අපේක්ෂිත ඇපයක් ලබා දීමට පෙර අපරාධ පරීක්ෂණ දෙපාර්තමේන්තුවට ප්රකාශයක් ලබා දෙන්නැයි අභියාචනාධිකරණය හිටපු අමාත්ය ජොන්ස්ටන් ප්රනාන්දුට අද නියෝග කළේය.
ඒ නිති විරෝධී සුඛෝපභෝගී මෝටර් රථයක් තමන් සන්තකයේ තබා ගැනීම පිළිබඳ චෝදනාවට තමන් අත් අඩංගුවට නොගන්නා ලෙස නියෝගක් ඉල්ලා හිටපු අමාත්යවරයා ගොනු කළ පෙත්සමක් සලකා බැලූ අවස්ථාවේ දීය.
ජොන්ස්ටන් ප්රනාන්දුට අයත් බව කියන නීත්යානුකූළව ලියාපදිංචි නොකර කොටස් ගෙන්වා එකලස් කර සකස් කළ බීඑම්ඩබ්ලියු රථක් කොළඹ හිල්ටන් හෝටල් රථ ගාලේ තිබී පසුගිය දා හමුවන්නේය.
මෙම සිද්ධියට අදාල අපරාධ පරීක්ෂණ දෙපාර්තමේන්තුව විමර්ශනයක් ඇරඹුවේය. ඒ සඳහා ප්රකාශයක් සටහන් කරගැනීමට පැමිණෙන ලෙස අපරාධ පරීක්ෂණ දෙපාර්තමේන්තුව කළ දැනුම් දීම මගහරිමින් ජොන්ස්ටන් ප්රනාන්දු සතියකට ආසන්න කාලයක් දැන් ඉන්නේ සී.අයි.ඩි.ය මගහරිමිනි. ඔහු ඉන්න තැන් සොයා ගිය ද එම එක් ස්ථානයකින්වත් ඔහුව සොයා ගත නොහැකි වූ බව ද සී.අයි.ඩි. ය කීවේය.
අපරාධ පරීක්ෂණ දෙපාර්තමේන්තුව මගහරිමින් ඉන්නා ජොන්ස්ටන් ප්රනාන්දු අද විමර්ශනයට අදාලව ඔහුව අත් අඩංගුවට ගැනීම වළක්වන ලෙස ඉල්ලා අපේක්ෂිත ඇපයක් අභියාචනාධිකරණයෙන් අයැද සිටියේය.
එම පෙත්සම අද අභියාචනාධිකරණ විනිසුරුවරුන්වන මොහොමඩ් ලෆාර්, පී.කුමරන් රත්නම් විනිසුරුමඩුල්ල හමුවේ කැඳවනු ලැබුවේය.
ජොන්ස්ටන් ප්රනාන්දු වෙනුවෙන් පෙනී සිටි නිතිඥ අමිල පල්ලියගේ කියා සිටියේ මෙම සිද්ධියට අදාලව පොලිසිය විසින් ප්රකාශ කීපයක් සටහන් කරගෙන ඇති අතර ඉන් අදාල වාහනයේ හිමිකාරිත්වය පිළිබඳව සංකීර්ණ තත්ත්වයක් මතුව තිබෙන බවය.
මේ පිළිබඳව එකිනෙකට පරස්පර කරුණු අධිකරණයට ඉදිරිපත් කරමින් අපරාද පරීක්ෂණ දෙපාර්තමේන්තුව තම සේවා දායකයා සැකකරුවෙක් ලෙස නම් කිරීම නීතියට පටහැනි බව කියා සිටියේය.
එහිදි පෙත්සම්කරු මෙම වාහනය භාවිතා කර ඇතිදැයි අධිකරණය විමසුවේය. නීතිඥවරයා සදහන් කර ඇත්තේ තම සේවාදායකයා පසුගිය මැතිවරණ සමයේ දී මෙම වාහනය භාවිතා කර තිබෙන බවය.
එවිට අධිකරණය ගරාජ් අංක තහඩුවක් සහිත වාහනයක් භාවිතා කිරීම ප්රශ්න සහගත බව විනිසුරු මඩුල්ල කියා සිටියේය.
නීතිපතිවරයා වෙනුවෙන් පෙනී සිටි ජ්යෙෂ්ට නියෝජ්ය සොලිසිටර් ජනරාල් හිරන්ජන් පීරිස් පෙන්වා දුන්නේ පෙත්සම්කරු පොලිසියට ප්රකාශයක් ලබා දී නැති බැවින් මෙම පෙත්සම පවත්වාගෙන යෑමට කිසිදු නීතිමය පදනමක් නොමැති බවය.
පෙත්සමකරු වරදක් කර තිබෙනවා ද, එසේත් නැතිනම් නිර්දෝෂී පුද්ගලයෙක් ද යන්න පොලිසියට තීරණය කළ හැක්කේ ඔහු ප්රකාශයක් ලබා දුන්නොත් පමණක් බව විනිසුරු මෙහිදී මඩුල්ල පෙන්වා දුන්නේය. විනිසුරු මඩුල්ල දැනුම් දුන්නේ අපේක්ෂිත ඇපයක් ලබා දීමට සලකා බැලීමට පෙර අපරාධ පරික්ෂණ දෙපාර්තමේන්තුවේ පෙනී සිට ප්රකාශයක් ලබා දිය යුතු බවය.
ඒ අනුව ජොන්ස්ටන් ප්රනාන්දු හෙට අපරාධ පරීක්ෂණ දෙපාර්තමේන්තුවේ සමූහ මංකොල්ල විමර්ශන අංශයට පැමිණ ප්රකාශයක් ලබා දීමට සූදානමින් සිටින බව නීතිඥවරයා අධිකරණයට දැනුම් දුන්නේය.
