රය ට අමතරව නාවිකයින්ට නැවෙන් පිටවීමට ඉඩ සලසන වලංගු වෙරළ බලපත්ර තිබිය යුතුයි. නාවිකයින් සමඟ වැඩ කරන විවිධ ලාභ නොලබන ආයතන මගින් එම කාර්යය ඉටු කළ හැකි වුවත් නැවේ සිට පර්යන්ත ගේට්ටුව වෙත යාමට ඔවුන්ට පරිවාර භටයන් ද අවශ්ය වන බව සඳහන් වනවා. ඩාලි නෞකාවේ කාර්ය මණ්ඩලය ට පිටවීමට අවශ්ය ලියකියවිලි තිබේද යන්න පිළිබඳ ව තවමත් පැහැදිලි නොවන අතර පරීක්ෂණ සහ නඩත්තු කටයුතු කොපමණ කාලයක් පවතිනු ඇත්ද යන්න අපැහැදිලි බවත් ක්රියාවලිය අවසන් වන තුරුම කාර්ය මණ්ඩලය නෞකාවේ සිටිනු ඇති බවත් විදෙස් මාධ්ය වාර්තා කර තිබෙනවා.
ඩාලි නෞකාව ශ්රී ලංකාව වෙත පැමිණෙමින් තිබූ නිසා ඔවුන් සතුව ආහාර, ජලය සහ අනෙකුත් සැපයුම් තිබෙන බව සඳහන් වනවා.එමෙන්ම නාවිකයින් සමඟ කටයුතු කරන ලාභ නොලබන සංවිධාන ලබාදෙන පැකේජ ලබා ගැනීමට ඔවුන්ට හැකි වනු ඇති අතර, ආහාර ඊට ඇතුළත් වන බවත් සඳහන්ය වනවා. නමුත් මෙම සිදුවීම නෞකා කාර්ය මණ්ඩලයේ මානසික තත්වයට බලපානු ඇති බවත් ඔවුන්ට මානසික සෞඛ්ය සහය අවශ්ය වනු ඇති බවත් විදෙස් මාධ්ය වැඩිදුරටත් සඳහන් කර තිබෙනවා. – බීබීසී ඇසුරින්
