මනම්පිටිය නිමල් ජයරත්න –
-
බලයට එන්නට පෙර කිව්වේ එකක්… දැන් කරන්නේ එකක්…. ප්රදේශයේ සර්ව ආගමික නායකයෝ ද පාරම්පරික වැලි ගොඩදමන්නන් වෙනුවෙන් එක්ව රජයට සිය විරෝධය පළ කරති…
වසර තිහකට ආසන්න කාලයක් පාරම්පරිකව කූඩ මගින් වැලි ගොඩ දැමූවන් සඳහා නිකුත් කරන වැලි බලපත්ර සහ ප්රවාහන බලපත්ර තාවකාලිකව දිඹුලාගල සහ වැලිකන්ද ප්රාදේශිය සභා යටතට පවරා ගැනීම හේතුවෙන්, මාස තුනකට අධික කාලයක් වැලි ගොඩදැමීම නතර වීම නිසා රුපියල් කෝටියකට ආසන්න බදු මුදලක් රජයට අහිමි කර ඇති බව, වැලිකන්ද දිඹුලාගල වැලි කැණීම් බලපත්ර සුබ සාධන සංගමය සඳහන් කරයි.
දේශපාලන අධිකාරිය විසින් ශ්රී ලංකා මහවැලි අධිකාරීය සහ භූ විද්යා පතල් කැනීම් කාර්යාංශයට බලපෑම් කරමින්, කැණීම් බලපත්ර දිඹුලාගල සහ වැලිකන්ද ප්රාදේශය සභා යටතට ලබාගැනීම නිසා සාමාජිකයින් තුන්දහකට ආසන්න පිරිසකගේ රැකියා අහිමි වී ඇති බවටද එම සංගමය චෝදනා කරයි.
දිඹුලාගල සහ වැලිකන්ද ප්රදේශයේ මහා සංඝරත්නය සහ හින්දු පූජකවරුන් සමඟ වැලිකන්ද සුසිරිගම ප්රදේශයේදී ඊයේ ( 09 ) මාධ්ය සාකච්ඡාවක් පවත්වමින් සුභසාධන සංගමය එම කරුණු අනාවරණය කළේය.
මීට පෙර තම සංගමයේ සාමාජිකයින් වැලි ගොඩ දැමීමේදී කියුබ් එකකින් රුපියල් නවසීයක මුදලක් ශ්රී ලංකා මහවැලි අධිකාරියටත් රුපියල් හත්සිය තිහක රාජ්ය බද්දක් භූ විද්යා පතල් කැණීම් කාර්යාංශයටත් ලබාදුන් බවත්, දැනට මාස කිහිපයක සිට වැලි බලපත්ර අහිමි වීමෙන්, මාසිකව රජයට ලැබෙන රාජ්ය භාගය දිඹුලාගල සහ වැලිකන්ද ප්රාදේශිය සභාවන් අහිමි කර ඇති බවත්, දිඹුලාගල වැලිකන්ද වැලි කැණීම් බලපත්ර සුභ සාධන සංගමයේ සභාපති එන්.කේ.කේ.විජේසූරිය මෙම මාධ්ය සාකච්ඡාවේදී කරුණු අනාවරණය කළේය.
පාරම්පරිකව වැලිගොඩ දැමු අයගේ රැකියා අහිමි වීමෙන් එම පවුල් දැඩිව අසරණ වී ඇති බවත්, එම තත්ත්වය සැලකිල්ලට ගෙන අදාළ වැලි මංකඩලාභීන්ට තම පාරම්පරික රැකියා සිදුකරගෙන යාමට අවශ්ය පසුබිම සකස් කිරීම සඳහා ජනාධිපතිවරයාගේ අවධානය වහාම යොමු කරන ලෙසත්, එසේ නොමැතිනම්, වැලි මංකඩලාභීන් සහ කම්කරුවා සමඟ මහා සංඝරත්නය සහ සර්ව ආගමික නායකයින් එක්ව දැවැන්ත අරගලයක් ක්රියාත්මක කරන බවත් මෙහිදී ගරුතර මහා සංඝරත්නය නියෝජනය කරමින් අදහස් දැක්වූ වැලිකන්ද සාසනාරක්ෂක බල මණ්ඩලයේ ලේඛකාධිකාරී පූජ්ය සුසිරිගම සංඝරක්ඛිතාලංකාර නාහිමියෝ සඳහන් කළහ.
පොළොන්නරුව ප්රදේශයේ වැලි සම්පත අධික වශයෙන් තිබෙන පළාතක් වුවත් පිටස්තර ප්රදේශවලින් පැමිණ වැව්වල රොන්මඩ ඉවත් කරන මුවාවෙන්, පස් සෝදා වැලි ජාවාරමක් ක්රියාත්මක කරමින් දිවයිනේ විවිධ පළාත්වලට රැගෙන යන බවත්, මේ පිළිබඳව ජනාධිපතිවරයාගේ අවධානය වහාම යොමු කරන ලෙසත් වැලිකන්ද සාසනාරක්ෂක බල මණ්ඩලයේ නියෝජ්ය ලේඛකාධිකාරී අනුරාධපුරයේ ධම්මතිලකාලංකාර නාහිමියෝ මෙහිදී පැවසූහ.
පොළොන්නරුවේ දේශපාලඥයින් බලයට පත්වීමට පෙර මනම්පිටිය වැලි සමාගමේ වැලි මාෆියාව ඉවත් කර පාරිභෝගික ජනතාවට සහන මිලට, සමූපකාර ක්රමයක් ඔස්සේ වැලි ලබාදෙන බවට පොරොන්දු වුවද වත්මන් රජයේ දේශපාලන අධිකාරිය සිදුකර ඇත්තේ, අසරණ ජනතාවගේ වැලි මංකඩ සභාවලට පවරා ගනිමින් කෘතීම වැලි මිලක් මවා මහවැලි ගඟේ වැලි බවට පවසමින් දිවයිනේ විවිධ ප්රදේශවලට අධික මිලකට වැලි අලෙවි කිරිම බවද එම සංගමය චෝදනා කළේය.
මෙම අවස්ථාවට දිඹුලාගල හා වැලිකන්ද ප්රදේශවල විහාරස්ථානවල විහාරාධිපති ස්වාමීන් වහන්සේලා, හින්දු ආගමික පූජකයින් මෙන්ම දිඹුලාගල වැලිකන්ද වැලි කැණීම් බලපත්රලාභීන්ගේ සංගමයේ සාමාජිකයින් සහ වැලි ගොඩදමන කම්කරුවන්, ටිපර් රථ හිමිකරුවන් මෙන්ම රියදුරන් ද එක්ව සිටියහ.
