අණ නොතකා ධාවනය කළ වෑන් රථයකට අද (10) අළුයම පොලිසිය එල්ල කළ වෙඩි ප්රහාරයකින් 17 හැවිරිදි තරුණයෙක් මිය ගොස් ඇතැයි පොලිසිය පවසයි. රථය ධාවනයකර ඇත්තේ මෙම බාල වයස්කාර තරුණයා බව පොලිසිය පවසයි.
මෙම සිදුවීම වාර්තා වන්නේ කයිට්ස් පොලිස් වසමේ අල්ලපිඩ්ඩි හන්දිය ආසන්නයේ දී ය. අද අළුයම සැක කටයුතු ලෙස ධාවනය වෙමින් තිබු මෙම වෑන් රථය එල්ලපිඩ්ඩි හන්දිය අසල රාජකාරි කරමින් සිටි පොලිස් නිලධාරීන් විසින් නතර කිරීමට අණ කළ විට එම අණ නොතකා මණ්ඩතිව් දෙසට ධාවනය කර තිබේ.
ඒ අවස්ථාවේ පොලිස් නිලධාරීන් විසින් මෙම වාහනය පිළිබඳව මණ්ඩතිව් මාර්ග බාධකය පරීක්ෂාව සඳහා ගොස් අල්ලපිඩ්ඩි දෙසට ගමන් කරමින් තිබූ කයිට්ස් ස්ථානාධිපතිගේ ජීප් රථයට දැනුම් දී ඇත.
ඒ අනුව ජීප් රථය එම වෑන් රථය නවත්වන ලෙස නැවත සංඥා කළත් එම අණ ද නොතකා ගමන් කර ඇති බවත්, අනතුරුව අහසට වෙඩි තබා රථය නවත්වා ගැනීමට කළ උත්සාහය ද නොසලකා හරිමින් රථය ඉදිරියට ධාවනය කළ බවත්, එහිදී පලා යන වෑන් රථයනවත්වා ගැනීම සඳහා සිදුකළ පොලිස් වෙඩි තැබීමකින් වෑන් රථයේ රියදුරු වෙඩි වැදී තුවාල ලබා යාපනය රෝහලට ඇතුළත් කිරීමෙන් පසු මියගිය බවත් පොලිසිය පවසයි.
මෙලෙස මියගොස් ඇත්තේ අවුරුදු 17ක් වූ වඩුකෝට්ටේ ප්රදේශයේ පදිංචිකරුවෙකි. රථයේ ගමන් ගත් පුද්ගලයින් දෙදෙනෙක් පොලිස් අත් අඩංගුවට ගෙන තිබේ. අත් අඩංගුවට ගත් වෑන් රථයේ පිටුපස ආසන ගළවා ඉවත් කර තිබී ඇතැයි පොලිසිය පවසයි.
සිද්ධිය සම්බන්ධයෙන් වැඩිදුර විමර්ශන කයිට්ස් පොලිසිය හා යාපනය කොට්ඨාස අපරාධ විමර්ශන කාර්යංශය විසින් සිදුකරනු ලබයි.
